.jpg)
លោកអាជ្ញាកណ្តាល បានលើកដៃ ពុយ វណ្ណៈ ឲ្យឈ្នះពិន្ទុ សូត្រ ខេវិន កាលពីថ្ងៃសៅរ៍។ រូបថត យឺន ពន្លក
ភ្នំពេញ៖ ការព្យាករ និងទស្សន៍ទាយលទ្ធផលមុនប្រកួតត្រូវបានផ្ទុយស្រឡះ ព្រោះលទ្ធផលក្រោយប្រកួតជើងចាស់ ពុយ វណ្ណៈ របស់ក្លិបឃ្លាំងមឿងកីឡា បានយកឈ្នះអ្នកជំនាញប្រើជង្គង់ សូត្រ ខេវិន ហើយ ឡុង បេនលឿន មកពីក្លិបសាលវ័ន្ដកីឡាបានយកឈ្នះអ្នកលេងល្បីឈ្មោះជំនាន់ថ្មី អេលីត ភក្តី ដើម្បីទទួលបានកៅអីជម្រុះវគ្គ ៣ នៃព្រឹត្តិការណ៍ TV5 Boxing Knock Out Serie នៅសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍។
កីឡាករ ពុយ វណ្ណៈ និង ឡុង បេនលឿន គឺជាអ្នកឈ្នះចុងក្រោយក្នុងកៅអីចំនួន ៨ ដែលត្រៀមសម្រាប់វគ្គទី ៣ បន្ទាប់ពីចំណាយពេលច្រើនសប្តាហ៍មកហើយ ប៉ុន្តែការប្រែប្រួលនៃភាពរីកចម្រើនរបស់អ្នកប្រដាល់ស្រករក្រោយ មិនអាចប៉ាន់ស្មានបានទេ គឺធ្វើឲ្យអ្នកជំនាន់មុនៗ ខកចិត្ត និងធ្លាក់ចេញច្រើននាក់មកហើយ។ ចំណែកតាមរូបមន្តប្រកួតវគ្គ ៣ នេះ នឹងបន្តជម្រុះយកបេក្ខជនជាអ្នកឈ្នះចំនួនតែ ៤ នាក់ប៉ុណ្ណោះ ឡើងទៅប្រកួតវគ្គខ្វែង ដើម្បីឆ្ពោះទៅរកបេក្ខជនវគ្គផ្តាច់ព្រ័ត្រតែម្តង។
ស្ថានភាពនៃការប្រកួតគឺ ឡុង បេនលឿន បានប្រកួតឈ្នះអ្នកប្រដាល់ជើងខ្លាំងជំនាន់ក្រោយ អេលីត ភក្ដី របស់ក្លិបប៉ែនកាក់គុនខ្មែរ ដោយពិន្ទុ ទាំងលំបាកបំផុត ព្រោះជាការប្រកួតស្វិតស្វាញតឹងតែងមែន។ ទោះជាខិតខំយ៉ាងណាក៏ដោយ បន្ទាប់ពីប្រកួតចប់ទឹកទី ៣ បេនលឿន បានឈ្នះ និងក្លាយជាម្ចាស់កៅអី សម្រាប់ប្រកួតជម្រុះនៅវគ្គ ៣ ប៉ុន្តែ អេលីត ភក្ដីបានចាញ់ទាំងសោកស្តាយ បន្ទាប់ពីប្រឹងអស់ពីសមត្ថភាព។
ចំពោះ ពុយ វណ្ណៈ វិញ បានប្រកួតឈ្នះ សូត្រ ខេវិន របស់ក្លិបបក្សីស្លាបដែកដោយពិន្ទុសុទ្ធតែមានលក្ខណៈតឹងតែងបំផុតដូចគ្នា។ ខេវិន ជាអ្នកប្រដាល់ ដែលតែងតែប្រើជង្គង់ និងកែងវាយប្រហារគូប្រកួតមានលក្ខណៈមិនកាចសាហាវ ដែលមានប្រសិទ្ធភាពលើដៃគូបានឡើយ ហើយស្នៀតប្រកួត និងបច្ចេកទេសដដែលៗនេះ មិនអាចយកឈ្នះលើ ពុយ វណ្ណៈ បានទេ។
ជាមួយលទ្ធផលនេះ ពុយ វណ្ណៈ នឹងត្រូវប៉ះជាមួយ ឡុង បេនលឿន នៅវគ្គជម្រុះទី ៣ ហើយនៅក្រោយប្រកួត ពុយ វណ្ណៈ និយាយថា៖ «ខ្ញុំនឹងបន្តយកឈ្នះលើ ឡុង បេនលឿន ទៀតដើម្បីឈានទៅកាន់វគ្គទី ៤ ដែលមានកីឡាករចំនួន ៤ នាក់ចុងក្រោយ»។
ចំណែក ឡុង បេនលឿន បាននិយាយថា៖ «ខ្ញុំនឹងហ្វឹកហាត់ ដើម្បីយកឈ្នះលើ ពុយ វណ្ណៈ ប៉ុន្តែមិនហ៊ានអះអាងថា បានប៉ុន្មានភាគរយទេ ព្រោះគាត់ជាជើងចាស់ មានបទពិសោធល្អច្រើនជាងខ្ញុំ តែសំខាន់ហាត់ឲ្យខ្លាំង ឡើងវ៉ៃឲ្យខ្លាំង គឺខ្ញុំសង្ឃឹមខ្ពស់»។
ជាមួយគ្នានេះអ្នកប្រដាល់ សូត្រ ខេវិន និង អេលីត ភក្តី ដែលរំពឹងដណ្តើមបានកៅអី ត្រូវខកចិត្ត និងធ្លាក់ចេញពីកម្មវិធីប្រកួតតែម្តង ខណៈសាមីខ្លួនសុទ្ធតែអះអាងដូចគ្នាថា ចាញ់ដោយមិនអស់ចិត្ត។
ចំពោះការប្រកួតជាមិត្តភាពលក្ខណៈអន្តរជាតិជាមួយអ្នកប្រដាល់ថៃវិញ កីឡាករ ចាន់ សំអាត ដែលមានរហស្សនាមថា «អ្នកលេងជួរភ្នំដងរែក» នោះបានយកឈ្នះអ្នកប្រដាល់វ័យចំណាស់របស់ថៃ Pra Vith ដោយពិន្ទុ។ អ្នកប្រដាល់ទាំង ២ រូបនេះ ប្រកួតគ្នាពេញទាំង ៥ ទឹក ហើយបើទោះបីជា Pra Vith ចាស់វស្សា រាងធ្លាក់កម្លាំង ប៉ុន្តែថៃម្នាក់នេះ ក៏បានធ្វើឲ្យ ចាន់ សំអាត វេទនា និងឈឺខ្លួនមិនតិចដែរ មុននឹងបានលទ្ធផលឈ្នះត្រឹមពិន្ទុនោះ។
គួរបញ្ជាក់ថា អ្នកប្រដាល់ដែលបានកក់កៅអីវគ្គ ៣ រួចហើយមាន ៨ នាក់ គឺ រឿម វណ្ណៈ មកពីខេត្តបន្ទាយមានជ័យ សោម វិឆ័យ របស់រាជធានីភ្នំពេញ ណាម ម៉ូរ៉ាក់ មកពីខេត្តបាត់ដំបង ខាំ សាបាន របស់រាជធានីភ្នំពេញ រិន សារ័ត្ន មកពីកំពង់ស្ពឺ វ៉ែង ជីវ៉ុង មកពីបាត់ដំបង ឡុង បេនលឿន និង កីឡាករ ពុយ វណ្ណៈ៕
