.jpg)
លោក Malik ប្រធាន FACR ថ្លែងក្នុងសន្និសីទកាសែត។ សហការី
ក្រុងប្រាក៖ សហព័ន្ធបាល់ទាត់សា.ឆែក (FACR) បានសម្រេចដកតួនាទីគណៈកម្មការអាជ្ញាកណ្ដាល កាលពីថ្ងៃចន្ទ ក្នុងនោះរួមទាំងប្រធាន Jozef Chovanec ពោលគឺ ៣ ថ្ងៃ ក្រោយប៉ូលិសឆ្មក់ចូលស្នាក់ការរបស់ FA និងទីតាំងផ្សេងៗទៀតទូទាំងប្រទេស និងបានចោទប្រកាន់មនុស្ស ២០ នាក់ពីបទពុករលួយ។
អនុប្រធាន FACR លោក Roman Berbr ម្នាក់ក្នុងចំណោមមនុស្សទាំង ២០ នាក់ ដែលជាប់ចោទពីបទរៀបលទ្ធផលទុកមុន កាលពីថ្ងៃសុក្រ បានដាក់ពាក្យលាលែង ហើយពេលនេះ កំពុងជាប់នៅឯមន្ទីរឃុំឃាំងរបស់ប៉ូលិស។
អតីតភ្នាក់ងារប៉ូលិសសម្ងាត់ លោក Berbr វ័យ ៦៦ ឆ្នាំ ដែលជាបុគ្គលដ៏មានឥទ្ធិពលម្នាក់ ក្នុងវិស័យបាល់ទាត់របស់ឆែក បានដាក់ពាក្យលាលែងពីតួនាទី តាមរយៈមេធាវីរបស់គាត់ បន្តិចមុនមានការប្រជុំវិសាមញ្ញរបស់សហព័ន្ធ។ នេះបើតាមប្រធានសហព័ន្ធជាតិ លោក Martin Malik ថ្លែង នៅឯសន្និសីទកាសែត។
លោក Malik បាននិយាយថា៖ «ពួកយើងគ្រប់គ្នា ដែលមានសកម្មភាព ក្នុងវិស័យបាល់ទាត់ឆែក បណ្ដោយឱ្យរឿងនេះកើតឡើង។ ស្ថានភាព ដែលយើងប្រឈមជាមួយ នាពេលនេះ គឺមិនធម្មតានោះឡើយ។ វាជាការប៉ះពាល់យ៉ាងធ្ងន់ធ្ងរដល់ស្នូលនៃវិស័យបាល់ទាត់។ ខ្ញុំមិនអាចប្រាប់បានទេថា តើទំហំនៃការប៉ះពាល់នោះ នឹងមានកម្រិតណា?»។
លោកប្រធានរូបនេះ ប្រាប់ទៀតថា សហព័ន្ធនឹងរួមសហការយ៉ាងជិតដិតជាមួយអាជ្ញាធរប៉ូលិស ដើម្បីបង្កើតក្រុមពិសេស ១ ដែលផ្តោតទៅលើការទប់ស្កាត់នូវការរៀបលទ្ធផលទុកមុន ពោលគឺស្រដៀងនឹងសមាជិករបស់សហព័ន្ធបាល់ទាត់អឺរ៉ុបដែរ (UEFA) ដែរ ហើយជាមួយគ្នានេះ FACR បានរាយការណ៍ពីស្ថានភាពនេះឱ្យ UEFA ដឹងរួចរាល់ហើយ។
ប្រព័ន្ធសារព័ត៌មានក្នុងស្រុកបានធ្វើសេចក្ដីរាយការណ៍ថា ការចោទប្រកាន់នៃការរៀបលទ្ធផលទុកមុននេះ កំពុងត្រូវបានតាមដានយ៉ាងហ្មត់ចត់ផងដែរសម្រាប់លីគអាជីពកម្រិតទី២ និងទី៣ របស់សា.ឆែក ដោយអាជ្ញាកណ្ដាលមួយចំនួន កំពុងស្ថិតក្រោមការស៊ើបអង្កេត។
ជាផ្នែក ១ នៃផែនការ ៧ ចំណុច ដើម្បីដោះស្រាយបញ្ហានេះ គណៈកម្មាធិការនាយកប្រតិបត្តិ បញ្ជាឱ្យសើរើឡើងវិញបញ្ហាហិរញ្ញវត្ថុតាមផ្នែកនីមួយៗ ដោយផ្ដោតជាសំខាន់លើផ្នែករបស់លោក Berbr។
សហព័ន្ធនឹងបន្តកម្មវិធីរបស់ខ្លួនផងដែរ ក្នុងការជ្រើសរើសអាជា្ញកណ្ដាល និងអ្នកត្រួតពិនិត្យថ្មី ទាំងសម្រាប់ការប្រកួតអាជីព និងមិនអាជីព ដើម្បីទប់ស្កាត់ការកើតមានការរៀបលទ្ធផលទុកមុន។
លោក Malik បានបន្ថែមថា៖ «ខ្ញុំសូមធ្វើការអះអាងថា ៧ ចំណុចនេះ គ្រាន់តែជាការចាប់ផ្ដើមនៃដំណើរផ្លូវដ៏វែងឆ្ងាយ ដែលវិស័យបាល់ទាត់ឆែក ត្រូវតែធ្វើ ដើម្បីឱ្យទទួលបានមកវិញនូវទំនុកចិត្ត ពីសំណាក់អ្នកគាំទ្រ ដៃគូឧបត្ថម្ភ និងសាធារណជនទូទៅ»៕ AFP/VN
