.jpg)
ម៉ន ព្រហ្មម៉ាញ នឹងត្រូវប្រឈមជាមួយជើងខ្លាំងរបស់ថៃ Pek Thieng នៅថ្ងៃសៅរ៍ខាងមុខនេះ។ សហការី
ភ្នំពេញៈ អ្នកប្រដាល់ចិត្តធំនៃត្រកូលម៉នរបស់ក្លិបព្រែកឯង គឺ ម៉ន ព្រហ្មម៉ាញ ទទួលបានឱកាសប្រកួតជាមួយជើងខ្លាំងរបស់ថៃ Pek Thieng នៅលើសង្វៀន SEATV នារសៀលថ្ងៃសៅរ៍ ហើយអ្នកប្រដាល់ជំនាញកណ្តាប់ដៃធ្ងន់ ផាន់ គ្រាន់ របស់ក្លិបពុទ្ធសេរីវង្ស ក៏ត្រូវប៉ះថៃ Sen Khum នៅថ្ងៃនោះដែរ។
កីឡាករ ម៉ន សាម៉េត ដែលជាបងរបស់ ម៉ន ព្រហ្មម៉ាញ បានប្រាប់ថា៖ «ការជួបថៃ Pek Thieng គឺ ម៉ន ព្រហ្មម៉ាញ នឹងជួបឧបសគ្គធំ ព្រោះអ្នកប្រដាល់ថៃរូបនេះមានសមត្ថភាពខ្លាំងធ្លាប់ចូលរួមប្រកួតដណ្ដើមខ្សែក្រវាត់នៅស្រុកខ្មែរកន្លងមក និងជាម្ចាស់ខ្សែក្រវាត់នៅស្រុកថៃផងដែរ»។
ជាមួយគ្នានេះទាំង ម៉ន សាម៉េត និង ម៉ន ព្រហ្មម៉ាញ សុទ្ធតែអះអាងថា មានសង្ឃឹមឈ្នះតិច ប៉ុន្តែធានាវ៉ៃឲ្យអស់ពីសមត្ថភាព ព្រមទាំងបង្ហាញការពេញចិត្តចំពោះការប្រកួតប៉ះជាមួយអ្នកខ្លាំង។ ម៉ន ព្រហ្មម៉ាញ ធ្លាប់មានបទពិសោធប្រកួតជាមួយកីឡាករបរទេសចំនួន ១០ ដង ឈ្នះ ៦ និងចាញ់ ៤ ដងហើយកាលពីមុនចូលឆ្នាំប្រពៃណីខ្មែរ ព្រហ្មម៉ាញ បានឈ្នះកីឡាករជនជាតិបារាំងនៅខេត្តបាត់ដំបង។
ម៉ន ព្រហ្មម៉ាញ បញ្ជាក់ថា៖ «ខ្ញុំសង្ឃឹមឈ្នះតិចប្រហែល ៥០ ភាគរយ ប៉ុន្តែខ្ញុំធានាវ៉ៃអស់ពីសមត្ថភាព ហើយខ្ញុំពេញចិត្តក្នុងការប្រកួតជាមួយជើងខ្លាំង ដើម្បីមានបទពិសោធល្អ»។ តាមគណៈកម្មការផ្គូផ្គងឲ្យដឹងថា Pek Thieng ធ្លាប់ប្រកួត ៦៩ ដង ឈ្នះ ៥៧ ចាញ់ ១២ ដង ហើយប្រកួតចុងក្រោយថ្ងៃចូលឆ្នាំឈ្នះ ឈាន ហុង ដោយពិន្ទុ ចំណែក ម៉ន ព្រហ្មម៉ាញ ធ្លាប់ប្រកួត ៧១ ដង ឈ្នះ ៥៤ ចាញ់ ១៥ និងស្មើពិន្ទុ ២ ដង។
ប្រភពពីអ្នកទស្សនាភាគច្រើន ដែលស្គាល់សមត្ថភាពកីឡាករថៃលាន់មាត់ថា ប្រសិនបើ Pek Thieng មិនបន្ធូរដៃទេ ម៉ន ព្រហ្មម៉ាញ អាចនឹងចាញ់ដោយសន្លប់ក៏ថាបានដែរ។ ទោះបីជាយ៉ាងណាស្នៀតទាត់ និងកែងរបស់ ព្រហ្មម៉ាញ ក៏ជាឧបសគ្គធំរបស់ Pek Thieng ផងដែរ។
ចំពោះគូអន្តរជាតិ ១ ទៀត ផាន់ គ្រាន់ ជាអ្នកប្រដាល់ជើងខ្លាំងមួយរូបដែលមានកណ្ដាប់ដៃធ្ងន់ វ៉ៃចេញធ្ងន់ រហ័ស និងមានចិត្តធំនោះត្រូវប៉ះថៃ Sen Khum ហើយថៃម្នាក់នេះធ្លាប់មកប្រកួតនៅស្រុកខ្មែរមិនតិចជាង ៥ លើកទេ គឺមានកម្រិតវិជ្ជាគុនខ្លាំងលំបាកបង្ក្រាបណាស់ អ៊ីចឹងការប្រកួតនេះអាចនឹងមានភាពតានតឹងខ្លាំង។
កីឡាករ Sen Khum ធ្លាប់ប្រកួត ៧៩ ដង ឈ្នះ ៦៦ ចាញ់ ១២ និងស្មើពិន្ទុ ១ ដងគឺតិចជាង ផាន់ គ្រាន់ ដែលធ្លាប់ប្រកួតបាន ១២៣ ដង ឈ្នះ ១០២ ចាញ់ ១៩ និងស្មើពិន្ទុ ២ ដង ហើយគេជាម្ចាស់ខ្សែក្រវាត់ចំនួន ២ ស្ថាប័ន៕
