ភ្នំពេញ៖ ការប្រកួតបាល់ទាត់ពានរង្វាន់ពាក់កណ្តាលអាជីពធំជាងគេនៅកម្ពុជា KMH ដែលមានព្រឹត្តិការណ៍ ៣ រួមបញ្ចូលគ្នា គឺ KMH Champions League, KMH Cup និង KMH Super Cup នោះ បានប្រកាសពីការត្រៀមបើករដូវកាលថ្មី ឆ្នាំ ២០១៩-២០២០ របស់ខ្លួនជាផ្លូវការហើយ ខណៈរូបមន្តប្រកួតត្រូវបានកែប្រែ ដើម្បីកាត់បន្ថយរយៈពេលនៃការប្រកួតឲ្យកាន់តែខ្លី និងកាន់តែទាក់ទាញ។
តាមខ្លឹមសារដែលត្រូវបានលើកឡើង នៅក្នុងសន្និសីទកាសែត កាលពីថ្ងៃសៅរ៍បានឲ្យដឹងថា ការប្រកួតពានធំ KMH Champions League នឹងមាន ៣២ ក្រុមឲ្យចូលរួមការប្រកួត ដូចរដូវកាលមុនដែរ ដោយចែកការប្រកួតជា ៨ ពូល ប៉ុន្តែក្នុងវគ្គជម្រុះតាមពូលវគ្គទី ១ ដែលធ្លាប់ធ្វើ ២ ជើងនោះ ត្រូវប្តូរមកធ្វើត្រឹម ១ ជើងវិញ។
ចំណែកក្រុមបានលេខ ១ និងលេខ ២ តាមពូលទាំង ៨ សរុប ១៦ ក្រុម នឹងត្រូវឡើងទៅប្រកួតវគ្គទី ២ ដោយចែកការប្រកួតជា ៤ ពូល ដោយលេង ២ ជើង រួចយកក្រុមលេខ ១ និងលេខ ២ តាមពូលទាំង ៤ សរុប ៨ក្រុម ឡើងទៅប្រកួត ២ ជើង ក្នុងវគ្គទី ៣ តាមរូបមន្តចាញ់ធ្លាក់ៗ ហើយក្រុមឈ្នះ ត្រូវឡើងទៅប្រកួតវគ្គពាក់កណ្តាលផ្តាច់ព្រ័ត្រ (លេង ២ ជើង) និងវគ្គផ្តាច់ព្រ័ត្រ (លេង ១ ជើង) ដើម្បីស្វែងរកក្រុមម្ចាស់ជើងឯក ខណៈពាននេះនឹងចាប់ផ្តើមលេងពីថ្ងៃទី ១១ ខែមករា ដល់ថ្ងៃទី ២៣ ខែឧសភា ឆ្នាំ ២០២០។
ចំណែកពាន KMH Super Cup គ្រោងនឹងចាប់ផ្តើមការប្រកួតមុនគេ គឺពីថ្ងៃទី ២២ ខែ វិច្ឆិកា ដល់ថ្ងៃទី ១៥ ខែ ធ្នូ ឆ្នាំ ២០១៩ ហើយពានមួយនេះ មានការប្រកួតប្រជែងខ្ពស់ ដោយសារក្រុមចំនួន ១០ ដែលនឹងត្រូវចូលរួម គឺសុទ្ធតែក្រុមជើងឯក មកពីតាមបណ្តាពានក្នុងស្រុក និងក្រុម All Stars ចម្រុះដោយជនបរទេសរស់នៅកម្ពុជា។
ចំណែករូបមន្ត គឺក្រុមទាំង ១០ នេះ នឹងបែងចែកជា ២ ពូល រួចយកលេខ ១ និងលេខ ២ តាមពូលទាំង ២ ទៅប្រកួត ខ្វែង យកក្រុមឈ្នះឡើងទៅវគ្គផ្ដាច់ព្រ័ត្រ។
ដោយឡែកសម្រាប់ពាន KMH Cup ដែលជាពានសម្រាប់ក្រុមយុវជននេះ ក៏គ្រោងយក ១០ ក្រុមឲ្យចូលរួមផងដែរ។ ក្រុមទាំង ១០ នោះ នឹងត្រូវចែកជា ២ ពូល ដោយលេង ២ ជើង ហើយក្រុមបានលេខ ១ និងលេខ ២ តាមពូលទាំង ២ ត្រូវឡើងទៅប្រកួតគ្នា ២ ជើង នៅវគ្គពាក់កណ្តាលផ្តាច់ព្រ័ត្រ និងឈានទៅផ្តាច់ព្រ័ត្រ (លេង ១ ជើង) ខណៈពាននេះ នឹងចាប់ប្រកួតពីថ្ងៃទី ១ ខែ កុម្ភៈ និងគ្រោងបញ្ចប់នៅថ្ងៃទី ១៧ ខែ ឧសភា ឆ្នាំ ២០២០។
ទាក់ទងទៅនឹងការប្រកួតនេះ លោក កាំង សេន ស្ថាបនិកពាន KMH បានថ្លែងថា៖ «ដោយសារតែពេលវេលានៃការប្រកួតមានរយៈពេលខ្លីជាងមុន អ៊ីចឹងការប្រកួត នឹងកាន់តែមានភាពស្វិតស្វាញ ហើយក្រុមការងាររបស់យើងទាំងអស់ អាចសន្យាយ៉ាងមោះមុតថា គុណភាពយើងនៅតែរក្សាដដែល គឺការប្រកួតប្រជែង ឬការរៀបចំនៅតែធានាថា មានគុណភាពល្អ ព្រោះក្រុមដែលចូលរួម មានសមត្ថភាពកាន់តែឡើង ហើយសមត្ថភាពនៃការរៀបចំពានរបស់យើងក៏កាន់តែខ្ពស់ ហេតុនេះគុណភាពនៃការប្រកួតមិនធ្លាក់ចុះទេ គឺមានតែកើនឡើង»។
សម្រាប់ការប្រកួតដែលមានការឧបត្ថម្ភធំដោយក្រុមហ៊ុន ISI Palm និង Pisnoka នេះ គឺក្រុមម្ចាស់ជើងឯកពាន KMH Champions League នឹងបាន ១ ម៉ឺនដុល្លារ លេខ ២ បាន ៥ ពាន់ដុល្លារ លេខ ៣ បាន ២ ៥០០ ដុល្លារ លេខ ៤ បាន ៧៥០ ដុល្លារ។
ឯពាន KMH Cup និងពាន KMH Super Cup មានប្រាក់រង្វាន់ដូចគ្នា គឺលេខ ១ បាន ៤ ពាន់ដុល្លារ លេខ ២ បាន ២ ពាន់ដុល្លារ លេខ ៣ បាន ១ ពាន់ដុល្លារ លេខ ៤ បាន ៥០០ ដុល្លារ ព្រមទាំងប្រាក់រង្វាន់សម្រាប់ក្រុម Fair play អ្នកស៊ុតបាល់បញ្ចូលទីច្រើនជាងគេ និងអ្នកចាំទីល្អជាងគេប្រចាំពាននីមួយៗផងដែរ៕