.jpg)
ផាន់ គ្រាន់ បានព្យាយាមទប់ទម្ងន់នៃការទាត់របស់ថៃ Phat Ka។ រូបថត យឺន ពន្លក
ភ្នំពេញ៖ កីឡាករកម្ពុជា ផាន់ គ្រាន់ គ្រោងនឹងផ្អាកជួយការងារប្រពន្ធរបស់ខ្លួនខ្លះ ដើម្បីទុកពេលវេលាធ្វើការហ្វឹកហាត់ឲ្យបានខ្លាំងឡើងវិញ សម្រាប់ត្រៀមការប្រកួតអន្តរជាតិឲ្យបានល្អ ហើយការសម្រេចចិត្តបែបនេះ បន្ទាប់ពីរូបគេបានបោះបង់ចោលការប្រកួតត្រឹមទឹកទី ២ ក្រោមទម្ងន់ជើងអ្នកប្រដាល់ថៃ Phat Ka កាលពីថ្ងៃអាទិត្យ។
សម្រាប់ការប្រកួត នៅលើសង្វៀន SEATV កាលពីថ្ងៃអាទិត្យនោះ ផាន់ គ្រាន់ បានទទួលរងនូវស្នៀតទាត់យ៉ាងធ្ងន់របស់ថៃ Phat Ka ចូលឆ្អឹងជំនីរ ធ្វើឲ្យរូបគេទ្រាំការឈឺចាប់នេះមិនបាន និងបោះបង់ចោលការប្រកួត នៅត្រឹមទឹកទី ២ ហើយការចាញ់យ៉ាងផុយស្រួយនេះ បានធ្វើឲ្យ ផាន់ គ្រាន់ មានកំណត់ត្រាចាញ់ Phat Ka កើនឡើង ៥ ដង ព្រោះជំនួន ៦ លើកកន្លងមក ផាន់ គ្រាន់ ឈ្នះបាន ២ លើកគត់ និងចាញ់ ៤ ដង។
យ៉ាងណាក៏ដោយ ផាន់ គ្រាន់ បានទម្លាយពីមូលហេតុ ចំពោះការបោះបង់ការប្រកួតត្រឹមទឹកទី ២ នេះថា៖ «កីឡាករថៃរូបនេះ មិនខ្លាំងប៉ុន្មានទេ ប៉ុន្តែការហ្វឹកហាត់របស់ខ្ញុំនៅស្ទើរ ដោយសារតែខ្ញុំមានបញ្ហាជីវភាពលំបាក រវល់ជួយមុខរបរលក់សាច់ជ្រូកផាក់ឡូវជាមួយប្រពន្ធ ដើម្បីជួយទ្រទ្រង់ជីភាពគ្រួសារបន្ថែម»។
ផាន់ គ្រាន់ បានទទួលស្គាល់ថា សមត្ថភាពរបស់ខ្លួន មានការធ្លាក់ចុះ ពិសេសការប្រកួតមួយរយៈចុងក្រោយនេះ ទទួលបានលទ្ធផលចាញ់ជាបន្តបន្ទាប់។
ផាន់គ្រាន់ បានបន្តថា៖ «តាមពិតទៅ ខ្ញុំហ្វឹកហាត់បានតិចតួច ព្រោះមានបញ្ហាច្រើន គឺជាប់រវល់មើលថែលោកឪពុកឈឺ ហើយបន្ទាប់មកគាត់ស្លាប់ ខ្ញុំជាប់ធ្វើបុណ្យឲ្យគាត់ និងមានមុខរបរបន្ថែម គឺជួយធ្វើផាក់ឡូវលក់ដូរផងដែរ ហេតុនេះធ្វើឲ្យការហាត់របស់ខ្ញុំ មិនសូវបានល្អ នាំឲ្យទម្ងន់ចេះតែឡើងដល់ជាង ៧០ គីឡូក្រាម និងខំសម្រកមកប្រកួតត្រឹម ៦៥ ឬ ៦៧ គីឡូក្រាម ដែលធ្វើឲ្យខ្សោយកម្លាំងជាងមុន»។
ទោះបីជាយ៉ាងណា ផាន់ គ្រាន់ អះអាងថា៖ «ចាប់ពីសប្តាហ៍នេះទៅ ខ្ញុំសម្រេចចិត្តផ្អាកជួយការងារប្រពន្ធខ្លះ ដើម្បីមានឱកាសពង្រឹងការហ្វឹក-ហាត់ឲ្យបានពេញលេញ ដើម្បីឡើងប្រកួតឲ្យបានល្អឡើងវិញ ព្រោះសង្វៀនប្រដាល់មួយចំនួន បានកក់ ខ្ញុំរួចហើយ សម្រាប់ការប្រកួតក្នុងព្រឹត្តិការណ៍មួយចំនួន ហេតុនេះខ្ញុំត្រូវប្រឹងឡើងវិញឲ្យខ្លាំង»។
ម្ចាស់ខ្សែក្រវាត់ ៣ ស្ថាប័នរូបនេះ បានបន្ថែមថា៖ «មុខរបរជាអ្នកប្រដាល់នេះ គឺបានជួយរូបខ្ញុំឲ្យទទួលបានជីវភាពល្អមួយកម្រិតជាងមុនដែរ ប៉ុន្តែបញ្ហាទុក្ខធុរៈក្នុងក្រុមគ្រួសារក៏បានធ្វើឲ្យសមត្ថភាពវិជ្ជាគុនធ្លាក់ចុះ ដោយសារយើងហាត់មិនបានដិតដល់ ដែលធ្វើឲ្យការប្រកួតពេលខ្លះមិនទទួលបានជ័យជម្នះនោះ នាំឲ្យសេវាទីផ្សារប្រកួត គេមិនសូវផ្តល់ឲ្យយើងបានប្រកួតញឹកញាប់»។
កីឡាករកម្ពស់ ១,៦៥ ម៉ែត្រ មានស្រុកកំណើត នៅភូមិស្វាយចង្វាយ ឃុំឫស្សីសាញ់ ស្រុកស៊ីធរកណ្តាល ខេត្តព្រៃវែង ផាន់ គ្រាន់ បានបញ្ជាក់ថា៖ «យ៉ាងណាក៏ដោយ ខ្ញុំប្តេជ្ញាថា នឹងវ៉ៃឲ្យកីឡាករថៃ Phat Ka នេះសន្លប់វិញ ព្រោះគេនឹងដាក់ឲ្យខ្ញុំប្រកួតសងសឹក នៅក្នុងព្រឹត្តិកាណ៍បុណ្យសមុទ្រ លើកទី ៨ នៅខេត្តកំពត នាថ្ងៃទី ២០ ខែ ធ្នូ ឆ្នាំ ២០១៩ ដែលខ្ញុំបានស្នើសុំវ៉ៃទម្ងន់ ៦៧ គីឡូក្រាម»៕
