ភ្នំពេញ៖ ព្រឹត្តិការណ៍ប្រកួតប្រដាល់គុនខ្មែរដណ្ដើមខ្សែក្រវាត់ TV5 Boxing Knock-Out Serie រដូវកាលថ្មីនឹងចាប់ផ្តើមនៅថ្ងៃសៅរ៍ចុងសប្តាហ៍នេះ ដោយគ្រោងធ្វើរយៈពេល ១៨ សប្តាហ៍ ហើយត្រូវដំឡើងប្រភេទទម្ងន់ដល់ ៦៣,៥ គីឡូក្រាម ប៉ុន្តែអ្នករៀបចំកម្មវិធីមិនទាន់ទម្លាយសមាសភាពកីឡាករទាំង ៣២ នាក់ នៅឡើយទេ ដោយសារតែលំបាកស្វែងរកកីឡាករមកពីក្លិបផ្សេងៗ នៅទូទាំងប្រទេស កម្ពុជា ឲ្យគ្រប់តាមការកំណត់ចំនួន ៣២ នាក់។
មន្ត្រីសហព័ន្ធកីឡាប្រដាល់គុនខ្មែរ ដែលកាន់កម្មវិធីប្រចាំសប្តាហ៍ លោក និន វ៉ាន់ដា បានប្រាប់កាលពីរសៀលថ្ងៃពុធថា៖ «គិតមកដល់ម៉ោងនេះ ខាងសង្វៀន TV5 Boxing Knock Out Serie មិនទាន់មានសមាសភាពកីឡាករត្រៀមចំនួន ៣២ នាក់នេះ ដូចរដូវកាលមុនៗនៅឡើយ ព្រោះអាចមកពីខ្វះកីឡាករ ចំណែករូបមន្ដប្រកួតគឺធ្វើដូចលើកមុនៗដែរ»។
សម្រាប់ការប្រកួតដណ្តើមពាននេះ បេក្ខភាពទាំង ៣២ នាក់ នឹងត្រូវប្រកួតគ្នា តាមរូបមន្តចាញ់ធ្លាក់ៗ មានន័យថា កីឡាករចាញ់ គឺធ្លាក់ចេញពីការប្រកួត ហើយអ្នកឈ្នះ នឹងឡើងទៅប្រកួតវគ្គ ១៦ នាក់ រួចបន្តយកឈ្នះ ឡើងទៅកាន់វគ្គ ៨ នាក់ ហើយបន្តយកឈ្នះឈ្នះឡើងទៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ ខណៈប្រាក់រង្វាន់ដូចរដូវកាលមុនៗដែរ គឺម្ចាស់ជើងឯក បាន ៤ ០០០ ដុល្លារ។
យ៉ាងណាមិញ សម្រាប់ការប្រកួតជម្រុះសប្តាហ៍ទី ១ នេះ អ្នកប្រដាល់ជម្រើសជាតិថ្នាលចិត្រ សុភី ក្លិបរស្មីភូមិគាបខេត្តបន្ទាយមានជ័យ ត្រូវប្រកួតជាមួយជើងថ្មី នួន រ៉ាថេប ក្លិបតាឯកដំបងដែកមានរិទ្ធ។ សុភី ធ្លាប់ចូលរួមប្រកួតក្នុងព្រឹត្តិការណ៍នេះដែរ ហើយគេឆ្លងផុតបានតែ ១ ជុំប៉ុណ្ណោះ ក៏ត្រូវធ្លាក់ចេញ ប៉ុន្តែការឡើងទម្ងន់មកវ៉ៃជាមួយ រ៉ាថេប គឺអាចនឹងស៊ីផុយ ព្រោះសមត្ថភាពរបស់ ចិត្រ សុភី ល្អជាងដាច់ ព្រោះ នួន រ៉ាថេប ជាអ្នកប្រដាល់ ដែលគ្មានស្នៀតអ្វីច្បាស់លាស់គួរឲ្យខ្លាចដែរ។
លោក ហេង ប៊ុនឃីម គ្រូបង្វឹក ចិត្រ សុភី បានអះអាងថា៖ «ជំនួបវគ្គទី ១ នេះ សង្ឃឹមឈ្នះ ១០០ ភាគរយ បានឡើងទៅវគ្គ»។ សម្រាប់គូជម្រុះដណ្តើមពានទី ២ តម្រូវទៅលើកីឡាករជើងថ្មីខាំ សាបាន ក្លិបរ៉ាហាប់ស្វាយប៉ាក ត្រូវជួប ពុទ្ធ អុំអន់ របស់ក្លិបពុទ្ធសេរីវង្ស ដែលជាជើងថ្មីដូចគ្នា មិនមាននរណាដឹងថា គេមានរបៀបវ៉ៃយ៉ាងណាឡើយ តែពួកគេសុទ្ធតែអះអាងថា នឹងខិតខំឆ្លងឲ្យផុតវគ្គជម្រុះជុំទី ១។
ជាមួយគ្នានេះ គូលំដាប់ឯកប្រចាំសប្តាហ៍ លក្ខណៈអន្តរជាតិ ត្រូវផ្តល់ឲ្យម្ចាស់ខ្សែក្រវាត់មកពីថៃឈ្មោះ យ៉ត ចក្រភព ប៉ះជាមួយ យុគ យក្សផ្លែ ក្នុងទម្ងន់ ៥៧ គីឡូក្រាម។ លោក ឡុង ស៊ីលីន ជាគ្រូបង្វឹកនិយាយថា៖ «យគ្សផ្លែ ទោះបីមិនធ្លាប់ឈ្នះខ្សែក្រវាត់ ប៉ុន្តែស្នៀតកណ្តាប់ដៃ និងបទពិសោធប្រកួតអន្តរជាតិ គឺមានទីផ្សារប្រកួតច្រើន ហើយស្នៀតកណ្តាប់ដៃរបស់គេធ្វើឲ្យមានប្រិយភាពខ្លាំងផងដែរ»។
ទោះបីជាយ៉ាងណា លោក ឡុង ស៊ីលីន មិនទាន់ហ៊ានព្យាករពីលទ្ធផលការប្រកួតទុកមុននោះទេ ព្រោះកីឡាករថៃជាដៃគូរបស់ យក្សផ្លៃ ជាម្ចាស់ខ្សែក្រវាត់ម្នាក់ ក្នុងទម្ងន់ ៥៧ គីឡូក្រាមនេះតែម្តង។ តាមប្រភពអ្នកស្គាល់កីឡាករថៃរូបនេះ គេធ្លាប់ប្រើឈ្មោះ Meung PhiCh ហើយថៃម្នាក់នេះមិនធ្លាប់មកប្រកួតនៅកម្ពុជាពីមុនមកទេ៕