ភ្នំពេញ៖ អ្នកប្រដាល់ ផាន់ គ្រាន់ របស់ក្លិបមកុដរាជសីហ៍ ដែលបានឃ្លាតពីសង្វៀនយូរនោះ គឺមានការនឹករឭកមុខរបរឈឺសាច់នេះ ហើយបានចូលខ្លួនមកហ្វឹកហាត់ ដើម្បីចូលរួមប្រកួតម៉ារ៉ាតុងដណ្តើមប្រាក់លានទម្ងន់ ៧០ គីឡូក្រាម ជាមួយជើងខ្លាំង ៣ ក់ទៀត មាន ឡុង សុភី, មាជ សុខរ៉ា និង រិទ្ធ ភូលូ ដើម្បីស្វែងរកអ្នកបានប្រាក់រង្វាន់ប្រចាំសប្តាហ៍ទី៦៦ របស់សង្វៀនថោន នាថ្ងៃអាទិត្យ ខាងមុខនេះ។
សមត្ថភាពរបស់ ផាន់ គ្រាន់ ធ្លាប់បានឈានដល់លំដាប់កំពូលក្នុងឆ្នាំ ២០១៧ ដោយឈ្នះខ្សែក្រវាត់ចំនួន ៣ និងពានរង្វាន់ដទៃទៀត ទទួលបានប្រាក់ជួយគ្រួសារទៀតផង ប៉ុន្តែមួយរយៈនេះ ការបាត់មុខរបស់ ផាន់ គ្រាន់ ពីសង្វៀន និងការផ្លាស់ប្តូរក្លិបធ្វើឱ្យការប្រកួតរបស់គេ មិនសូវបានលទ្ធផលល្អ ដោយជាង ១ ឆ្នាំនេះ ប្រកួតបានតែ ៣ លើកនិងរកមិនឃើញជ័យជម្នះសោះ។
ចំណែកការវិលមកប្រកួតជាថ្មីក្នុងកម្មវិធីប្រាក់លាន ជាមួយជើងចាស់ខ្លាំងៗនេះ ផាន់ គ្រាន់ និយាយថា៖ «ខ្ញុំនៅតែស្រឡាញ់ និងនឹកសង្វៀនប្រដាល់ ព្រោះមុខរបរមួយនេះ ធ្លាប់ធ្វើឱ្យខ្ញុំរកប្រាក់បានជួយឪពុកម្តាយ និងគ្រួសារ ហើយការវិលមកវិញនេះ ខ្ញុំនៅតែមានទំនុកចិត្តឈ្នះ ៥០ ភាគរយ ទោះបីពួកគាត់ជាជើងចាស់ខ្លាំង និងមិនដែលប្រកួតជាមួយគ្នាក៏ដោយ។ ខ្ញុំហាត់បាន ២ សប្តាហ៍ជាប់គ្នា ហើយសុខភាពល្អ កម្លាំងល្អ ត្រៀមល្អ ហើយសម្រាប់ ឡុង សុភី, មាជ សុខរ៉ា និង រិទ្ធ ភូលូ ខ្ញុំគិតថា ពិតជាតឹងតែង និងលំបាកឈ្នះមែន ប៉ុន្តែចិត្តជាអ្នកកីឡា ឡើងប្រកួតមិនញញើតដៃគូទេ»។
នៅពេលសួរពីមូលហេតុនាំឱ្យបាត់មុខពីសង្វៀនយូរ ផាន់ គ្រាន់ បានឆ្លើយតបថា៖ «មកពីខ្ញុំមិនសូវបានហាត់ ដោយសារឪពុកឈឺ បន្ទាប់មកគាត់ស្លាប់ ហើយខ្ញុំរវល់ការងាររកស៊ីជាមួយប្រពន្ធ ដោយលក់សាច់កាប់ នៅផ្សារឈូកវ៉ាខាងលិចឆៀងខាងជើងពោធិ៍ចិនតុង ហេតុនេះឡើងប្រកួតមិនសូវទទួលផលល្អ គឺប្រហែល ១ ឆ្នាំនេះ ខ្ញុំប្រកួតបាន ៣ ដង ដោយចាញ់ ២ និងស្មើ ១»។
ចំណែក នី សុភី (ឡុង សុភី) បន្ទាប់ពីផ្លាស់មកនៅក្លិបកុលបុត្រគុនខ្មែរ មួយរយៈចុងក្រោយនេះ ហាក់ដូចជាមិនសូវឡើងសង្វៀនដែរ ហើយការប្រកួតរបស់គេលំបាករកដៃគូឱ្យមានសមត្ថភាពប៉ុនគ្នាណាស់ ព្រោះមានកម្ពស់ខ្ពស់បទពិសោធច្រើន ដែលនាំឱ្យប្រិយភាពធ្លាក់ចុះមួយកម្រិតផងដែរ។
ឡុង សុភី បាននិយាយថា៖ «ខ្ញុំឡើងទៅដឹងតែវ៉ៃ ប៉ុន្តែការសង្ឃឹមឈ្នះមុន ខ្ញុំមិនដែលរំពឹងលើសពី ៥០ ភាគរយទេ ទោះបីប្រកួតជាមួយជើងខ្លាំង ឬជើងខ្សោយ ឬប្រកួតអន្តរជាតិណាក៏ដោយ។ ចំពោះបេក្ខភាពទាំង ៣ នាក់នេះ ខ្ញុំប៉ះមួយណាក៏បាន ព្រោះសង្ឃឹមថា គ្មានឧបសគ្គធំទេ ប៉ុន្តែខ្ញុំក៏មិនសូវបានហាត់ គឺមិនហ៊ានអួតទេ វ៉ៃទម្ងន់ធ្ងន់ ចូលចំកន្លែងយ៉ាប់ដែរ»។
ចំណែក រិទ្ធ ភូលូ និង មាជ សុខរ៉ា សុទ្ធតែមិនសង្ឃឹមច្រើន ប៉ុន្តែធានាវ៉ៃអស់ពីសមត្ថភាព ឯបញ្ហាឈ្នះ ឬចាញ់មិនហ៊ាននិយាយមុនឡើយ។ រីឯលោក ជួប វុត្ថា អ្នកផ្គូផ្គងប្រចាំសង្វៀនថោននិយាយថា៖«តាមខ្ញុំជួបសម្ភាសក្នុងពេលផ្គូផ្គង គឺ ឡុង សុភី មានឈ្មោះល្បី ប៉ុន្តែការហ្វឹកហាត់ និងប្រកួតមួយរយៈនេះ មិនញឹកញាប់ ផ្ទុយពី មាជ សុខរ៉ា និង រិទ្ធ ភូលូ ប្រកួតញឹកញាប់ និងវ៉ៃហ៊ានប្តូរ អ៊ីចឹងមិនអាចកំណត់មុនបានឡើយ»៕