ភ្នំពេញ: កីឡាករជំនាញប្រើកណ្តាប់ដៃមានល្អិតចិត្តធំ ពេជ្រ ម្ទេសខ្មាំង មកពីក្លិបអរុណរះកីឡាបានការពារតំណែង ឈ្នះលើកីឡាករថៃ Meung Phith ក្នុងការប្រកួតសងសឹកគ្នាកាលពីព្រឹកថ្ងៃអាទិត្យ ទី ៩ ខែកញ្ញា ឆ្នាំ ២០១៨ នៅសង្វៀនអាស៊ីអាគ្នេយ៍។
ចំណែកក្នុងការប្រកួតដណ្តើមពាន Ganzberg ទម្ងន់ ៦៥ គីឡូក្រាម កាលពីយប់ថ្ងៃសៅរ៍ កីឡាករមុត ខ្លឹមខ្មៅ មកពីក្លិបមកុដរាជសីហ៍ បានឈ្នះពិន្ទុកីឡាករប៊ី ចាន់ណា មកពីខេត្តស្វាយរៀង ដើម្បីមានពិន្ទុនាំមុខគេក្នុងពូល A និងដើម្បីត្រៀមខ្លួនឡើងទៅវគ្គបន្តជាកីឡាករចំណាត់ថ្នាក់លេខ ១ នៅពូល B។
ជាមួយគ្នានេះដែរ កីឡាករវ៉ែន ជីវ៉ុង មកពីក្លិបមិត្តប៉ូលិស បានរងបរាជ័យយ៉ាងធ្ងន់ធ្ងរក្រោមស្នៀតកែងរបស់កីឡាករធឿន ធី មកពីក្លិបអង្គរមានជ័យខេត្តសៀមរាប ដោយរូបគេបានចូលដេកពេទ្យទាំងយប់ ដោយសារតែបែកក្តោងច្រមុះ និងមានអាការធ្វើទុក្ខដូចជាក្អួតជាដើម។
ក្នុងការប្រកួតសងសឹករវាងម្ទេសខ្មាំង និង Meung Phith ពិតជាមានសកម្មភាពស្វិតស្វាញបំផុត ដោយចំណាយពេលរហូតដល់ ៥ ទឹក។
កីឡាករពេជ្រ ម្ទេសខ្មាំង បានប្រើស្នៀតចម្រុះមានទាំងកណ្តាប់ដៃ និងស្នៀតទាត់ ដើម្បីវាយសម្រុកគ្មានសំចៃ ប៉ុន្តែការមានពិន្ទុនាំមុខនោះមានលក្ខណៈប្រផិតប្រផើយ ខណៈដែលកីឡាករថៃ Meung Phith បានវាយរបៀបលក្ខណៈដកថយចាំស្រង់ និងចេញមួយៗចូលគោលដៅល្អ និងធ្ងន់ៗ ដែលធ្វើឲ្យការប្រកួតមានសភាពប្រទាញប្រទង់គ្នាខ្លាំងបំផុត។
ទោះជាយ៉ាងណា នៅក្នុងទឹកទី ៥ ពេជ្រ ម្ទេសខ្មាំង មានឱកាសវាយចូលគោលដៅល្អ ៣ ចំណុចគឺស្នៀតកែងចូលសៀតផ្កា ទាត់ចូលល្អ និងបន្ថែមដោយកណ្តាប់ដៃ ដែលធ្វើឲ្យកីឡាករថៃ ដួលលើរេញទាំងជំហរ ហើយអាជ្ញាកណ្តាលលោកម៉ាក់ សាមឿន បានរាប់ចំនួន ៨ ទៅលើកីឡាករថៃដែលនាំឲ្យ ពេជ្រ ម្ទេសខ្មាំង មានប្រៀបឈ្នះដាច់តែម្តង។
ក្រោយប្រកាសលទ្ធផលឈ្នះ ពេជ្រ ម្ទេសខ្មាំង បាននិយាយថា៖ «ការប្រកួតនេះតឹងតែងណាស់ ពីព្រោះកីឡាករថៃនោះជំនាញកណ្តាប់ដៃ និងពូកែគេចកណ្តាប់ដៃរបស់ខ្ញុំ ដែលមិនងាយចំគោលដៅឡើយ ហេតុនេះ ខ្ញុំសម្រុកទាត់យ៉ាងច្រើនទៅល្វែងក្រោម»។
ពេជ្រ ម្ទេសខ្មាំង បានបន្ថែមថា៖ «ការឡើងសង្វៀនប្រដាល់គុនខ្មែររបស់ខ្ញុំអាចនឹងយូរៗបានម្តងប៉ុណ្ណោះ ពីព្រោះជិតដល់រដូវកាលប្រមូលផ្តុំជម្រើសជាតិប្រដាល់សកលដែលខ្ញុំមិនត្រូវអនុញ្ញាតឲ្យវ៉ៃប្រដាល់គុនខ្មែរបន្តទៀតទេ គឺត្រូវហ្វឹកហាត់សម្រួចប្រដាល់សកលក្នុងឆ្នាំទៅស៊ីហ្គេម ឆ្នាំ ២០១៩ ខាងមុខ»។
ចំណែកការប្រកួតកាលពីយប់ថ្ងៃសៅរ៍ វគ្គជម្រុះសន្សំពិន្ទុពាន Ganzberg ទម្ងន់ ៦៥ គីឡូក្រាម មុត ខ្លឹមខ្មៅ បានបន្តឈ្នះកីឡាករប៊ី ចាន់ណា មកពីខេត្តស្វាយរៀង ដើម្បីឈ្នះ ៣ លើកពីការប្រកួតទាំង ៣ លើក មាន ៩ ពិន្ទុ ឈរក្នុងលំដាប់កំពូលតារាងក្នុងពូល A។
ជ័យជម្នះរបស់ខ្លឹមខ្មៅ ក្រៅពីប្រាក់តម្លៃខ្លួន រូបគេទទួលបានចំនួន ២០ ម៉ឺនរៀលបន្ថែមពីលោកជា ប៊ុនហេង ប្រធានអង្គភាពកីឡានគរបាលជាតិ។
ជាមួយគ្នានេះកីឡាករវ៉ែន ជីវ៉ុង មកពីក្លិបមិត្តប៉ូលិសបានបន្តចាញ់ទៀត ខណៈដែលដៃគូគឺកីឡាករធឿន ធី មកពីក្លិបអង្គរមានជ័យ ខេត្តសៀមរាប បានលែង ១ កែងយ៉ាងធ្ងន់ចូលខ្ទង់ច្រមុះ ដែលនាំឲ្យរូបគេត្រូវដឹកទៅពេទ្យទាំងយប់។
វេជ្ជបណ្ឌិតប្រចាំសង្វៀនគឺលោកជឹម ផល្លា បានឲ្យដឹងថា៖ «ព្រឹកនេះ របួសបានធូរស្រាលហើយបន្ទាប់ពីសម្រាកមួយយប់នៅមន្ទីរពេទ្យលោកសង្ឃ។ រូបគេបានចេញពីពេទ្យហើយ»៕