ភ្នំពេញ៖ ព្រឹត្តិការណ៍បាល់ទាត់សម្រាប់កុមារា-កុមារីនៃអង្គការផ្កាយសមុទ្រ (ISF) ប្រចាំឆ្នាំ ២០២០ ត្រូវបានធ្វើឡើងនៅលើទីលានចំនួន ៨ កាលពីថ្ងៃសៅរ៍ ដោយមានអត្តពលិកចូលរួមជាង ៥០០ នាក់ ស្មើ ៤៥ ក្រុម ហើយអ្នកទាំងនេះ ជាក្មេងៗមកពីអង្គការផ្កាយសមុទ្រ និងអង្គការជាដៃគូនានា។
សម្រាប់ព្រឹត្តិការណ៍បាល់ទាត់នេះ បានធ្វើសកម្មភាពរីកចម្រើនជាង ១៤ ឆ្នាំមកហើយ ស្របទៅនឹងស្ថានភាពតម្រូវការចាំបាច់របស់កុមារ និងបច្ចេកទេសរបស់សហព័ន្ធកីឡាបាល់ទាត់កម្ពុជា ដោយមានទស្សនៈផ្តល់ជូនចំពោះកុមារ ដែលគ្មានឱកាសបានចូលសាលារៀន និងទទួលបានការអប់រំជំនាញលេងកីឡាបាល់ទាត់តម្រង់ទិសទៅរកកម្រិតអាជីព។
នៅក្នុងការប្រកួតរយៈពេលពេញ ១ ថ្ងៃ នៅទីលាន ISF Sports Ground ស្ថិតនៅឃុំរលួស ស្រុកកណ្តាលស្ទឹង ខេត្តកណ្តាល កាលពីថ្ងៃសៅរ៍នោះ កញ្ញា ជួប វិច្ឆិកា នាយិកាអង្គការផ្កាយសមុទ្រ បានប្រាប់ភ្នំពេញ ប៉ុស្តិ៍ ថា សកម្មភាព និងការទទួលបានលទ្ធផលល្អ មកដល់ពេលនេះ គឺមានសប្បុរសជនច្រើននៅក្រៅប្រទេស តែងតែយកចិត្តទុកដាក់ចំពោះក្មេងៗរបស់កម្ពុជា ដែលគ្មានឱកាសបានអប់រំ និងលេងបាល់ទាត់។
នាយិការូបនេះបានរំឭក និងបញ្ជាក់ថា៖ «សកម្មភាពដែលអង្គការផ្កាយសមុទ្របានចាប់ផ្តើមពីដំបូង គឺពីកុមារចំនួនតែ ១៥ នាក់ ក្នុងឆ្នាំ ២០០៦ តែមកដល់បច្ចុប្បន្ននេះ យើងមានជាង ៣ ៥០០ នាក់ ហើយយើងទាំងអស់គ្នានៅចងចាំពីវីរភាពរបស់លោក Ian Thompson Memorial ដែលជាមនុស្សដ៏អស្ចារ្យ ស្រឡាញ់កុមារ និងជួយកម្មវិធីទាំងនេះ។ ទោះគាត់បានស្លាប់កាលពីឆ្នាំ ២០០១ ប៉ុន្តែប្រពន្ធ និងកូនរបស់គាត់ចំនួន ៤ នាក់ នៅតែរៃអង្គាសជួយដល់កម្មវិធីរបស់អង្គការផ្កាយសមុទ្រមកដល់ពេលនេះ»។
ចំណែកលោក យិន សាមឌី នាយកគ្រប់គ្រងកម្មវិធីប្រកួតបានឲ្យដឹងថា៖ «ចក្ខុវិស័យរបស់អង្គការផ្កាយសមុទ្រ គឺផ្តល់ជូនកុមារគ្មានទីពឹងឲ្យទទួលបានការអប់រំ និងរំដោះចេញពីភាពក្រីក្រមកទទួលបានការបណ្តុះបណ្តាល និងថែទាំសុខភាព។ បន្ថែមពីលើនេះកម្មវិធីត្រូវបានផ្តល់ជូនដោយភាពកក់ក្តៅ នូវសាលារៀនលេងកីឡា និងការថែទាំសុខភាព ដើម្បីជាមូលដ្ឋានគ្រឹះឆ្ពោះទៅកម្រិតអាជីពមួយទៅតាមបំណង និងនិស្ស័យរបស់ពួកគេរៀងៗខ្លួន នាពេលអនាគត»។
តាមកញ្ញា ទេពី មន្ត្រីសម្របសម្រួលព័ត៌មានបានឲ្យដឹងថា ឆ្នាំ ២០២០ នេះ មានអ្នកចូលរួមចំនួន ៥០០ នាក់ ស្មើនឹង ៤៥ ក្រុម មកពីខេត្ត និងរាជធានីចំនួន ១០ គឺកើនលើសឆ្នាំ ២០១៩ ដែលមានតែជាង ៤៥០ នាក់ ហើយយើងបានបែងចែកការប្រកួតទៅតាមប្រភេទអាយុ ក្នុងនោះ ២៥ ក្រុម ស្ថិតក្នុងអាយុក្រោម ១៤ ឆ្នាំ (U14) ១០ ក្រុមអាយុក្រោម ១០ ឆ្នាំ និង ៥ ក្រុមអាយុក្រោម ១៦ ឆ្នាំ។ យើងបានប្រើការប្រកួតសរុប ១១៥ ប្រកួត ខណៈដែលលក្ខខណ្ឌនៃការប្រកួត គឺគោរពតាមសហព័ន្ធកីឡាបាល់ទាត់កម្ពុជា ដែលមានគ្រូជំនាញៗឆ្លងកាត់វគ្គបណ្តុះបណ្តាល។
ចំពោះលទ្ធផលនៃការប្រកួតពេញ ១ ថ្ងៃ កាលពីថ្ងៃសៅរ៍នោះ ចំណាត់ថា្នក់លេខ ១ ក្របខ័ណ្ឌ U16 បានទៅសាលាសំរោង រាជធានីភ្នំពេញ និងលេខ ២ ក្រុមមូលនិធិផ្កាយសមុទ្រស្ទឹងមានជ័យរាជធានីភ្នំពេញ ចំណែកក្របខ័ណ្ឌ U14 ចំណាត់ថ្នាក់លេខ ១ បានទៅក្រុមសាលាអូតាសុខ ខេត្តបាត់ដំបង និងលេខ ២ បានទៅក្រុម DCC ខេត្តបាត់ដំបង ហើយការប្រកួត U10 ចំណាត់ថ្នាក់លេខ ១ បានទៅសាលា Stepping Stone ខេត្តសៀមរាប និងលេខ ២ ក្រុមសាលាសំរោងរាជធានីភ្នំពេញ៕