.jpg)
សំណង់នៃពហុកីឡដ្ឋានជាតិមរតកតេជោដែលឈានដល់ការសាងសង់ដំណាក់កាលទី ២ គឺដំឡើងកៅអីក្នុងពហុកីឡដ្ឋានធំ។ សហការី
ភ្នំពេញៈ ពហុកីឡដ្ឋានជាតិមរតកតេជោដែលជាសំណង់កីឡាទំនើបមួយទទួលបានជំនួយឥតសំណងពីប្រទេសចិនក្នុងគម្រោងទឹកប្រាក់ជិត ១៦០ លានដុល្លារនោះបានសាងសង់ និងប្រើប្រាស់ជាបណ្តើរៗហើយក្នុងនោះការសាងសង់ត្រូវបានបែងចែកជា ៣ ដំណាក់កាលធំៗព្រមទាំងដាក់ឲ្យប្រើប្រាស់នូវទីតាំងដែលបានសាងសង់រួចជាស្ថាពរ ហើយគិតត្រឹមពេលនេះទទួលបាន ៤០ ភាគរយនៃសំណង់ពហុកីឡដ្ឋានជាតិទាំងមូលដែលកំពុងសាងសង់ត្រៀមធ្វើម្ចាស់ផ្ទះការប្រកួតស៊ីហ្គេម ឆ្នាំ ២០២៣។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃពុធម្សិលមិញបានដឹកនាំប្រតិភូមួយក្រុមរួមជាមួយគណៈកម្មការសាងសង់ និងក្រុមវិស្វករចិន ដើម្បីរៀបចំពិធីសម្ពោធការដំឡើងកៅអីអង្គុយក្នុងពហុកីឡដ្ឋានជាតិមរតកតេជោ ដែលជាការសាងសង់ដំណាក់កាលទី ២។
នៅក្នុងពិធីនោះលោក ថោង ខុន បានថ្លែងថា៖ «តាំងពីការចាប់ផ្តើមសាងសង់បាន ១៦ ខែគឺនេះជាដំណាក់កាល ១ ទៀតដែលក្រុមហ៊ុនសាងសង់ និងតំណាងក្រសួងពាណិជ្ជកម្មចិនបានរៀបចំពិធីអបអរសាទរការផ្គុំកៅអីដើម្បីជានិមិត្តរូបនៃការលេចចេញរូបរាងរបស់ពហុកីឡដ្ឋានធំមរតកតេជោតែម្តង ចំណែកការសាងសងទាំងមូលបាន ៤០ ភាគរយហើយ ហើយស្តាតធំនេះនឹងបញ្ចប់ចុងឆ្នាំ ២០២០»។
គួររំឭកថាពហុកីឡដ្ឋានជាតិមរតកតេជោនេះបានអនុម័តឲ្យសាងសង់តាំងពីថ្ងៃទី ២០ ខែមេសា ឆ្នាំ ២០១៦ ដែលចែកចេញជា ៣ ដំណាក់កាលហើយការកសាងដំណាក់កាលទី ២ នេះគឺបន្ទាប់ពីដំណាក់កាលទី ១ ដែលមានទីលានហែលទឹក និងទីលានកីឡាក្នុងសាលព្រមទាំងអគារស្នាក់នៅរបស់កីឡាករ កីឡាការិនី បានកសាងរួច និងបានបញ្ចប់កាលពីឆ្នាំ ២០១៧។
តាមការគ្រោងទុកការកសាងពហុកីឡដ្ឋានជាតិមរតកតេជោដំណាក់កាលទី ២ នេះនឹងប្រើពេល ៣ ឆ្នាំកន្លះ ទើបរួចរាល់ជាស្ថាពរ ហើយបន្ទាប់ពីចប់ដំណាក់កាលទី ២ នឹងបន្តដំណាក់កាលទី ៣ ដែលផ្តោតទៅលើទីលានកីឡាផ្សេងៗទៀតដែលនៅសេសសល់ដោយគ្រោងបញ្ចប់នៅចុងឆ្នាំ ២០២០។
លោក វ៉ាត់ ចំរើន អគ្គលេខាធិការ NOCC បានឲ្យដឹងថា៖ «ពហុកីឡដ្ឋានជាតិមរតកតេជោចាប់ផ្តើមរៀបចំដាក់កៅអីអង្គុយហើយគឺជាដំណាក់កាលទី ២ ដែលមានការត្រួតពិនិត្យក្នុងពិធីដើម្បីដាក់កៅអីជានិមិត្តរូបនៃពហុកីឡដ្ឋានជាតិមរតកតេជោ (Main Stadium) ដោយអាចផ្ទុកមនុស្សបានដល់ជាង ៦ ម៉ឺននាក់ឯណោះ ហើយលក្ខណពិសេសគឺបើមានករណីចាំបាច់ ឬគ្រោះអាសន្នណាមួយនោះ ពហុកីឡដ្ឋាននេះអាចជម្លៀសអ្នកចូលរួមទាំងនោះត្រឹមរយៈពេលខ្លី ៧ នាទីប៉ុណ្ណោះ»។
ទាក់ទងទៅនឹងការដំឡើងកៅអីនេះដែរក្រុមវិស្វករចិនបានអះអាងថាការផ្គុំកៅអីទាំងអស់មានចំនួនជាង ៧ ពាន់ហើយការដំឡើងផ្គុំកៅអីនីមួយៗមានភាពលម្អៀង បូក ឬដក ២ សង់ទីម៉ែត្រប៉ុណ្ណោះគឺការសាងសង់មានការយកចិត្តទុកដាក់ខ្លាំងបំផុត ពិសេសការផ្គុំកៅអីនេះមានសភាពរលោង រចនាឡើងជាមួយបច្ចេកវិទ្យាទំនើបចុងក្រោយរបស់ចិន និងមានបំពាក់ QR កូដ ដើម្បីត្រួតពិនិត្យពីគុណភាពកៅអីទៀតផង។
លោក ថោង ខុន បានថ្លែងបន្ថែមថា៖ «ពហុកីឡដ្ឋានជាតិមរតកតេជោដែលកំពុងសាងសង់ត្រៀមធ្វើម្ចាស់ផ្ទះការប្រកួតកីឡាអាស៊ីអាគ្នេយ៍ ឬ Sea Games លើកទី ៣២ ឆ្នាំ ២០២៣ ហើយហេដ្ឋារចនាសម្ព័ន្ធរបស់ពហុកីឡដ្ឋាននេះមានកម្រិតស្តង់ដារទំនើបប្រើប្រាស់ដោយមធ្យោបាយបច្ចេកទេសខ្ពស់មានផាសុកភាពព្រមទាំងជាតំបន់កីឡដ្ឋានមានបរិស្ថានពណ៌បៃតងផងដែរ ហើយតាងនាមរាជរដ្ឋាភិបាល ខ្ញុំសូមថ្លែងអំណរគុណ និងសូមកោតសរសើរចំពោះការសាងសង់ប្រកបដោយការទទួលខុសត្រូវខ្ពស់របស់មិត្តចិន»៕
