.jpg)
ផាន់ គ្រាន់ បានព្យាយាមទប់ការទាត់របស់ថៃ Chhuok Chhai ក្នុងការប្រកួតផ្តាច់ព្រ័ត្រ កន្លងមក។ ភ្នំពេញ ប៉ុសិ៍្ត
ភ្នំពេញៈ ម្ចាស់ខ្សែក្រវាត់ ៣ ស្ថាប័ន ផាន់ គ្រាន់ បានសម្រេចចាកចេញពីក្លិបពុទ្ធសេរីវង្ស មករួមរស់ជាមួយក្លិបមិត្តប៉ូលិសនៃសមាគមប្រដាល់ក្រសួងមហាផ្ទៃ ហើយរូបគេបានប្តេជ្ញាចិត្តថា នឹងខំប្រឹងប្រែងសាងភាពល្បីល្បាញ នៅក្នុងក្លិបថ្មីនេះ ដើម្បីឈានទៅរកការមានក្របខ័ណ្ឌជាមន្ត្រីប៉ូលិសម្នាក់ ព្រោះមិត្តរួមអាជីពមួយចំនួន ដែលមានត្រឹមខ្សែក្រវាត់ ១ ឬ ២ នោះ គឺពួកគេបានទទួលក្របខ័ណ្ឌជាប៉ូលីស និងទាហាន អស់ហើយ ហេតុនេះ ផាន់ គ្រាន់ មានមហិច្ឆតាចង់បានដូចមិត្តភក្តិដែរ។
ការចូលប្រឡូកក្នុងវិស័យប្រដាល់ចំនួន ៨ ឆ្នាំមកនេះ អ្នកប្រដាល់ចិត្តធំ ផាន់ គ្រាន់ ទទួលបានលទ្ធផលល្អគួរឲ្យកត់សម្គាល់ គឺឈ្នះបានខ្សែក្រវាត់ ៣ ស្ថាប័ន គឺខ្សែក្រវាត់គូបូតា ទម្ងន់ ៦៣,៥ គីឡូក្រាម នៅសង្វៀនបាយ័ន ខ្សែក្រវាត់ខារ៉ាបាវ ទម្ងន់ ៦៣,៥ គ.ក្រ និងខ្សែក្រវាត់ Barrley Black ទម្ងន់៦៥ គ.ក្រ នៅលើសង្វៀន SEATV ហើយ ផាន់ គ្រាន់ រកបានប្រាក់ចំណូលពីការប្រកួតនៅលើសង្វៀន មកជួយទ្រទ្រង់ជីវភាពគ្រួសារ និងឪពុកម្តាយចាស់ជរា ព្រមទាំងចិញ្ចឹមក្មួយៗពិការមួយចំនួនថែមទៀតផង។
កីឡាករមានស្រុកកំណើត នៅភូមិស្វាយចង្វាយ ឃុំឫស្សីសាញ់ ស្រុកស៊ីធរកណ្តាល ខេត្តព្រៃវែង ផាន់ គ្រាន់ បានប្រាប់ភ្នំពេញ ប៉ុស្តិ៍ ថា៖ «ខ្ញុំសម្រេចចិត្តប្តូរក្លិបពីពុទ្ធសេរីវង្ស មកនៅក្លិបមិត្តប៉ូលិស គឺខ្ញុំចង់ឡើងប្រកួតយកឈ្នះសាងភាពល្បីល្បាញ និងដណ្តើមយកជើងឯកមេដាយមាស ដើម្បីខ្ញុំអាចសុំបានក្របខ័ណ្ឌប៉ូលិស ដូចកីឡាករមួយចំនួនទៀត»។
បច្ចុប្បន្ន ផាន់ គ្រាន់ ជាកីឡាករល្បីលំដាប់ជួរមុខ មួយរូបនៅកម្ពុជា ដែលមានតម្លៃខ្លួនប្រកួត ១ លើកៗឡើងដល់ជាង ៤០០ ដុល្លារ។ ផាន់ គ្រាន់ បានរៀបការរួចហើយ កាលពីក្រោយចូលឆ្នាំខ្មែរ ប៉ុន្តែអ្វីដែលរូបគេ នៅតែទទួលបន្ទុកធ្ងន់នោះ គឺការមើលថែទាំឪពុកម្តាយចាស់ជរាមានជំងឺ ហើយក្តីស្រមៃរបស់គេ គឺចង់មានក្របខ័ណ្ឌជាមន្ត្រី ក្នុងរាជរដ្ឋាភិបាលមានប្រាក់ខែ ខណៈដែលមិត្តរួមអាជីពមួយចំនួនល្បីៗទទួលបានអស់ហើយ។
ផាន់ គ្រាន់ បានបន្ថែមថា៖ «ខ្ញុំមានខ្សែក្រវាត់ ៣ តែមិនទាន់រកក្របខ័ណ្ឌបាននៅឡើយហើយមិត្តភក្តិមួយចំនួន ដែលមានត្រឹមខ្សែក្រវាត់ ១ ឬ ២ ដូចជាកីឡាករ ម៉ន សាម៉េត,ឌុម កែវដា,មុត ខ្លឹមខ្មៅ និង សូត្រ ប៊ុនធី ជាដើម គឺពួកគេទទួលបានក្របខ័ណ្ឌអស់ហើយ អ៊ីចឹងហើយទើបខ្ញុំបានផ្លាស់មកនៅសមាគមប្រដាល់ក្រសួងមហាផ្ទៃ ក្រោមការគ្រប់គ្រងរបស់លោក ម៉ក់ សំអុល ជាប្រធាន និងមានលោកគ្រូ គង់ ចាន់ធីណា ព្រមទាំងលោកគ្រូ ឈិន ក្វាន់ចៃ ជាគ្រូបង្វឹក»។
កីឡាករវ័យ ២៤ ឆ្នាំ ផាន់ គ្រាន់ បានបញ្ជាក់ថា៖ «ខ្ញុំមានឪពុកចាស់ អាយុ ៦៨ ឆ្នាំ មានជំងឺប្រចាំកាយ ហើយខ្ញុំបាននាំគាត់ចូលពេទ្យរុស្ស៊ី ប៉ុន្តែខ្ញុំនៅតែឆ្លៀតពេលហ្វឹកហាត់ជាប្រចាំ ដើម្បីប្រកួតឲ្យបានល្អ។ ទោះជាចាញ់ ឬឈ្នះ ខ្ញុំមិនងាយសន្លប់នោះទេ ហើយនៅថ្ងៃអាទិត្យ ចុងសប្តាហ៍នេះ ខ្ញុំនឹងត្រូវប្រកួតឲ្យក្លិបថ្មីរបស់ខ្ញុំ ដោយលោកគ្រូបានចាប់គូឲ្យប្រកួតជាមួយកីឡាករជើងខ្លាំងរបស់ថៃ Sen Khoum ក្នុងទម្ងន់ ៦៥ គីឡូក្រាម នៅសង្វៀន Sky One»។
ផាន់ គ្រាន់ មានបងប្អូនបង្កើត ៨ នាក់ ស្លាប់អស់ ២ នាក់ ហើយគេជាកូនប្រុសពៅ ដែលត្រូវរ៉ាប់រងជីវភាពទាំងស្រុង។ គ្រាន់ បានចូលហាត់ប្រដាល់ ក្នុងឆ្នាំ ២០១២ នៅក្លិបគុជសារកីឡាជាមួយគ្រូ ផាន់ ផាណាត ប៉ុន្តែក្រោយពេលលោកគ្រូឈឺស្លាប់ ត្រូវតែលតោលគ្មានគោលដៅ ហ្វឹកហាត់ខ្លួនឯង ឡើងប្រកួតមិនសូវបានលទ្ធផលល្អទេ។ បន្ទាប់មកគេបានផ្លាស់មកនៅក្លិបពុទ្ធសេរីវង្ស ដោយហាត់ជាមួយលោកគ្រូ ណន រិទ្ធ និងទទួលបានលទ្ធផលល្អវិញ ដែលធ្វើឲ្យការប្រកួតសរុប ១២៥ ដង របស់កីឡាករមានកម្ពស់ ១,៦៥ ម៉ែត្ររូបនេះ គឺបានឈ្នះ ៩០ ចាញ់ ៣០ និងស្មើ ៥ ដង៕
