.jpg)
ការប្រកួតកីឡាចំបាប់ កាលពីឆ្នាំមុន ប៉ុន្តែកីឡា ៥ប្រភេទ ត្រៀមដាក់ឱ្យប្រកួតនៅឆ្នាំនេះ គ្មានចំបាប់ទេ។ រូបថត សហការី
ភ្នំពេញ៖ ព្រឹត្តិការណ៍កីឡាដ៏ធំប្រចាំឆ្នាំរបស់មន្ទីរអប់រំ យុវជន និងកីឡា ខេត្តកណ្តាល ដែលធ្លាប់ប្រារព្ធធ្វើឡើងអស់រយៈពេលចូល ១០ ឆ្នាំមកហើយ ដើម្បីអបអរសាទរទិវាបុណ្យជ័យជម្នះ ថ្ងៃ ៧ មករា នោះ ត្រូវបានពន្យារពេលវិញ ដោយមិនទាន់ហ៊ានកំណត់ពីកាលបរិច្ឆេទថ្មីនៅឡើយទេ ប៉ុន្តែអ្នករៀបចំរំពឹងថា អាចនឹងបើកការប្រកួតវិញ នៅចុងខែធ្នូ ឆ្នាំ ២០២០ នេះ បើសិនជាករណីឆ្លងចូលសហគមន៍នៃជំងឺកូវីដ ១៩ អាចវិលមករកភាពល្អប្រសើរវិញ។
ជាមួយគ្នានេះ ការប្រកួតកីឡាដ៏ធំប្រចាំឆ្នាំ ២០២០ របស់ខេត្តកណ្តាលនេះ ត្រូវបានគេប្តូរឈ្មោះដោយប្រសិទ្ធនាមថា «កីឡាដើម្បីទាំងអស់គ្នា» ដែលតាមគម្រោងមានអត្តពលិកចូលរួមសរុបដល់ទៅជាង ៦០០ នាក់ ដោយចំណាយពេលប្រកួតជិត ១ សប្តាហ៍ឯណោះ។ នេះតាមការបញ្ជាក់របស់ លោក ពៅ វណ្ណា ប្រធានការិយាល័យអប់រំកាយ និងកីឡា នៃមន្ទីរអប់រំ យុវជន និងកីឡាខេត្តកណ្តាល។
លោក ពៅ វណ្ណា បាននិយាយថា៖ «ពីដំបូងយើងគ្រោងបើកការប្រកួតចាប់ពីថ្ងៃទី ២ ដល់ថ្ងៃទី ៧ ខែធ្នូ ឆ្នាំ ២០២០ នៅតាមទីលាននានារបស់ខេត្ត និងស្រុកខ្សាច់កណ្តាល ប៉ុន្តែពេលនេះយើងបានផ្អាក និងពន្យារពេលហើយ តាមការណែនាំរបស់ក្រសួងសុខាភិបាល ក៏ដូចជារាជរដ្ឋាភិបាល ដើម្បីរក្សាគម្លាតការពារជំងឺឆ្លងកូវីដ ១៩ ដែលកំពុងមានផលប៉ះពាល់»។
លោកបន្ថែមថា យើងមិនទាន់ហ៊ានកំណត់ពេលវេលាប្រកួតជាថ្មី ឱ្យបានច្បាស់នៅឡើយទេ ព្រោះត្រូវរង់ចាំមើលការណែនាំជូនដំណឹងតាមលក្ខណៈជាក់ស្តែងពីថ្នាក់លើសិន។ ប្រសិនជាកូវីដ ១៩ មានសភាពធូរស្រាល ហើយក្រសួងជំនាញអនុញ្ញាតនោះ យើងគ្រោងជាថ្មីវិញ នៅថ្ងៃទី ២៧ ខែធ្នូ ខាងមុខ។
«គោលបំណងនៃការរៀបចំការប្រកួតកីឡានេះ គឺដើម្បីផ្សព្វផ្សាយវិស័យកីឡាខេត្តកណ្តាល និងបើកចំហឱ្យមហាជន ព្រមទាំងកីឡាករ កីឡាការិនី គ្រប់វ័យបានជ្រួតជ្រាបពីកីឡា ដើម្បីសុខភាព មិត្តភាព សហប្រតិបត្តិការ និងទំនាក់ទំនងពាណិជ្ជកម្មផងដែរ ស្របទៅនឹងផែនការគោលនយោបាយកីឡារបស់រាជរដ្ឋាភិបាល ឆ្ពោះទៅព្រឹត្តិការណ៍ស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
លោក ពៅ វណ្ណា បានបញ្ជាក់ថា ព្រឹត្តិការណ៍កីឡានេះ ធំជាងឆ្នាំមុនៗ ដោយមាន ៥ ប្រភេទកីឡា គឺបាល់ទាត់ បាល់ទះ បាល់បោះ ការ៉ាតេ និងប៉េតង់ ដោយក្នុងនោះដែរ បាល់ទាត់ទាំងផ្នែកបុរស នារី វ័យចាស់ កុមារា និងកុមារី សរុប ២៨ ក្រុម រីឯបាល់ទះបុរស មាន ១៦ ក្រុម ចំណែកបាល់បោះមាន ១៨ ក្រុម។ ចំពោះការ៉ាតេ មាន ៥ ក្រុម និងប៉េតង់ ៤ ក្រុម ដោយមានអត្តពលិកសរុបជាង ៦០០ នាក់។
លោក ភឹម ផួយ សមាជិកក្រុមប្រឹក្សាស្រុកខ្សាច់កណ្តាល និងជាប្រធានគ្រប់គ្រងកីឡាការ៉ាតេដូ ដែលទីតាំងហ្វឹកហាត់មានលក្ខណៈស្តង់ដាល្អ ជិតសាលាស្រុកខ្សាច់កណ្តាលនោះ បានប្រាប់ថា៖ «ចំពោះប្រភេទកីឡាការ៉ាតេនឹងធ្វើការប្រកួត នៅស្រុកខ្សាច់កណ្តាលនេះតែម្តង ដោយមាន ៥ ក្លិប គឺក្លិបអង្សរក្ស ក្លិបគគីគៀនស្វាយ ក្លិបល្វាឯម ក្លិបរ៉ូតា និងក្លិបខ្សាច់កណ្តាល ហើយទីលាន និងអត្តពលិក យើងត្រៀមរួចរាល់ហើយ រង់ចាំតែបទបញ្ជា និងបញ្ហាជំងឺកូវីដ ១៩ ធូរស្រាលយើងនឹងប្រកួតភ្លាម»៕
