ភ្នំពេញ៖ ព្រឹត្តិការណ៍ប្រកួតដណ្តើមពានរង្វាន់ TV5 Boxing Knock Out Series ក្នុងទម្ងន់ ៥៤ គីឡូក្រាមរបស់សង្វៀនប៉ុស្តិ៍លេខ ៥ បានរកឃើញបេក្ខភាព ដែលមានសមត្ថភាពខ្លាំង និងមធ្យមចំនួន ៦ នាក់ ឈរចាំនៅវគ្គជម្រុះទី២ ហើយ ក្នុងនោះមាន ធន់ អៀនឡៃ, ស៊ឺន ថៃសាន់, រិន ដាវីត, ពេជ្រ ប៊ុនសិទ្ធ, បាង កាណុន និង ឡុង ខេត្ត ចំណែកការប្រកួតជម្រុះជុំទី១ ប្រចាំសប្តាហ៍ទី៧ នាល្ងាចថ្ងៃសៅរ៍ គឺបានដាក់ជើងថ្មី សាន់ សំអុន និង ផាន ផាន់ណាត់ ឱ្យប្រកួតគ្នា។
វត្តមានអ្នកប្រដាល់ជើងថ្មី សាន់ សំអុន និង ផាន ផាន់ណាត់ នៅសប្តាហ៍នេះ ត្រូវបានគេកត់សម្គាល់ឃើញថា កាន់តែខ្ចីវស្សា បើប្រៀបធៀបទៅនឹងអ្នកប្រដាល់ ៦ នាក់ ដែលបានឈ្នះរួចហើយក្នុងវគ្គជម្រុះទី១ នេះ ប៉ុន្តែអ្នកទាំង ២ សុទ្ធតែអះអាងពីទឹកចិត្តមោះមុតក្នុងការចូលប្រកួតប្រជែង ដោយមិនខ្លាចញញើតអ្នកប្រដាល់ជើងខ្លាំងៗ ដែលជាសិស្សច្បងជំនាន់មុនឡើយ ពិសេសឱកាសដែលកម្មវិធី គិតសំខាន់តែប្រភេទទម្ងន់នោះ ដោយពួកគេសុទ្ធតែចង់ស្គាល់រសជាតិប្រជែងជាមួយជើងចាស់ ដែលយ៉ាងហោចណាស់ក៏ទទួលបានបទពិសោធល្អដែរ។
ទោះយ៉ាងណា សាន់ សំអុន ជាអ្នកប្រដាល់ មានជំនាញប្រើកណ្តាប់ដៃល្អ ខណៈដែលគ្រូបង្វឹករបស់គេ គឺ លោក អាត់ សំរិទ្ធ កំពុងតែយកចិត្តទុកដាក់ជួយបង្វឹកជាបណ្តើរៗ ដោយមួយរយៈនេះ ប្រកួតឈ្នះជាបន្តបន្ទាប់។ ចំណែក ផាន ផាន់ណាត់ មានស្នៀត និងផ្លែវ៉ៃបានល្អ ព្រោះសិស្សគណមកពីក្លិបទ័ពបញ្ជាការដ្ឋានពិសេស តែងមានការរិតបន្តឹងផ្នែកវិន័យបានល្អជាងក្លិបផ្សេងៗ ពីសំណាក់លោក ហង្ស ស៊ឺន។
អ្នកគ្រប់គ្រងកីឡាករប្រចាំសង្វៀនប៉ុស្តិ៍លេខ ៥ បានស្រង់ស្ថិតិប្រវត្តិប្រកួត គឺលោក ញាណ សុធី ឱ្យដឹងថា៖ សាន់ សំអុន មានប្រវត្តិប្រកួតបានចំនួន ៣១ លើក ឈ្នះ ២៥ លើក ចាញ់ ៥ ដង និងស្មើពិន្ទុ ១ លើក។ កីឡាករ ផាន ផាន់ណាត់ វិញគេមានប្រវត្តិប្រកួតចំនួន ២១ លើកឈ្នះ ១៦ លើក និងចាញ់ ៥ លើក ប៉ុន្តែពួកគាត់សុទ្ធតែមានចិត្តធំសុំឡើងប្រកួតក្នុងកម្មវិធីនេះក្នុងស្មារតីជាអ្នកប្រដាល់ចិត្តធំឡើងវ៉ៃដោយមិនទុកពេលស្ទាបស្ទង់នោះឡើយ។
លោក អាត់ សំរិទ្ធ និយាយថា៖ «សាន់ សំអុន មានទឹកចិត្តក្លាហាន កណ្តាប់ដៃធ្ងន់ ហើយបច្ចុប្បន្នហ្វឹកហាត់បានល្អ ត្រៀមប្រកួតថ្ងៃសៅរ៍នេះ ក្នុងជំនឿឈ្នះ ៨០ ភាគរយ។ សម្រាប់ការប្រកួតវគ្គជម្រុះទី១ នេះ ខ្ញុំរំពឹងខ្ពស់ ប៉ុន្តែបើចូលដល់វគ្គទី២ មិនដឹងថាយ៉ាងណាទេ ព្រោះមានអ្នកខ្លាំងៗច្រើនដែរ។ តែយ៉ាងណា ចង់ឱ្យ សំអុន ឈ្នះវគ្គនេះសិន ចាំគិតបន្តទៀត ដ្បិតអីបើយើងមិនហ៊ានប្រកួតជាមួយអ្នកខ្លាំងៗទេ មិនងាយបានក្លាយជាអ្នកខ្លាំងឡើយ»។
ចំណែកលោក ហង្ស ស៊ឺន គ្រូបង្វឹក ផាន ផាន់ណាត់ បានប្រាប់ថា៖ «កូនសិស្សខ្ញុំនេះ នៅខ្ចីដែរ ខ្ញុំមិនហ៊ានទស្សន៍ទាយថា យ៉ាងដូចម្តេចនោះឡើយ ប៉ុន្តែធានាវ៉ៃអស់ពីសមត្ថភាព ហើយកូនសិស្ស ដែលចេញពីប្រភពក្លិបឆត្រយោង គឺខ្ញុំធានាថា ឡើងវ៉ៃមិនឡើងទៅរាំទេ ឯការចាញ់ឈ្នះ ខ្ញុំមិនទាន់ហ៊ាននិយាយទេ ព្រោះកំពុងព្យាយាមឱ្យល្អហើយ។ យ៉ាងណាក៏ដោយ ខ្ញុំសង្ឃឹមតិចទេ»។
ចំណែកគូប្រកួតមិត្តភាពវិញ កីឡាករ ប៊ន ពន្លឹក ត្រូវប្រកួតជាមួយ ផន សុខវិបុល ក្នុងទម្ងន់ ៥១ គីឡូក្រាម ចំណែកអ្នកប្រដាល់ជើងចាស់ សេន កុសល ក្លិបមោងឫស្សីមរតកគុនខ្មែរ ត្រូវប៉ះជើងថ្មី តុប ផេង របស់ក្លិបកុលបុត្រគុនខ្មែរ ក្នុងប្រភេទទម្ងន់ ៦០ គីឡូក្រាម។ ទោះយ៉ាងណា សេន កុសល ទំនងធ្លាក់ជើងមួយកម្រិត ខណៈដែលជើងថ្មី តុប ផេង កំពុងល្អ៕