.jpg)
ការប្រជែងដណ្តើមបាល់ក្នុងការប្រកួតផ្តាច់ព្រ័ត្ររវាងក្រុមខេត្តបាត់ដំបង (ឆ្វេង) និងខេត្តស្វាយរៀង។ សហការី
ភ្នំពេញៈ ការប្រកួតកីឡាសិស្សថ្នាក់ជាតិលើកទី ១ ឆ្នាំ ២០១៩ ដែលបានចាប់ដំណើរការតាំងពីថ្ងៃទី ១០ ខែមិថុនាមកនោះបានបញ្ចប់កាលពីល្ងាចថ្ងៃអង្គារ ហើយជាលទ្ធផលក្រុមអត្តពលិករបស់រាជធានីភ្នំពេញបានជាប់លេខ ១ ក្នុងនាមជាអ្នកឈ្នះបានមេដាយមាសច្រើនជាងគេ ប៉ុន្តែខេត្តចំនួន ៣ មិនដណ្តើមបានមេដាយណាមួយសោះ។
តាមរយៈការប្រកួតប្រជែងនៅលើប្រភេទកីឡាចំនួន ១១ មានបាល់ទាត់ បាល់ទះ បាល់បោះ តេក្វាន់ដូ ITF អត្តពលកម្ម ហែលទឹក ប៉េតង់ វាយកូនឃ្លីលើតុ វាយសី តេក្វាន់ដូ WTF និងការ៉ាតេនោះ ក្រុមអត្តពលិករបស់រាជធានីភ្នំពេញបានឈ្នះមេដាយមាស ២៧ ប្រាក់ ១៩ និងសំរឹទ្ធ ១៤ ដើម្បីឈរនៅចំណាត់ថ្នាក់លេខ ១ ក្នុងចំណោមខេត្ត-ក្រុងទាំង ២៥ ដែលបានចូលរួមក្នុងការប្រកួតកីឡាសិស្សថ្នាក់ជាតិលើកដំបូងនេះ។
ចំណែកក្រុមអត្តពលិកខេត្តកណ្តាលបានឈរនៅលេខ ២ ដោយឈ្នះបានមេដាយមាស ១០ ប្រាក់ ២ សំរឹទ្ធ ១៤ ហើយតាមពីក្រោយដោយខេត្តកំពត ដែលឈ្នះបានមេដាយមាស ៩ ប្រាក់ ១៨ សំរឹទ្ធ ៩ ខេត្តកំពង់ឆ្នាំង មាស ៦ ប្រាក់ ៤ សំរឹទ្ធ ៤ ខេត្តព្រះសីហនុបានមាស ៥ ប្រាក់ ៣ សំរឹទ្ធ ៤ ខេត្តកំពង់ចាមមានមាស ៤ ប្រាក់ ៦ សំរឹទ្ធ ១៦ និងខេត្តបាត់ដំបងបានមាស ៤ ប្រាក់ ៦ សំរឹទ្ធ ៨។
ចំណែកខេត្តកំពង់ស្ពឺបានឈរនៅលេខ ៨ ដោយឈ្នះបានមេដាយមាស ៤ ប្រាក់ ៦ សំរឹទ្ធ ៤ ខេត្តស្ទឹងត្រែងបានមាស ៤ ប្រាក់ ៤ សំរឹទ្ធ ១ ខេត្តពោធិ៍សាត់បានមាស ៤ ប្រាក់ ១ ខេត្តកំពង់ធំ បានមាស ៣ ប្រាក់ ៤ សំរឹទ្ធ ៦ ខេត្តប៉ៃលិនបានមាស ៣ ប្រាក់ ១ សំរឹទ្ធ ១ ខេត្តតាកែវបានមាស ២ ប្រាក់ ៣ សំរឹទ្ធ ៥ ខេត្តឧត្តរមានជ័យ មាស ២ ប្រាក់ ២ សំរឹទ្ធ ១ ខេត្តព្រៃវែង មាស ២ ប្រាក់ ១ សំរឹទ្ធ ៥ ខណៈខេត្តរតនគិរីបានឈ្នះមេដាយមាស ២ ប្រាក់ ១ និងសំរឹទ្ធ ៥។
ជាមួយគ្នានេះខេត្តស្វាយរៀងឈរនៅលេខ ១៧ ដោយឈ្នះបានមេដាយមាស ១ ប្រាក់ ៤ សំរឹទ្ធចំនួន ៣ តាមពីក្រោយដោយខេត្តមណ្ឌលគិរី ដែលឈ្នះបានមាស ១ ប្រាក់ ៤ សំរឹទ្ធ ១ ខេត្តសៀមរាបមាស ១ ប្រាក់ ១ សំរឹទ្ធ ៦ ខេត្តបន្ទាយមានជ័យមាស ១ ប្រាក់ ១ សំរឹទ្ធ ៣ ខេត្តត្បូងឃ្មុំមានប្រាក់ ៤ សំរឹទ្ធ ៥ ខេត្តក្រចេះ បានមេដាយសំរឹទ្ធ ២ ប៉ុន្តែខេត្តកែប កោះកុង និងខេត្តព្រះវិហារមិនដណ្តើមបានមេដាយនោះទេ បើទោះបីជាព្រឹត្តិការណ៍នេះមានមេដាយសរុបចំនួន ៣០៧ មានមាស ៩៥ ប្រាក់ចំនួន ៩៥ និងមេដាយសំរឹទ្ធចំនួន ១១៧ ក៏ដោយ។
នៅក្នុងជ័យជម្នះនេះក្រុមរាជធានីភ្នំពេញក៏បានឈ្នះពានលើការប្រកួតបាល់ទាត់ផ្នែកបុរសផងដែរ ខណៈពួកគេបានយកឈ្នះក្រុមខេត្តតាកែវក្នុងការប្រកួតផ្តាច់ព្រ័ត្រនៅទីលានវិទ្យាស្ថានអប់រំកាយ និងកីឡាកាលពីម្សិលមិញ ខណៈលេខ ៣ បានទៅក្រុមក្រចេះ ក្រោយឈ្នះក្រុមខេត្តកណ្តាល។
ចំណែកការប្រកួតបាល់ទាត់ផ្នែកនារី ក្រុមខេត្តបាត់ដំបងបានឈ្នះក្រុមខេត្តស្វាយរៀងក្នុងវគ្គផ្តាច់ព្រ័ត្រ ដើម្បីក្លាយជាម្ចាស់ជើងឯក ហើយក្រុមខេត្តសៀមរាបបានយកឈ្នះក្រុមខេត្តកំពង់ឆ្នាំងក្នុងការដណ្តើមយកលេខ ៣។ បន្ថែមលើនេះរាជធានីភ្នំពេញក៏បានឈ្នះគ្រងជើងឯកការប្រកួតបាល់បោះទាំងផ្នែកបុរស និងនារីផងដែរ ខណៈលេខ ២ ផ្នែកបុរសបានទៅក្រុមខេត្តត្បូងឃ្មុំលេខ ៣ ខេត្តតាកែវ ហើយលេខ ២ ផ្នែកនារីបានទៅក្រុមត្បូងឃ្មុំ និងលេខ ៣ ក្រុមខេត្តសៀមរាប៕
