.jpg)
លោកព្រឹទ្ធាចារ្យ ហុក ឈាងគីម ពេលឡើងបំពាក់មេដាយដល់ក្រុមល្បុក្កតោ ពេលកន្លងមក។ រូបភ្នំពេញប៉ុស្តិ៍
ភ្នំពេញ៖ លោកព្រឹទ្ធាចារ្យមានជន្មាយុ ៧៤ ឆ្នាំ ហុក ឈាងគីម ដែលធ្លាប់ឆ្លងកាត់បទពិសោធជាអ្នកហាត់គុនប្រភេទកីឡាករប្រយុទ្ធ មុននឹងក្លាយជាគ្រូក្បាច់គុន ក្នុងកីឡាច្រើនប្រភេទមានកីឡាចំបាប់ ការ៉ាតេដូ តេក្វាន់ដូ វ៉ូវីណាម ល្បុក្កតោ និងហាប់គីដូនោះ បានបង្ហាញនូវគន្លឹះសំខាន់ៗ ដែលជាស្ពានយ៉ាងពិតប្រាកដក្នុងការជំរុញឲ្យអ្នកកីឡាទទួលបានជោគជ័យនៅក្នុងអាជីពរបស់ខ្លួន។
បើទោះបីជា បច្ចុប្បន្នលោកមានវ័យចាស់ទៅហើយ ប៉ុន្តែលោក ហុក ឈាងគីម នៅតែមានសុខភាពល្អ មាំមួន និងធ្វើសកម្មភាពកីឡាក្រៅប្រព័ន្ធ គឺតាមសាលារៀនឯកជនជាប្រចាំហើយលោកមានទស្សនៈទូលំទូលាយ ដោយផ្តោតទៅលើសកម្មភាពកីឡា និងចង់បង្ហាញឲ្យមនុស្សជំនាន់ក្រោយៗយល់ថា លទ្ធផលល្អពីកីឡា មិនមែនបានមកពីការហ្វឹកហាត់ត្រឹមជំនាញបច្ចេកទេសមួយមុខប៉ុណ្ណោះទេ។
លោក ហុក ឈាងគីម ដែលមានកូនៗសុទ្ធតែជាអ្នកកីឡានោះ បានបង្ហើបពីគន្លឹះជោគជ័យទាំងនោះថា ដើម្បីជោគជ័យក្នុងកីឡា គឺក្រៅពីហ្វឹកហាត់បច្ចេកទេសបានត្រឹមត្រូវ គប្បីមានវិន័យ ក្រមសីលធម៌ គុណធម៌ និងសមាធិផ្លូវចិត្ត ព្រោះវាជាផ្លូវធម្មជាតិ ដែលព្រះពុទ្ធបានរកឃើញ គឺសីល សមាធិ និងបញ្ញា។ មានន័យថា សីល ជាវិន័យ និងក្រមសីលធម៌ រីឯសមាធិ ជាការតាំងចិត្តបានល្អ ចំណែកបញ្ញាគឺកា-ប្រើប្រាស់នូវប្រាជ្ញាស្មារតី ដើម្បីប្រើប្រាស់ជំនាញឲ្យទទួលបានលទ្ធផលល្អ។
នៅក្នុងពេលជួបសម្ភាសជាមួយភ្នំពេញប៉ុស្តិ៍ លោក ហុក ឈាងគីម បានផ្តល់នូវទស្សនៈថា៖ «លទ្ធផលក្នុងកីឡាត្រូវមាន វិន័យ គុណធម៌ និងសមាធិផ្លូវចិត្ត ព្រោះសមត្ថភាព និងបច្ចេកទេសតែមុខ មិនគ្រប់គ្រាន់នោះទេ គឺទាមទារឲ្យពួកគេត្រូវមានចិត្តក្លាហាន ក្នុងការប្រកួត ដោយតាំងចិត្តឲ្យមុតជាងកាំបិតទៅទៀត ដូច្នេះយើងប្រយុទ្ធ ត្រូវប្រើចិត្ត កុំប្រើតែបច្ចេកទេសដោយសារចិត្តមុត ទម្លុះធ្លុះដូចយើងបាញ់ព្រួញ គឺចង់បានលទ្ធផលដូចជាធ្លុះទ្រូងម្ខាង ទៅទ្រូងម្ខាង ព្រមទាំងមានអារម្មណ៍ស្ងប់ និងមានទំនុកចិត្តលើសមត្ថភាពខ្លួនឯង»។
លោកបន្តថា៖ «កីឡាករខិតខំប្រឹងប្រែងប្រកួត ឲ្យអស់ពីសមត្ថភាពក្នុងការស្វែងរកជ័យជម្នះ គឺចៀសវាងប្រព្រឹត្តអំពើទាំងឡាយណា ដែលនាំឲ្យប៉ះពាល់ដល់កិត្តិយសជាតិ ឬបុគ្គលហើយត្រូវចាំថា សត្រូវធំបំផុតសម្រាប់អ្នកហាត់គុន មិនមែនគូប្រកួតនោះទេ ប៉ុន្តែសត្រូវដែលធំបំផុតនោះ គឺចិត្ត»។
លោកបានបញ្ជាក់ថា៖ «ទោះបីជាខ្ញុំបានចូលនិវត្តន៍ពីរាជការ និងបានលាឈប់ពីគ្រូបង្វឹកកីឡា ក្នុងសហព័ន្ធមួយចំនួន ប៉ុន្តែដោយសារជំនាញ និងបទពិសោធក្នុងការហាត់គុន ក្នុងការបង្វឹកសិស្ស និងក្នុងការគ្រប់គ្រងដឹកនាំ គឺទោះខ្ញុំពេលនេះមានវ័យ ៧៤ ឆ្នាំ ខ្ញុំនៅតែរក្សាបាននូវអាជីពជា គ្រូបង្វឹកដល់ក្មេងៗរាប់រយនាក់ឲ្យសាលារៀនឯកជនប៊ែលធី ដែលត្រូវការខ្ញុំជានិច្ច»។
ព្រឹទ្វាចារ្យកីឡារូបនេះ បានបញ្ជាក់បន្ថែមថា៖ «ក្នុង ១ សប្តាហ៍ ខ្ញុំចំណាយពេល ១៦ ម៉ោងទៅបង្វឹកក្មេងៗ ជាលក្ខណៈអប់រំកាយអប់រំចិត្ត និងតម្រង់ទិសឲ្យពួកគេជានិច្ច គឺទើបតែផ្អាកក្នុងរយៈពេលមេរោគឆ្លងកូវីដ ១៩ នេះប៉ុណ្ណោះ។ ក្រៅពីនេះការងារប្រចាំថ្ងៃរបស់ខ្ញុំ ព្យាបាលជំងឺអប់រំផ្លូវចិត្ត សម្រួលសរសៃជូនបងប្អូន ជាការជួយធម្មទានមិនគិតប្រាក់អ្វីទាំងអស់»។
គួររំឭកឲ្យដឹងថា លោកព្រឹទ្ធាចារ្យ ហុក ឈាងគីម មានបទពិសោធជំនាញបង្វឹកកីឡាច្រើនប្រភេទ ក្នុងកម្រិតខ្ពស់ និងបានបណ្តុះបណ្តាលកូនចៅឲ្យភ្ជាប់ខ្លួនក្នុងកីឡារហូត។ ស្នាដៃរបស់លោក ក្រៅពីបច្ចេកទេសកីឡាគាត់បានសរសេរសៀវភៅថែទាំសុខភាពតាមរយៈសមាធិអប់រំផ្លូវចិត្ត ចែកជូនមហាជនដោយមិនគិតប្រាក់ ហើយក្រៅពីភាសាខ្មែរ លោកតាចេះភាសាបារាំង អង់គ្លេស និងរុស្ស៊ីផងដែរ៕
