ភ្នំពេញ៖ ប្រធានគណៈកម្មាធិការជាតិអូឡាំពិកកម្ពុជា (NOCC) លោក ថោង ខុន បានចាត់ទុករយៈពេល ១០ ឆ្នាំចុងក្រោយនេះ ថា ជាឆ្នាំ ដែលវិស័យកីឡានៅកម្ពុជា មានសម្ទុះរីកចម្រើនលឿន ហើយលោកបានកោតសរសើរលោក វ៉ាត់ ចំរើន ក្នុងតំណែងជាអគ្គលេខាធិការ និងថ្នាក់ដឹកនាំមន្ត្រី ព្រមទាំងទីប្រឹក្សាជាន់ខ្ពស់ទាំងអស់ ដែលយកអស់នូវសមត្ថភាព ជំនាញ និងការទទួលខុសត្រូវ គឺមានបេះដូងរួមតែមួយ ដើម្បីធ្វើឲ្យចលនាអូឡាំពិកកម្ពុជា មានវឌ្ឍនភាពល្អ ទទួលបានលទ្ធផលល្អក្នុងរយៈពេល ១០ ឆ្នាំនេះ។
នៅក្នុងពិធីសំណេះសំណាល រំឭកពីការវិវឌ្ឍនៃសកម្មភាពកីឡារបស់ NOCC រយៈពេល ១០ ឆ្នាំនេះ លោក ថោង ខុន ក៏បានថ្លែងកោតសរសើរដល់ក្រសួងអប់រំ យុវជន និងកីឡា ដែលជាដៃគូសហការមិនអាចខ្វះបាន។
លោកបានថ្លែង កាលពីថ្ងៃចន្ទថា៖ «នេះជាការជួបជុំ រំឭកខួប ១០ ឆ្នាំ បន្ទាប់ពី NOCC ធ្វើការកែទម្រង់ ដោយប្រមូលយកអ្នកមានសមត្ថភាពវ័យក្មេង មានចំណេះដឹងខាងកីឡា គ្រូ និងអ្នកកីឡាចាស់ៗ ឲ្យមកចូលរួមជាមួយចលនាអូឡាំពិកកម្ពុជា ពិសេសយើងមានគោលការណ៍ ផ្តល់ឱកាសឲ្យខ្មែរនៅក្រៅប្រទេសចូលរួមផងដែរ»។
លោក វ៉ាត់ ចំរើន ក្នុងឋានៈជាអគ្គលេខាធិការ NOCC ដែលត្រូវបានមជ្ឈដ្ឋានទូទៅទទួលស្គាល់ថា ជាអ្នកជំនាញគ្រប់គ្រងដឹកនាំ មានទស្សនៈទូលំទូលាយ និងមានអធ្យាស្រ័យល្អនោះ បានថ្លែងនៅយប់ថ្ងៃចន្ទនោះថា៖ «យប់នេះថ្នាក់ដឹកនាំ NOCC មន្ត្រីគ្រប់ថ្នាក់ និងតំណាងសហព័ន្ធកីឡាជាតិ បានជួបជុំអបអរសាទរ និងលើកសរសើរពីសមិទ្ធផល ដែលយើងរួមគ្នាសម្រេចបានក្នុងរយៈពេល ១០ ឆ្នាំ គឺយើងបានដឹងទាំងអស់គ្នារួចហើយថា មានសម្ទុះរីកចម្រើនលើឆាកអន្តរជាតិ និងទទួលបានមេដាយជូនជាតិជាបន្តបន្តាប់»។
លោកបន្ថែមថា៖ «យប់នេះខ្ញុំចង់និយាយច្រើន ព្រោះអ្វីៗយើងសុទ្ធតែបានឃើញនូវលទ្ធផលទាំងអស់គ្នាហើយ គឺនិយាយឲ្យខ្លី កីឡាគួរមើលពីលទ្ធផល មិនគួរមើលពីរបាយការណ៍ច្រើនពេកនោះទេ ហើយអ្វីដែលចំគោលដៅល្អ មាន ៣ ចំណុចទី១ ជំរុញ និងទាក់ទងការហ្វឹកហាត់អត្តពលិកក្រៅប្រទេស ទី២ សាមគ្គីភាពផ្ទៃក្នុងរបស់សហព័ន្ធបានល្អ និងទី៣ ផ្តល់ឱកាសដល់អ្នកជំនាញមានសមត្ថភាព ដោយចៀសឲ្យផុតពីបក្ខពួក ដែលគ្មានសមត្ថភាព»។
តាមកំណត់ត្រាជាប្រវត្តិសាស្ត្រ លោក វ៉ាត់ ចំរើន បានជាប់ឆ្នោតជាសមាជិកប្រតិបត្តិ និងទទួលបានតំណែងជាអគ្គលេខាធិការ NOCC កាលពីថ្ងៃទី ៩ ខែ កញ្ញា ឆ្នាំ ២០០៩ ហើយជាសមិទ្ធផលក្នុងរយៈពេល ១០ ឆ្នាំនេះ លោកបានបង្កើតឲ្យមានព្រឹត្តិការណ៍កីឡា ជាច្រើនបន្ថែមលើព្រឹត្តិការណ៍ ដែលមានស្រាប់ ដូចជាទិវារត់ប្រណាំងពាក់កណ្ដាលម៉ារ៉ាតុងអន្តរជាតិភ្នំពេញម៉ារ៉ាតុងចក្រភពខ្មែរ រត់ប្រណាំងចម្ងាយឆ្ងាយអង្គរ Angkor Ultra Trail ពាក់កណ្ដាលម៉ារ៉ាតុងអន្តរជាតិខេត្តព្រះសីហនុ ថ្មើរជើងប្រវត្តិសាស្រ្ត ព្រឹត្តិការណ៍បុណ្យសមុទ្រ និងបុណ្យទន្លេ ព្រមទាំងបានព្រឹត្តិការណ៍កីឡា និងទេសចរណ៍ជាច្រើនទៀត។
អ្វីដែលកម្ពុជាចំណេញខ្លាំង គឺលោក វ៉ាត់ ចំរើន បានទំនាក់ទំនងជាមួយអូឡាំពិកអន្តរជាតិ តាមរយៈអង្គការសាមគ្គីអន្តរជាតិ (OS) បង្កើតគម្រោងវគ្គបណ្តុះបណ្តាលឲ្យសហព័ន្ធកីឡាជាតិ ក្នុង ១ ឆ្នាំៗ មានពី ៤ ទៅ ៦ ដងផងដែរ។
លោក ចំរើន បានបញ្ជាក់ថា៖ «អ្វីៗដែលបានកើតឡើងមកទល់ពេលនេះ គឺខ្ញុំទទួលបានការទុកចិត្តពីឯកឧត្តម ថោង ខុន និងរាជរដ្ឋាភិបាល បានផ្តល់សិទ្ធិពេញលេញក្នុងការបញ្ចេញនូវសមត្ថភាពដោយលោកនៅចង្អុលបង្ហាញ និងត្រួតពិនិត្យពីលើខ្ញុំ»៕