ប៉ារីស: ក្រុមព័រទុយហ្គាល់ និងអ៊ីតាលី រក្សាចំណាត់ថ្នាក់លេខ ១ ក្នុងគ្រុប (ពូល) របស់ខ្លួនបន្តទៀតក្នុងកម្មវិធី UEFA Nations League ក្រោយប្រកួតស្មើ ០-០ ជាមួយក្រុមគូប្រជែងរៀងៗខ្លួនកាលពីថ្ងៃអាទិត្យ ខណៈអង់គ្លេស វាយបកយកឈ្នះបែលហ្ស៊ិកហក់ឡើងទៅទីកំពូល។
គ្មានអ្វីត្រូវនិយាយច្រើនឡើយអំពីទិដ្ឋភាពនៅកីឡដ្ឋានជាតិ Stade de France របស់បារាំងពេលកីឡាករឆ្នើមៗ មានដូចជា Cristiano Ronaldo, Kylian Mbappe និង Antoine Griezmann ជាដើម មិនអាចបង្កើតបាននូវរូបភាពគួរឱ្យជក់ចិត្តច្រើនតាមការរំពឹងទុក សម្រាប់ការប្រកួតនៅ League A គ្រុបទី ៣។
ក្នុងកីឡដ្ឋានដ៏ធំនៅក្រៅក្រុងប៉ារីស ការប្រកួតរវាងក្រុមម្ចាស់ផ្ទះបារាំង និងព័រទុយហ្គាល់ ឃើញមានការស៊ុតចំគោលដៅតែ ៤ ដងប៉ុណ្ណោះ ខណៈខ្សែការពារបានរារាំងរាល់ការវាយសម្រុករបស់ក្រុមទាំង ២។
គ្រូបង្វឹករបស់ព័រទុយហ្គាល់លោក Fernando Santos និយាយថា៖ «យើងស៊ុតបញ្ចូលទីមិនបានសម្បី ១ គ្រាប់ តែយើងមកទីនេះ មិនមែនដើម្បីស៊ុតបញ្ចូលទីទេ។ បារាំង គឺជាក្រុមខ្លាំងដោយមានសុទ្ធតែកីឡាករល្អ ដូច្នេះមិនស្រួលនោះឡើយក្នុងការបង្កើតឱកាសបានជានិច្ចនោះ»។
ក្រោយបញ្ចប់ប្រកួតទី ៣ នេះក្រុមទាំង ២ ឈរនៅទី ១ និងទី ២ ក្នុងពូលមាន ៧ ពិន្ទុដូចគ្នា ពោលគឺនាំមុខ ៤ ពិន្ទុ លើក្រុមលេខ ៣ ក្រូអាស៊ីដែលប្រកួតឈ្នះក្រុមបាតតារាងស៊ុយអែត ២-១ នៅផ្ទះខ្លួនឯង។
ងាកទៅអ៊ីតាលីបន្តការលេងមិនចាញ់រហូតដល់ ១៨ ប្រកួត និងឈរទី ១ ដដែល ដោយមាន ៥ ពិន្ទុ នៅ League A គ្រុបទី ១ ក្រោយចប់ការប្រកួត ដោយការមិនអាចធ្វើអ្វីគ្នាបានជាមួយក្រុមម្ចាស់ផ្ទះប៉ូឡូញ។
រីឯអង់គ្លេសបានវាយបកយកឈ្នះបែលហ្ស៊ិក ២-១ នៅផ្ទះខ្លួនឯងឡើងទៅទីកំពូលមាន ៧ ពិន្ទុ នៅ League A គ្រុបទី ២។ គ្រាប់បាល់របស់អង់គ្លេស ស៊ុតដោយ Marcus Rashford (ប៉េណាល់ទី) និង Mason Mount ខណៈ Romelu Lukaku ជាអ្នកសម្រេចទីឱ្យក្រុមក្រុមភ្ញៀវ៕ VN