.jpg)
លោក លី កុសល ពេលប្រគល់ពានលើការប្រកួតជាក្រុមឲ្យទៅក្រុមក្រសួងមហាផ្ទៃ ក្នុងពិធីបិទការប្រកួត ពីថ្ងៃចន្ទ។ រូប ឈន ណន
ភ្នំពេញ៖ ប្រធានសហព័ន្ធកីឡាវាយសីកម្ពុជា លោក លី កុសល បានលើកឡើងថា «ការលើកតម្កើងមុខមាត់ជាតិ» នៅលើឆាកអន្តរជាតិ មិនចាំបាច់ទាល់តែបំពាក់អាវុធនៅលើស្មាដូចជាកម្លាំង ទើបអាចធ្វើបាននោះទេ ហើយក៏មិនចាំបាច់ទាល់តែមនុស្សអស្ចារ្យ ទើបសម្រេចបាននោះដែរ ប៉ុន្តែកីឡាករ កីឡាការិនីគ្រប់រូប សុទ្ធតែអាចធ្វើបានតាមរយៈការខិតខំប្រឹងប្រែងស្វែងរកមេដាយឲ្យបានសម្រាប់ការចេញទៅប្រកួតនៅលើឆាកអន្តរជាតិ។
លោក លី កុសល បានថ្លែងថា៖ «ជ័យជម្នះនៅលើឆាកអន្តរជាតិ គឺជាការលើកតម្កើងមុខមាត់ប្រទេសជាតិ ដែលកីឡាករ កីឡាការិនីគ្រប់រូបអាចធ្វើបាន គឺមិនមែនទាល់តែជាមនុស្សអស្ចារ្យ មកពីណា ឬមិនចាំបាច់ត្រូវបំពាក់អាវុធ ដូចកងកម្លាំង ទើបអាចធ្វើបាននោះទេ។ ដូច្នេះការហ្វឹកហាត់គោរពវិន័យស្តាប់តាមការណែនាំរបស់គ្រូ ព្រមទាំងការមានអត្តចរិតថ្លៃថ្នូរមានការតាំងចិត្តខ្ពស់ គឺសំខាន់ខ្លាំងណាស់»។
ការលើកឡើងបែបនេះ ត្រូវបានធ្វើឡើងនៅក្នុងពិធីបិទការប្រកួតកីឡាវាយសីជ្រើសរើសជើងឯកថ្នាក់ជាតិ ឆ្នាំ ២០១៩ កាលពីល្ងាចថ្ងៃចន្ទ ហើយប្រសាសន៍លោក លី កុសល គឺចង់ក្រើនរំឭក និងជំរុញឲ្យអត្តពលិកវាយសី ទាំងអ្នកឈ្នះបានមេដាយ និងមិនបានមេដាយ ពីការប្រកួតជើងឯកថ្នាក់ជាតិនេះ គឺកុំបង្អង់ក្នុងការពង្រឹងសមត្ថភាពបន្ថែមទៀត ដើម្បីឆ្ពោះទៅរកការដណ្តើមឲ្យបានមេដាយក្នុងការប្រកួតលើឆាកអន្តរជាតិ ពិសេសការប្រកួតស៊ីហ្គេម លើកទី ៣២ ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។
ប្រធានសហព័ន្ធ លោក លី កុសល បានថ្លែងបន្ថែមថា៖ «ខ្ញុំសូមផ្តាំផ្ញើដល់ក្មួយៗ និងអ្នកមិនទាន់ដណ្តើមបានមេដាយក្តី សូមកុំបង្អង់ គឺត្រូវដាក់ចិត្តហ្វឹកហាត់ឲ្យបានទៀងទាត់ជាប្រចាំ ដើម្បីអភិវឌ្ឍខ្លួនឲ្យក្លាយទៅជាកីឡាករមានសមិទ្ធផលខ្ពស់ គឺទាំងកីឡាករ គ្រូបង្វឹក និងចៅក្រម ដើម្បីយើងមានលទ្ធភាព សមត្ថភាពគ្រប់គ្រាន់ធ្វើជាម្ចាស់ផ្ទះ ស្មើមុខ ស្មើមាត់ នៅលើឆាកអន្តរជាតិ»។
លោក លី កុសល បានបញ្ជាក់ថា៖ «គោលដៅរបស់យើង មិនមែនចាំឈ្នះដល់ស៊ីហ្គេម ឆ្នាំ ២០២៣ នោះទេ គឺត្រូវឈ្នះពីឥឡូវនេះទៅ អ៊ីចឹងដើម្បីឈ្នះត្រូវធ្វើម៉េច! គឺទាល់តែហ្វឹកហាត់ឲ្យបានដល់កម្រិត ហើយដើម្បីហាត់ឲ្យដល់កម្រិត ត្រូវស្តាប់គ្រូ ត្រូវគោរពវិន័យ ត្រូវមានអត្តចរិត ក្រមសីលធម៌ល្អ ម៉ឺងម៉ាត់ ទន់ភ្លន់ សុភាពរាបសា ដែលមើលទៅមហាជនគាំទ្រ និងចូលចិត្ត ដែលនេះជាវីរភាពរបស់យើង»។
តាមរបាយការណ៍របស់គណៈកម្មការប្រកួត បានឲ្យដឹងថា ការប្រកួតកីឡាវាយសីជើងឯកថ្នាក់ជាតិ នៅឆ្នាំនេះ មានកីឡាករ ១៤៧ នាក់ កីឡាការិនី ៣១ នាក់ និងគ្រូបង្វឹកចំនួន ៥៩ នាក់ សរុប ២២៨ នាក់ បានចូលរួម គឺមានការកើនឡើងនូវអត្តពលិកជាងឆ្នាំ ២០១៨ ចំនួន ៤៤ នាក់។
អត្តពលិកទាំង ១៧៨ នាក់នេះ បានប្រកួតតំណាងឲ្យក្លិបសមាគមចំនួន ១៨ នៅទូទាំងព្រះរាជាណាចក្រកម្ពុជា នៅលើវិញ្ញាសាចំនួន ១០ ហើយជាលទ្ធផល ក្រុមអត្តពលិកក្លិបវាយសីក្រសួងមហាផ្ទៃ ឈ្នះបានមេដាយមាសច្រើនជាងគេ គឺមេដាយមាស ៤ និងប្រាក់ ២ ដើម្បីឈរនៅចំណាត់ថ្នាក់លេខ ១ និងតាមពីក្រោយដោយក្លិបក្រសួងសេដ្ឋកិច្ចហិរញ្ញវត្ថុ ដែលឈ្នះបានមេដាយមាស ៣ និងប្រាក់ ២។
ចំណែកក្រុមអត្តពលិករបស់ខេត្តកំពង់ឆ្នាំង បានឈ្នះមេដាយមាសសរុបចំនួន ២ ប្រាក់ ១ និងសំរឹទ្ធ ១ ដើម្បីឈរនៅចំណាត់ថ្នាក់លេខ ៣ តាមពីក្រោយដោយខេត្តកំពង់ចាម បានឈ្នះមេដាយមាស ១ និងប្រាក់ ១ ខេត្តព្រះសីហនុ បានឈ្នះមេដាយប្រាក់ ២ និងសំរឹទ្ធ ១ ខណៈខេត្តប៉ៃលិន ឈ្នះបានមេដាយប្រាក់ ១ និងសំរឹទ្ធ ២។
ចំពោះក្លិបពហុកីឡដ្ឋានជាតិ បានឈ្នះមេដាយប្រាក់ ១ គឺល្អជាងក្រុមខេត្តបាត់ដំបង បានឈ្នះមេដាយសំរឹទ្ធ ២ ខណៈក្រុមខេត្តសៀមរាប ក្លិប 1 2 play និងក្លិបខេមរៈមហានគរ ឈ្នះបានមេដាយសំរឹទ្ធ ១ ដូចគ្នា ពីការប្រកួតថ្នាក់ជាតិនៅឆ្នាំ ២០១៩ នេះ៕
