ភ្នំពេញ៖ ព្រឹត្តិការណ៍បាល់ទាត់កុមារា កុមារី AIA-ISF Youth League ឆ្នាំ ២០១៨-២០១៩ នៃអង្គការផ្កាយសមុទ្រ (ISF) លើទីលានវាលស្មៅនៅឯឃុំព្រះធាតុ ស្រុកកណ្តាលស្ទឹង ខេត្តកណ្តាល បានបិទបញ្ចប់ កាលពីល្ងាចថ្ងៃអាទិត្យ បន្ទាប់ពីចំណាយពេលពេញមួយរដូវកាល រយៈពេលជិត៦ខែកន្លងមក និងមានក្រុមចំនួន១០០ បានចូលរួមប្រកួតប្រជែងគ្នា។
ទាក់ទងនឹងការប្រកួតនេះ លោក យិន សាមឌី មន្ត្រីសម្របសម្រួល និងទំនាក់ទំនងព័ត៌មាននៃអង្គការផ្កាយសមុទ្រ បានប្រាប់ភ្នំពេញ ប៉ុស្តិ៍ថា៖ «អង្គការផ្កាយសមុទ្រ ដែលផ្តោតសកម្មភាពអប់រំកាយ និងកីឡាបាល់ទាត់ សម្រាប់ក្មេងៗ គ្មានទីពឹង ដោយសហការជាមួយដៃគូនៃសមាគមអង្គការផ្សេងទៀត មានសាលារៀនរដ្ឋ និងសាលាឯកជននោះ បានប្រមូលផ្តុំកុមារាកុមារី ឲ្យចូលមកហ្វឹកហាត់កីឡា ក្នុងគោលបំណងតម្រង់ទិសឲ្យពួកគេ បានទៅចាប់យកវិជ្ជាជីវៈបាល់ទាត់ជាអាជីព»។
គួរបញ្ជាក់ថា ការប្រកួតបាល់ទាត់ AIA-ISF Youth League ឆ្នាំ ២០១៨-២០១៩ ត្រូវបានធ្វើឡើង ក្រោមការឧបត្ថម្ភទាំងស្រុងពីក្រុមហ៊ុនធានារ៉ាប់រង AIA នោះ ហើយព្រឹត្តិការណ៍នេះ បានចាប់ផ្តើមប្រកួតជម្រុះ តាំងពីខែធ្នូ ឆ្នាំ២០១៨ ដោយមានក្រុមចូលរួមចំនួន១០០។ ក្រុមទាំងនោះ ត្រូវបានបែងចែកការប្រកួត ទៅតាមប្រភេទអាយុ ដែលសរុបមានអត្តពលិក១៥០០នាក់ មកពីអង្គការសាលារៀនជាដៃគូរបស់ ISF នៅរាជធានីភ្នំពេញ និងខេត្តមួយចំនួន។
តាមរយៈការប្រកួតជាច្រើនខែមកនេះ គណៈកម្មការ បានជម្រុះរកឃើញក្រុមខ្លាំងចំនួន២០ ឡើងមកប្រកួតផ្តាច់ព្រ័ត្រ កាលពីថ្ងៃអាទិត្យ កន្លងមកនេះ ហើយជាលទ្ធផល ក្រុម Chratok FC បានយកឈ្នះក្រុម COLT ៤-១ ដើម្បីក្លាយជាម្ចាស់ជើងឯក លើការប្រកួតអាយុក្រោម១៤ឆ្នាំ។
ចំណែក ក្រុមមកពីអង្គការ PSE បានឈ្នះក្រុម ISF SMC ក្នុងពិន្ទុ ៣-២ ដើម្បីទទួលបានចំណាត់ថ្នាក់លេខ១ ផ្នែកកុមារាអាយុ១៨ឆ្នាំចុះ។ រីឯចំណាត់ថ្នាក់លេខ១ផ្នែកកុមារីអាយុក្រោម១៨ឆ្នាំ បានទៅលើក្រុម Chibodia ក្រោយពួកគេបានឈ្នះក្រុម Hapychandara ២-១ ហើយក្រុម PSE បានឈ្នះក្រុម Samrong Priry school ៦-១ ដើម្បីក្លាយជាម្ចាសដ់ជើងឯកផ្នែកកុមារីអាយុ១៤ឆ្នាំ។
យ៉ាងណាក៏ដោយ លោក យិន សាមឌី ដែលជាអ្នកគ្រប់គ្រងកម្មវិធីប្រកួតផងនោះ បានលើកឡើងថា ការប្រកួតនេះ មិនផ្តោតសំខាន់ទៅលើលទ្ធផលប៉ុន្មានទេ។ លោកបានបញ្ជាក់ថា៖«ការប្រកួតនេះ ជាលក្ខណៈបណ្តុះបណ្តាល និងអប់រំ មិនមែនសម្រួចខ្លាំងទៅលើចំណាត់ថ្នាក់នោះឡើយ ហើយក៏គ្មានប្រាក់រង្វាន់អ្វីដែរ គឺមានតែសម្ភារៈកីឡា លើកទឹកចិត្ត ដល់ពួកគេ»។
ចំណែកនាយិការ ជួប វិច្ឆិកា អ្នកគ្រប់គ្រងរួមនៃកម្មវិធីអង្គការផ្កាយសមុទ្រ បានប្រាប់ថាអង្គការផ្កាយសមុទ្រ ISF បានចាប់ផ្តើមធ្វើសកម្មភាពតាំងពីឆ្នាំ ២០០៦ ក្នុងរូបភាពតូចតាច ប៉ុន្តែមកដល់បច្ចុប្បន្ន អង្គការទទួលបានការគាំទ្រខ្លាំង ពីថ្នាក់ជាតិ និងអន្តរជាតិ ក្នុងការស្វែងរកដៃគូឧបត្ថម្ភថវិកា សម្រាប់ដំណើរការបានពេញលេញក្នុងរដូវកាលនេះ។
ជួប វិច្ឆិកា បានបន្ថែមថា៖ «ជាមួយគ្នានេះ អង្គការបានផ្តល់ឲ្យកុមារា កុមារី ដែលក្រីក្រគ្មានទីពឹង មានលទ្ធភាពចូលសាលារៀន និងទទួលឱកាសបានចូលលេងបាល់ទាត់ ដើម្បីតម្រង់ទិសឲ្យពួកគាត់ ឈានទៅកាន់អ្នកលេងជាលក្ខណៈអាជីព ហើយឆ្នាំនេះ យើងបានផ្តល់ជូននូវការបណ្តុះបណ្តាលអប់រំបាល់ទាត់ផ្ទាល់ ដល់កុមារាកុមារី បានចំនួន៣០០០នាក់ និងផ្តល់ជូនជាប្រយោលចំនួន២០០០នាក់»។
ជាមួយគ្នានេះ លោក បញ្ញា តំណាងក្រុមហ៊ុនធានារ៉ាប់រង AIA បាននិយាយថា៖ «ព្រឹត្តិការណ៍បាល់ទាត់AIA-ISF Youth League ឈ្នះ២០១៨-២០១៩នេះ គឺជាការតម្រង់ឧបនិស្ស័យរបស់ក្មេងៗ ដើម្បីជួយឲ្យពួកគេ អាចចាប់យកជំនាញបាល់ទាត់។ ក្នុងនោះដែរខាងក្រុមហ៊ុន មានទស្សនៈវិស័យផ្តោតទៅលើកុមារ និងជួយទៅលើកីឡាកម្រិតថ្នាល ដែលមិនមែនអាជីព ហើយជានិច្ចកាល AIA នៅតែមានសកម្មភាពក្នុងព្រឹត្តិការណ៍លក្ខណៈមហាជន មិនមែនអាជីព ដែលមានការចូលរួមច្រើន»៕