.jpg)
អតីតស្តេចអុកឆ្នាំ ២០១៦ លោក ហូយ សូណា បានត្រឹមចំណាត់ថ្នាក់លេខ ២ ក្នុងការប្រកួតជម្រុះប្រចាំមណ្ឌលខេត្តក្រចេះ។ ស្រេង ម៉េងស្រ៊ុន
ភ្នំពេញៈ ការប្រកួតជម្រុះតាមតំបន់ ដើម្បីស្វែងរកបេក្ខភាពឡើងទៅប្រកួតប្រជែងយកតំណែងស្តេចអុក នៃព្រឹត្តិការណ៍ការប្រកួតអុកចត្រង្គពានរង្វាន់អង្គរសង្រ្កាន្ត ប្រចាំឆ្នាំ ២០១៨ បានរកឃើញជើងខ្លាំងចំនួន ៣ នាក់ទៀត ប្រចាំនៅមណ្ឌលខេត្តក្រចេះ ក្រោយការប្រកួតជម្រុះចំនួន ៤ ខេត្តបានបញ្ចប់ កាលពីថ្ងៃចន្ទ។
លោក ឈាវ បូរ៉ា អគ្គលេខាធិការសហព័ន្ធកីឡាអុកកម្ពុជា បានប្រាប់នៅថ្ងៃអង្គារនេះថា នៅមណ្ឌលខេត្តក្រចេះនេះ មានការប្រកួតជម្រុះចំនួន ៤ ខេត្ត មានខេត្តក្រចេះ ខេត្តស្ទឹងត្រែង ខេត្តមណ្ឌលគិរី និងខេត្តរតនគិរី ប៉ុន្តែមានបេក្ខភាព បានដាក់ពាក្យចូលរួមប្រកួតប្រជែងតែ៧នាក់ប៉ុណ្ណោះ ធ្វើឲ្យការប្រកួតជម្រុះយកជើងខ្លាំង ៣ នាក់ ប្រចាំមណ្ឌលនេះ បានចំណាយពេលតែមួយព្រឹកទេ។
ជុំវិញការខ្សត់ខ្សោយចំនួនអ្នកចូលរួមប្រកួតជម្រុះ នៅមណ្ឌលខេត្តក្រចេះនេះ លោក ឈាវ ប៉ូរា បានបញ្ជាក់ថា៖«មូលហេតុ ដែលខ្សត់បេក្ខជនចូលរួមប្រកួតនៅមណ្ឌលខេត្តក្រចេះនេះ គឺបណ្តាលមកពីគេខ្លាចជើងខ្លាំងៗ ឈរនៅក្នុងមណ្ឌលក្រចេះនេះតែម្តង គឺ ហូយ សូណា និង ប៊ិន គាសេង នេះឯង ដែលធ្លាប់ឈ្នះចំណាត់ថ្នាក់ល្អ ក្នុងការប្រកួតស្តេចអុកកន្លងមក»។
តាមរយៈការប្រកួតត្រឹមមួយព្រឹក កាលពីថ្ងៃចន្ទនោះ កីឡាករ ប៉ោ សារិទ្ធ មកពីខេត្តមណ្ឌលខេត្តមណ្ឌលគិរី ដែលធ្លាប់ទទួលចំណាត់ថ្នាក់លេខ ៤ ក្នុងការប្រកួតអង្គរសង្រ្កាន្ត កាលពីឆ្នាំ ២០១០ បានទទួលចំណាត់ថ្នាក់លេខ ១ ប្រចាំមណ្ឌលខេត្តក្រចេះនេះ ឯលេខ ២ បានទៅលើកីឡាករ ហូយ សូណា មកពីខេត្តក្រចេះ ដែលអតីតស្តេចអុក កាលពីឆ្នាំ ២០១៦ ហើយលេខ ៣ បានទៅកីឡាករមកពីខេត្តក្រចេះ ប៊ិន គាសេង ដែលធ្លាប់ទទួលបានលេខ ៣ កាលពីឆ្នាំ២០១៥ និងលេខ ២ កាលពីឆ្នាំ ២០១៧ នៃការប្រកួតជុំផ្តាច់ព្រ័ត្រ នៅអង្គរសង្រ្កាន្ត។
កីឡាករ ប៊ិន គាសេង (ឆ្វេង) ពេលប្រកួតជាមួយដៃគូប្រកួតកន្លងមក ខណៈនៅឆ្នាំនេះលោកបានទទួលចំណាត់ថ្នាក់លេខ៣ប្រចាំមណ្ឌលខេត្តក្រចេះ។ ស្រេង ម៉េងស្រ៊ុន
ប្រភពពីគណៈកម្មការរៀបចំប្រកួត បានឲ្យដឹងថា នៅថ្ងៃអាទិត្យ ទី ១ ខែមេសា ឆ្នាំ ២០១៨ ខាងមុខនេះ ការប្រកួតនឹងធ្វើដំណើរទៅប្រកួតជម្រុះរកជើងខ្លាំងចំនួន ៣ រូបទៀត នៅមណ្ឌលខេត្តបាត់ដំបង ដែលជាមណ្ឌលចុងក្រោយបង្អស់។
លោក ឈាវ បូរ៉ា បន្ថែមថា៖ «ក្រោយបញ្ចប់ការប្រកួតនៅមណ្ឌលខេត្តបាត់ដំបង យើងនឹងបន្តមកប្រកួតជម្រុះថ្នាក់ជាតិ រវាងបេក្ខជនចំនួន ២៤ នាក់ ដែលត្រូវធ្វើនៅថ្ងៃទី ៨ ខែមេសា នៅទីស្នាក់ការគណៈកម្មាធិការជាតិអូឡាំពិកកម្ពុជា ដើម្បីរកបេក្ខជន ៨ នាក់ចុងក្រោយ ឡើងទៅប្រកួតយកតំណែងស្តេចអុក ប្រចាំឆ្នាំ ២០១៨ នៅមហាសង្គ្រាន ក្នុងថ្ងៃចូលឆ្នាំខ្មែរ នៅអង្គរវត្ត ខេត្តសៀមរាប»៕
លោក ប៉ោ សារិទ្ធ បានទទួលចំណាតើថ្នាក់លេខ១ ក្នុងការប្រកួតជម្រុះប្រចាំនៅមណ្ឌលខេត្តក្រចេះ។ រូប សហការី
