ភ្នំពេញៈ ពិធីបើកការប្រកួតកីឡាជាតិ លើកទី ២ ឆ្នាំ ២០១៨ ដែលគ្រោងនឹងធ្វើនៅពហុកីឡដ្ឋានជាតិ នាថ្ងៃទី ២៥ ខែឧសភា ខាងមុខនេះ នឹងទទួលបានការប្រោសព្រះរាជទានភ្លើងគប់ ដោយផ្ទាល់ពីព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
តាមលិខិតពីព្រះបរមរាជវាំង ដោយមានប្រថាប់ត្រារបស់លោក គង់ សំអុល ឧបនាយករដ្ឋមន្ត្រី និងជារដ្ឋមន្ត្រីក្រសួងបរមរាជវាំង នោះគឺព្រះបរមនាថ នរោត្តម សីហមុនី បានយល់ព្រមព្រះរាជទានភ្លើងគប់ សម្រាប់យកទៅដុតបំភ្លឺ ក្នុងពិធីបើកកីឡាជាតិ លើកទី ២ ទៅតាមសំណើរបស់លោកនាយករដ្ឋមន្ត្រី ហ៊ុន សែន ជាផ្លូវការហើយ។
លោក គង់ សំអុល បានចារក្នុងលិខិតនេះថា៖ «ខ្ញុំបាទមានកិត្តិយស សូមគោរពជម្រាបជូនសម្តេចអគ្គមហាសេនាបតីតេជោ នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជ្រាបដ៏ខ្ពង់ខ្ពស់ថា ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យនឹងព្រះរាជទានភ្លើងគប់ នៅកើយខាងមុខព្រះទីនាំងទេវាវិនិច្ឆ័យ ព្រះបរមរាជវាំង ដល់កីឡាករ ដើម្បីដង្ហែយកទៅដុតបំភ្លឺគប់ នៅពហុកីឡដ្ឋានជាតិ ដែលជាកន្លែងប្រារព្ធពិធីបើកការប្រកួតកីឡាជាតិ លើកទី ២ នៅថ្ងៃសុក្រ ទី ២៥ ខែឧសភា ឆ្នាំ ២០១៨»។
គួររំឭកថា កាលពីថ្ងៃទី៧ ខែឧសភា កន្លងមកនេះ លោកនាយករដ្ឋមន្ត្រី ហ៊ុន សែន បានផ្ញើលិខិត ១ ច្បាប់ទៅព្រះបរមរាជវាំង ដើម្បីក្រាបបង្គំទូលស្នើសុំ ព្រះបរមនាថ នរោត្តម សីហមុនី មេត្តាព្រះរាជទានភ្លើងគប់ ដើម្បីដង្ហែយកមកដុតបំភ្លឺគប់ នៅក្នុងពិធីបើកការប្រកួតកីឡាជាតិ លើកទី ២ ឆ្នាំ ២០១៨។
លោក ហ៊ុន សែន បានចាត់ទុកការប្រកួតកីឡាជាតិនេះ ជាព្រឹត្តិការណ៍ដ៏សំខាន់ ដែលជួយឲ្យមន្ត្រីកីឡាកម្ពុជា បានអនុវត្ត ដើម្បីទទួលបានចំណេះដឹងបទពិសោធ និងវាស់ស្ទង់គុណផលកីឡា ក្នុងត្រៀមទៅធ្វើជាម្ចាស់ផ្ទះស៊ីហ្គេម ឆ្នាំ ២០២៣៕