.jpg)
ការជិះកង់កម្សាន្តជុំវិញភូមិ ដែលបានធ្វើនៅក្នុងទិវា កីឡាដើម្បីទាំងអស់គ្នា។ សហការី
ភ្នំពេញ៖ ក្រុមការងារនៃគណៈកម្មាធិការជាតិអូឡាំពិកកម្ពុជា (NOCC) បានរៀបចំកម្មវិធី «កីឡាដើម្បីទាំងអស់គ្នា» ឬ «Sport For All» ដែលជាកម្មវិធីប្រចាំឆ្នាំ ផ្តោតទៅលើការអប់រំស្វែងយល់ពីកីឡា ផ្តល់ជូនប្រជាពលរដ្ឋនៅមូលដ្ឋានផ្ទាល់ នៅស្រុកបារាយណ៍ ខេត្តកំពង់ធំ ខណៈកម្មវិធីនេះ ទទួលបានការគាំទ្រពីអង្គការសាមគ្គីអូឡាំពិកអន្តរជាតិ (OS) ហើយមានគោលបំណងអប់រំ ក្នុងប្រធានបទ «ប្រជាជនម្នាក់លេងកីឡាមួយមុខ»។
ជាមួយគ្នានេះអ្នកជំនាញកីឡាវ័យក្មេងគឺ លោក ប៊ុយ សោភ័ណ្ឌ និង ញ៉ាន សុខវិសាល ធ្វើជាវាគ្មិនរយៈពេល ២ ថ្ងៃ ដែលអនុវត្តផ្ទាល់ជាទ្រឹស្តី និងលេងកីឡាចំនួន ១២ ប្រភេទ កាលពីចុងសប្តាហ៍មកនេះ។ លោក តុប បញ្ញា ប្រធាននាយកដ្ឋានគ្រប់គ្រងគម្រោងនៃ NOCC បានប្រាប់ ភ្នំពេញ ប៉ុស្តិ៍ ថា៖ «នេះជាកម្មវិធីប្រចាំ ឆ្នាំ ២០២០ ដើម្បីបញ្ជ្រាបការផ្សព្វផ្សាយចលនាអូឡាំពិក និងផ្តល់ឱកាសឱ្យយុវជនបានចូលរួមលេងកីឡា ក៏ដូចជាផ្សព្វផ្សាយដំណើរការឆ្ពោះទៅទទួលរៀបចំធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ ២០២៣ នៅកម្ពុជា»។
លោក បញ្ញា បន្តថា៖ «គោលបំណងធំ គឺដើម្បីបណ្តុះនូវស្មារតីកីឡាជូនដល់មហាជនទូទៅ មិនថាពួកគាត់ជាអត្តពលិកអាជីព ឬអ្នកលេងកីឡា ដើម្បីសុខភាពនោះទេ ពោលគឺបញ្ជ្រាបនូវស្មារតីកីឡា ចំណេះដឹងចលនាអូឡាំពិក ទៅដល់ស្រទាប់មហាជននានា ហើយរយៈពេល ២ ថ្ងៃនេះ មានអត្តពលិកជាសិស្សានុសិស្សចូលរួមជាង ១ ០០០ នាក់ ដោយយើងជួបជុំគ្នាលេងកីឡានៅក្នុងសាលាបឋមសិក្សា អនុវិទ្យាល័យបណ្តុះវិជ្ជា»។
ជាមួយគ្នានេះ លោក ប៊ុយ សុភ័ណ្ឌ អនុប្រធានគម្រោងនៃ NOCC បាននិយាយថា៖ «ដើម្បីចូលរួមទប់ស្កាត់ជំងឺកូវីដ ១៩ ជាមួយរាជរដ្ឋាភិបាលការរៀបចំទិវា កីឡាដើម្បីទាំងអស់គ្នា នេះគឺក្រុមការងារបានអនុវត្តនូវវិធានការរបស់ក្រសួងសុខាភិបាលយ៉ាងម៉ឺងម៉ាត់ តាមរយៈការត្រួតពិនិត្យ វាស់កម្តៅ ពាក់ម៉ាស់ បាញ់អាល់កុល និងរក្សាគម្លាតសុវត្ថិភាព ខណៈទិវានេះ ជាយុទ្ធនាការដើម្បីឆ្ពោះទៅស៊ីហ្គេមលើកទី៣២ ឆ្នាំ ២០២៣ គឺប្រជាជនម្នាក់លេងកីឡាមួយមុខ»។
ទាក់ទងទៅនឹងវិញ្ញាសាដាក់អនុវត្ត លោក ប៊ុយ សុភ័ណ្ឌ បានប្រាប់ថា យើងដាក់ឱ្យអនុវត្តចំនួន ១២ វិញ្ញាសា មានស៊ុតបាល់ទាត់ ១១ ម៉ែត្រ, ចងជើងដើរប្រណាំងជាក្រុម, ឆ្លើយសំណួរពីគុណតម្លៃអូឡាំពិក និងផ្សព្វផ្សាយការធ្វើម្ចាស់ផ្ទះស៊ីហ្គេម ឆ្នាំ ២០២៣, លេងឆ្លងកាត់កងអូឡាំពិក, លំហាត់ប្រាណបែបអេរ៉ូប៊ិករត់ប្រណាំង ជុំវិញតារាងបាល់ទាត់, ប្រកួតបាល់ទាត់, ប្រកួតបាល់ទះ, ជិះកង់កម្សាន្តជុំវិញភូមិផ្សព្វផ្សាយវិធានការការពារកូវីដ ១៩, បង្វិលកងរត់ជាក្រុម, ល្បែងអប់រំសាមគ្គីជាក្រុម និងសកម្មភាពសម្អាតបរិស្ថានជុំវិញសាលារៀន។
ចំណែកលោក ញ៉ាន សុខវិសាល ប្រធាននាយកដ្ឋានទំនាក់ទំនងអន្តរជាតិ បាននិយាយថា គោលបំណងនៃកម្មវីធីកីឡាដើម្បីទាំងអស់គ្នា រួមមានការបំផុសឱ្យចូលរួមលេងកីឡា ស្របតាមគុណតម្លៃនៃចលនាអូឡាំពិក និងផ្សព្វផ្សាយយុទ្ធនាការ «ប្រជាជនម្នាក់លេងកីឡាមួយមុខ» ឆ្ពោះទៅធ្វើម្ចាស់ផ្ទះស៊ីហ្គេម ឆ្នាំ ២០២៣។
លោកបន្តថា តាមពិតសកម្មភាពកីឡាឆ្ពោះទៅស៊ីហ្គេម ឆ្នាំ ២០២៣ មានច្រើន ប៉ុន្តែបញ្ហាកូវីដ ១៩ ជាឧបសគ្គខ្លាំង ហើយការធ្វើសកម្មភាពបានជាបណ្តើរៗខ្លះ គឺអនុវត្តតាមការណែនាំរបស់ក្រសួងសុខាភិបាល៕
