ជប៉ុនៈ ប្រធានគណៈកម្មាធិការអូឡាំពិកជប៉ុនលោក Tsunekazu Takeda បាននិយាយពីថ្ងៃអង្គារថា លោកនឹងចុះចេញពីតំណែងនៅខែមិថុនា ស្របពេលអាជ្ញាធរបារាំងស៊ើបអង្កេតមានការពាក់ព័ន្ធលើរូបលោកនៅក្នុងការចំណាយមុនពេលដែលក្រុងតូក្យូប្រទេសជប៉ុនទទួលបានសិទ្ធិរៀបចំការប្រកួតកីឡាអូឡាំពិករដូវក្តៅឆ្នាំ ២០២០។
លោក Tsunekazu Takeda បាននិយាយនៅក្នុងកិច្ចប្រជុំរបស់គណៈកម្មាធិការអូឡាំពិកជប៉ុន (JOC) នៅទីក្រុងតូក្យូថា៖ «នៅថ្ងៃទី ២៧ ខែមិថុនាគឺអាណត្តិរបស់ខ្ញុំនឹងត្រូវបញ្ចប់ហើយ ហើយដោយពិចារណាពីអនាគតរបស់ JOC ខ្ញុំគិតថាអ្វីដែលសមស្របបំផុតសម្រាប់ខ្ញុំគឺត្រូវទុកកិច្ចការឲ្យអ្នកដឹកនាំជំនាន់ក្រោយ ដើម្បីឲ្យគេអាចធ្វើជាម្ចាស់ផ្ទះកីឡាអូឡាំពិក និងរៀបចំសករាជថ្មីមួយ»។
បុរសវ័យ ៧១ ឆ្នាំរូបនេះបាននិយាយថាគាត់ក៏នឹងត្រូវចាកចេញពីគណៈកម្មាធិការអូឡាំពិកអន្តរជាតិដែរ។ លោក Takeda បានស្ថិតក្រោមសម្ពាធមិនឲ្យស្វែងរកការបន្តអាណត្តិបន្ថែមទៀត នៅពេលអាណត្តិបច្ចុប្បន្នរបស់លោកនឹងត្រូវបញ្ចប់នៅក្នុងខែមិថុនា បន្ទាប់ពីអាជ្ញាធរបារាំងបានស៊ើបអង្កេតរកឃើញភ័ស្តុតាងនៃអំពើពុករលួយក្នុងការប្រគល់សិទ្ធិឲ្យមានការរៀបចំកីឡាអូឡាំពិក ឆ្នាំ ២០២០ នៅទីក្រុងតូក្យូ។
ច្បាប់ទម្លាប់របស់ JOC បច្ចុប្បន្នតម្រូវឲ្យបេក្ខជនសម្រាប់តំណែងកំពូលមានអាយុត្រឹមតែ ៧០ ឆ្នាំ ឬតិចជាងនេះក្នុងបេក្ខភាពរបស់ពួកគេ ប៉ុន្តែមានពាក្យចចាមអារ៉ាមថា គណៈកម្មាធិការនេះកំពុងពិចារណាផ្លាស់ប្តូរច្បាប់នេះ ដើម្បីអនុញ្ញាតឲ្យលោក Takeda អាចបន្តអាណត្តិរហូតដល់ឆ្នាំ ២០២០។
ទោះយ៉ាងណាក៏ដោយក្នុងរយៈពេលប៉ុន្មានខែថ្មីៗនេះការស៊ើបអង្កេតក្នុងករណីរបស់លោក Takeda បានក្លាយជាការរំខានគួរឲ្យធុញទ្រាន់មួយសម្រាប់អ្នករៀបចំកម្មវិធីនៃការប្រកួតកីឡាដែលនឹងត្រូវចាប់ផ្ដើមក្នុងរយៈពេលមិនដល់ ៥០០ ថ្ងៃទៀតទេ។
លោក Takeda ដែលជាអតីតជើងឯកអូឡាំពិក ១ រូបបានដឹកនាំការដេញថ្លៃរបស់ជប៉ុនក្នុងការបានធ្វើជាម្ចាស់ផ្ទះនៃការប្រកួតកីឡានេះជាលើកទី ២ ហើយពេលនេះលោកទំនងជាចង់ព្យាយាមរក្សាតំណែងរបស់លោករហូតទាល់តែភ្លើងត្រូវបានដុតបញ្ឆេះនៅក្នុងទីក្រុងតូក្យូ។
នៅក្នុងខែមករាគេបានបង្ហាញភ័ស្តុតាងថា លោកកំពុងប្រឈមនឹងនីតិវិធីច្បាប់របស់តុលាការនៅក្នុងប្រទេសបារាំងពាក់ព័ន្ធនឹងការចំណាយប្រាក់សរុប ២,៨ លានដុល្លារសិង្ហបុរីស្មើនឹង ២,១ លានដុល្លារអាមេរិកគិតតាមអត្រាប្ដូរប្រាក់បច្ចុប្បន្ន។
លោកត្រូវបានគេដាក់ក្នុងប្រព័ន្ធច្បាប់មួយឈ្មោះ «mis en examen» ជាវិធានច្បាប់មួយដែលមានប្រព័ន្ធខុសពីច្បាប់នៅអង់គ្លេស ឬនៅសហរដ្ឋអាមេរិក ហើយបើប្រែឲ្យស្រួលស្ដាប់បានគឺ «កំពុងត្រូវចោទប្រកាន់ទោស»។
វាមិនបានបង្កឲ្យមានការកាត់ទោសស្វ័យប្រវត្តិទេ ប៉ុន្តែមានន័យថា ព្រះរាជអាជ្ញាជឿថាមានភ័ស្តុតាងរឹងមាំ ឬភ័ស្តុតាងបង្ហាញពីការប្រព្រឹត្តខុស៕ SN