ភ្នំពេញ: កីឡាប្រដាល់គុនខ្មែរ ដែលជាប្រភេទកីឡាប្រជាប្រិយមួយ មានការប្រកួតជាប្រចាំសប្តាហ៍ និងពេញនិយមនោះ ត្រូវបានផលិតកម្មភាពយន្តក្នុងស្រុកឈ្មោះមិត្តប៉ូលិសភាពយន្ត សហការជាមួយបងប្អូនខ្មែរនៅអាមេរិក ដើម្បីថតជាខ្សែភាពយន្តមានលក្ខណៈបែបកម្សាន្ត និងបង្ហាញពីក្បាច់គុនខ្មែរ។
ដើម្បីការផលិតភាពយន្តនេះ កីឡាករ-កីឡាការិនី គ្រូបង្វឹកគុនខ្មែរមួយចំនួន ត្រូវបានជ្រើសរើសឲ្យចូលសម្តែងផ្ទាល់ ដោយមិនតម្រូវយកតួឯក ឬតួរងពីអ្នកជំនាញសិល្បៈភាពយន្តល្បីល្បាញនោះឡើយ។
លោកសុង សុភក្តី អ្នកដឹកនាំប្លង់ថត និងជាអ្នកដឹកនាំរឿង បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «តាមការជជែកពិភាក្សា ពីអ្នកនិពន្ធដឹកនាំរឿងនៃក្រុមការងារការផលិតភាពយន្តក្បាច់គុនខ្មែរ ដែលមានឈ្មោះថា «គុនខ្មែរម្ចាស់ស្រុក» សាច់រឿងនេះ សុទ្ធមានរយៈពេល ២ ម៉ោងពេញ ដែលចំណាយពេលថតក្នុងព្រះរាជាណាចក្រកម្ពុជា ប្រហែល ៤ ខែ និងចំណាយពេលសម្រាប់កាត់តចំនួន ៣ ខែទៀត»។
លោកបន្តថា៖ «ការចាប់ផ្តើមថតគ្រោងធ្វើនៅចុងឆ្នាំ ២០១៨ នេះ ខណៈដែលការរៀបចំទីតាំង និងការប្រមូលកីឡាករ-កីឡាការិនីប្រយុទ្ធក្នុងការសហការជាមួយសហព័ន្ធគុនខ្មែរ នឹងចាប់ផ្តើមបណ្តើរៗពីខែក្រោយនេះទៅ»។ «នេះជាខ្សែភាពយន្តក្នុងរបត់ថ្មីមួយ ដែលមិនសំដៅស្វែងរក ទីផ្សារពាណិជ្ជកម្ម ឬចំណេញពីការលក់ការបញ្ចាំងនោះទេ ប៉ុន្តែជាភាពយន្តមានលក្ខណៈប្រវត្តិសាស្ត្រមរតកក្បាច់គុនខ្មែរ បង្ហាញពីភាពអស្ចារ្យជាម្ចាស់ដើមនៃក្បាច់គុន ជាព្រលឹងជាតិខ្មែរ ដែលបន្សល់ទុកពីបុរាណកាល»។
លោកសុង សុភក្តី បានបន្ថែមទៀតថា៖ «ចំពោះទីតាំងថតវិញគឺប្រើប្រាស់ស្ទូឌីយោតិចតួច និងក្លិបប្រដាល់ចម្រុះនៅឯឃុំអំពៅព្រៃ ស្រុកកណ្តាលស្ទឹង ខេត្តកណ្តាល និងតំបន់ប្រវត្តិសាស្ត្រជាច្រើន មាននៅខេត្តមួយចំនួនដូចជា ខេត្តសៀមរាប តាកែវ បាត់ដំបង កំពង់ធំ កណ្តាល និងរាជធានីភ្នំពេញ ទៅតាមកម្មវិធីនិងសាច់រឿងសម្តែងតែម្តង»។
លោកឧត្តមសេនីយ៍ឯកម៉ក់ សំអុល ដែលជាអ្នកនិយមក្បាច់គុន និងមានបទពិសោធជាអ្នកសិល្បៈក្បាច់គុន ក៏ដូចជាអ្នកផ្តើមគំនិតផលិតភាពយន្តលក្ខណៈបែបប្រយុទ្ធវាយតប់នេះ ថ្លែងថា៖ «ការផលិតភាពយន្តដែលមានឈ្មោះថា គុនខ្មែរម្ចាស់ស្រុកនេះ ជាភាពយន្តដែលខ្ញុំបានចិញ្ចឹមចិត្តយូរណាស់មកហើយ ក្នុងគោលបំណងផលិតឡើងតាមលក្ខណៈខ្មែរ ប្រពៃណីទំនៀមទម្លាប់ខ្មែរសុទ្ធសាធ និងរឿងពិតនៃការប្រើប្រាស់វិជ្ជាគុនក្នុងផ្លូវសុចរិតយុត្តិធម៌ ដើម្បីដោះស្រាយបញ្ហាជីវិតក្នុងសង្គមនាសម័យបុរាណខ្មែរ ហើយសាច់រឿងក៏បង្ហាញពីការប្រកួតក្នុងសម័យថ្មីជាមួយប្រភេទកីឡាប្រយុទ្ធដទៃមានហាប់គីដូ តេក្វាន់ដូ ការ៉ាតេដូ និងក្បាច់គុនចិនជាដើម»។
លោកបានបន្តថា៖ «រឿងគុនខ្មែរម្ចាស់ស្រុកនេះគ្រោងនឹងអញ្ជើញគ្រូកីឡា និងកីឡាករ កីឡាការិនីឆ្នើមៗមួយចំនួនក្នុងក្នុងសហព័ន្ធគុនខ្មែរមកដើរតួ និងសម្តែងដែលខ្ញុំនឹងពិនិត្យជ្រើសរើសមានដូចជាលោកអេ ភូថង លោកឡុង សាលវ័ន្ត លោកជួន សំណាង លោកគង់ ចាន់ធីណា និងវ៉ន វីវ៉ា ជាដើម ហើយចំណែកកីឡាករមានឡុង សុភី, រឿង សោភ័ណ្ឌ, ឡៅ ចន្ទ្រា, ឡៅ ចិត្ត្រា, ចាន់ រតនា និងកូនអេ ភូថង ទាំងប្រុស ទាំងស្រីផងដែរ»។
លោកម៉ក់ សំអុល បានបន្ថែមថា៖ «ខ្ញុំជាអ្នកគ្រប់គ្រងទូទៅ និងមានលោកលឹម សុខន ជាអ្នកនិពន្ធដឹកនាំសម្តែង និងមានមិត្តភក្តិ ដែលនិយមចូលចិត្តផ្នែកគុននិយមចូលរួមសហការ។ ចំណែកឯថវិកាចំណាយក្នុងការផលិតរឿងនេះ មានក្នុងគម្រោងក្រោម ១០ ម៉ឺនដុល្លារអាមេរិក ដែល ៧០ ភាគរយបានមកពីការគាំទ្រពីសប្បុរសជនដែលនិយមគាំទ្រស្រឡាញ់វិស័យសិល្បៈ និងកីឡា និង ៣០ ភាគរយទៀតបានមកពីស្ថាបនិកជាផលិតករមាន លោកសុង សុភក្តី លោកលឹម សុខន និងខ្ញុំផ្ទាល់»៕