.jpg)
សកម្មភាពប្រកួតកីឡាបាល់ទះដែលបានធ្វើឡើងនៅក្នុងពិធីបុណ្យទន្លេក្នុងខេត្តកំពង់ឆ្នាំង។ រូបថត NOCC
ភ្នំពេញ: ប្រភេទកីឡាទាំង ១២ ដែលត្រូវដាក់ឲ្យប្រកួតនៅក្នុងពិធីបុណ្យទន្លេលើកទី ៥ នៅខេត្តកំពង់ឆ្នាំងកាលពីថ្ងៃសុក្រ សៅរ៍ និងថ្ងៃអាទិត្យ កន្លងមកនេះត្រូវបានអ្នកគ្រប់គ្រងទៅលើការប្រកួតនេះ វាយតម្លៃថាទទួលបានលទ្ធផលល្អយ៉ាងត្រចះត្រចង់ ហើយពិធីបុណ្យរយៈពេល ៣ ថ្ងៃនេះមានភ្ញៀវជាតិ និងអន្តរជាតិបានចូលរួមប្រមាណ ១ លាននាក់។
លោក វ៉ាត់ ចំរើន ប្រធានអនុគណៈកម្មការកីឡាបុណ្យទន្លេ និងជាអគ្គលេខាធិការ NOCC បានថ្លែងប្រាប់ប្រព័ន្ធផ្សព្វផ្សាយនៅថ្ងៃប្រកួតចុងក្រោយថា៖ «សកម្មភាពកីឡាទាំង ១២ ប្រភេទដែលត្រូវបានដាក់ឲ្យប្រកួតនៅបុណ្យទន្លេនេះ យើងអាចវាយតម្លៃថាគឺគ្រប់ប្រភេទកីឡាទាំងអស់មានការចូលរួមក៏ច្រើន និងមានការទាក់ទាញពីអ្នកទស្សនាជាភ្ញៀវជាតិ និងអន្តរជាតិក៏ច្រើន»។
គួរបញ្ជាក់ថាប្រភេទកីឡាទាំង ១២ ដែលត្រូវដាក់ឲ្យប្រកួតនៅក្នុងពិធីបុណ្យទន្លេរយៈពេល ៣ ថ្ងៃរួមមានរត់ប្រណាំងកម្សាន្តចម្ងាយ ៣ គីឡូម៉ែត្រ និង ៥ គីឡូម៉ែត្រនៅព្រឹកថ្ងៃសុក្រ កីឡាបាល់ទាត់ចំនួន ៣ ថ្ងៃពេញ កីឡាបាល់ទះ ៣ ថ្ងៃពេញ ចំបាប់បុរាណ ៣ ថ្ងៃពេញ ប្រណាំងសេះនៅថ្ងៃអាទិត្យ ទាញព្រ័ត្រ នៅថ្ងៃសុក្រ និងថ្ងៃសៅរ៍ វាយសី ៣ ថ្ងៃពេញ ជិះកង់កម្សាន្តនៅថ្ងៃសៅរ៍ ប្រណាំងទូកនៅថ្ងៃអាទិត្យ បាល់បោះនៅថ្ងៃ សុក្រ និងថ្ងៃសៅរ៍ប្រដាល់គុនខ្មែរ ថ្ងៃសៅរ៍ និងថ្ងៃអាទិត្យហើយកីឡាប្រពៃណីល្បុក្កតោ សម្តែង និងប្រកួតនៅថ្ងៃសៅរ៍ និងថ្ងៃអាទិត្យ។
ជុំវិញចំនួនអ្នកចូលរួមលេងនៅតាមប្រភេទកីឡាទាំងនេះលោក វ៉ាត់ ចំរើន បានបន្តថា៖ «អ្វីដែលយើងឃើញមានភាពផុសផុលជាងគេគឺ រាល់សកម្មភាពកីឡាចាប់ពីព្រឹករហូតដល់យប់តែងតែមានការគាំទ្រ ហើយអ្នកសម្តែង និងអ្នកចូលរួមលេងក៏ច្រើនដែរគឺគ្រាន់តែអ្នកចូលរួមលេងមានជាង ៣០០០ នាក់ក្នុងនោះអ្នកចូលរួមលេងការរត់ប្រណាំងមានជាង ២០០០ នាក់ជិះកង់កម្សាន្តជាង ៥០០ នាក់ក្រៅពីនោះមានបាល់ទាត់ បាល់បោះ និងបាល់ទះក៏មានការចូលរួមច្រើនផងដែរ»។
លោក វ៉ាត់ ចំរើន ដែលជារដ្ឋលេខាធិការក្រសួងទេសចរណ៍ផងនោះបានបន្ថែមថា៖ «អ្វីដែលមានការរំភើប និងប្លែកជាងគេគឺនៅក្នុងខេត្តនេះ យើងឃើញមានកីឡាទាញព្រ័ត្រ កីឡាល្បុក្កតោ ចំបាប់បុរាណ និងប្រដាល់គុនខ្មែរ មានការគាំទ្រច្រើន ហើយការដាក់ឲ្យមានការប្រណាំងសេះនៅថ្ងៃអាទិត្យនោះធ្វើឲ្យប្រជាជនគាត់ប្លែកអារម្មណ៍ និងគាំទ្រខ្លាំង»។
«ចំណែកអុំទូកងវិញគឺនៅខេត្តកំពង់ឆ្នាំងនេះមិនដែលបានអុំទេ ដោយសារកាលមុនទន្លេនេះមានភាពស្មុគស្មាញដោយមានផ្ទះនៅលើទឹកគ្មានភាពអំណោយផលទេ អ៊ីចឹងការដាក់ឲ្យមានការប្រណាំងទូកនេះគឺយើងឃើញនៅតាមមាត់ទន្លេមានប្រជាពលរដ្ឋរាប់ម៉ឺននាក់បានមកទស្សនាការប្រណាំងទូករបស់យើង»។
លោក វ៉ាត់ ចំរើន បានបញ្ជាក់ថា៖ «ជាសរុបយើងវាយតម្លៃថាការរៀបចំសកម្មភាពកីឡា និងការប្រកួតកីឡាទាំង ១២ ប្រភេទនៅបុណ្យទន្លេនេះ ទទួលបានការគាំទ្រខ្លាំង និងទទួលបានជោគជ័យយ៉ាងត្រចះត្រចង់ ហើយយើងគិតថានេះជាបទពិសោធល្អសម្រាប់យើងក្នុងការធ្វើការកែលម្អ និងកែច្នៃនូវសកម្មភាពកីឡា និងការប្រកួតកីឡានេះសម្រាប់ការរៀបចំនៅក្នុងពិធីបុណ្យទន្លេឆ្នាំក្រោយៗទៀត»៕
