ភ្នំពេញៈ ប្រធានក្លិបប្រដាល់ខ្លារខិន គឺអ្នកស្រី ឡុង រ៉ាវី បានទទូចសុំឲ្យសហព័ន្ធកីឡាប្រដាល់គុនខ្មែរ រកមុខឈ្មួញកណ្តាល ដែលនាំកីឡាករកម្ពុជា ទៅប្រកួតនៅប្រទេសថៃ ខុសច្បាប់ឲ្យឃើញ ដើម្បីចាត់ការទៅតាមផ្លូវច្បាប់ ព្រោះក្លិបរបស់អ្នកស្រី ក៏ទទួលរងគ្រោះពីបទល្មើសនេះដែរ។
ការប្រតិកម្មភ្លាមៗនេះ គឺបន្ទាប់ពីអ្នកស្រី ឡុង រ៉ាវី ទទួលដំណឹងថា សហព័ន្ធកីឡាប្រដាល់គុនខ្មែរ កាលពីព្រឹកថ្ងៃពុធនេះ បានកោះហៅប្រធានក្លិបមួយចំនួន ទៅធ្វើការព្រមានចំពោះការអនុញ្ញាត ឲ្យកីឡាករប្រដាល់កម្ពុជា ទៅប្រកួតនៅក្រៅប្រទេស ជាពិសេសប្រទេសថៃដោយមិនបានសុំច្បាប់ ដោយសហព័ន្ធ បានចាត់ទុកទង្វើនេះថា ជាករណីល្មើសច្បាប់។
អ្នកស្រី ឡុង រ៉ាវី បានប្រាប់ភ្នំពេញ ប៉ុស្តិ៍ មុននេះបន្តិចថា៖«ខ្ញុំជាប្រធានក្លិបមួយរូប ដែលទទួលរងគ្រោះដោយបទលើ្មសបែបនេះដែរ ប៉ុន្តែខ្ញុំមិនត្រូវបាន សហព័ន្ធ ហៅទៅចូលរួមនឹងគេទេ»។
អ្នកស្រីបានបញ្ជាក់ថា៖ «សហព័ន្ធ គួរតែរកមុខមន្ត្រី ដែលជាឈ្មួញកណ្តាលនាំកីឡាករកម្ពុជា ទៅប្រកួតនៅក្រៅប្រទេស ខុសច្បាប់នោះឲ្យឃើញ ដើម្បីដាក់ពិន័យ និងត្រូវធ្វើឲ្យស្មើភាពគ្នា ព្រោះកន្លងមក ធ្វើបានតែចំពោះអ្នកតូចតាច ប៉ុន្តែអ្នកធំលាក់មុខ រកមិនឃើញ និងមិនដែលព្រមាននោះទេ»។
ជាមួយនឹងការទទូចសុំឲ្យសហព័ន្ធកីឡាប្រដាល់កម្ពុជា ស្វែងរកមុខឈ្មួញកណ្តាលប្រព្រឹត្តល្មើសច្បាប់នេះ ក៏បានប្រាប់ផងដែរថា អ្នកស្រីទើបតែទទួលរងគ្រោះពីហេតុការណ៍នេះព្រោះកន្លងមកនេះ កីឡាករ ម៉ឺន ដា របស់ក្លិបខ្លារខិន បានលួចចេញយកទៅប្រកួត នៅប្រទេសថៃ ប៉ុន្តែរកមុខអ្នកនាំទៅប្រកួតមិនឃើញទេ។
គួរបញ្ជាក់ថា កាលពីដើមខែមីនា កន្លងមកនេះ កីឡាករ ម៉ឺន ដា បានចេញទៅប្រកួតនៅប្រទេសថៃ ដោយល្មើសច្បាប់ ហើយនៅក្នុងការប្រកួតនោះ ម៉ឺន ដា បានយកឈ្នះជើងចាស់របស់ថៃ Kingpetch Yor.Phayayung ដោយពិន្ទុដាច់ នៅលើសង្វៀន MAX MuayThai ដើម្បីគ្រងតំណែងជាម្ចាស់ខ្សែក្រវាត់ ដែលមានឈ្មោះ The Global Fight បានយ៉ាងជោគជ័យ។
ប៉ុន្តែអ្នកស្រី ឡុង រ៉ាវី មិនបានសាទរចំពោះជ័យជម្នះរបស់ ម៉ឺន ដា នោះទេ ព្រោះរូបគេ បានចេញទៅប្រកួត ដោយមិនបានសុំការអនុញ្ញាតពីក្លិប ហើយសហព័ន្ធកីឡាប្រដាល់គុនខ្មែរហាក់ដូចមិនរវល់ ក្នុងការជួយអ្នកស្រី វែកមុខរកជនល្មើស ឬឈ្មួញកណ្តាល ដែលបាននាំកីឡាករ ម៉ឺន ដា ចេញទៅប្រកួតនៅថៃនោះ។
អ្នកស្រី ឡុង រ៉ាវី បន្ថែមថា៖«បើសហព័ន្ធ ចាត់វិធានការច្បាប់ គឺត្រូវអនុវត្តឲ្យបានស្មើគ្នា និងគ្រប់ក្លិប ហើយបើអ្នកធំ ធ្វើខុសរកមុខឲ្យឃើញផង»។
អ្នកស្រី រ៉ាវី គ្រោងនឹងដាក់ពាក្យមកសហព័ន្ធកីឡាប្រដាល់គុនខ្មែរ និងស្ថាប័នពាក់ព័ន្ធ ដើម្បីដាក់ពិន័យ ទៅលើកីឡាករ ម៉ឺន ដា មួយរយៈ ដោយមិនឲ្យឡើងប្រកួតទាំងក្នុង និងក្រៅប្រទេស ព្រមទាំងសុំឲ្យសហព័នកីឡាប្រដាល់គុនខ្មែរ ដែលមានលោក តែម ម៉ឺន ជាប្រធាននោះ វ៉ែកមុខរកមន្ត្រីណា ដែលនាំកីឡាករទៅប្រកួតខុសច្បាប់នោះឲ្យឃើញ ទើបមានតម្លាភាព៕