ភ្នំពេញៈ ថ្នាក់ដឹកនាំកីឡារបស់ក្រសួងមហាផ្ទៃ គ្រោងនឹងជំរុញឲ្យក្រុមប៉ូលិស នៅទូទាំងប្រទេសកម្ពុជា ធ្វើការហ្វឹកហាត់ក្បាច់គុន រហូតដល់ខ្សែក្រវាត់ខ្មៅ ដើម្បីឲ្យប៉ូលិស មានសមត្ថភាពកាន់តែខ្លាំង ក្នុងការយកក្បាច់គុនទាំងនេះ ទៅប្រើប្រាស់ក្នុងភារកិច្ចរបស់ខ្លួន និងការពារសុខសុវត្ថិភាព ជូនប្រជាពលរដ្ឋ។
ប្រធានអង្គភាពកីឡាក្រសួងមហាផ្ទៃ លោក ជា ប៊ុនហេង បាននិងកំពុងរៀបចំបង្កើតឲ្យមានសហព័ន្ធកីឡាយុទ្ធសិល្ប៍នគរបាលអន្តរជាតិ ដើម្បីបណ្តុះថ្នាក់ថ្នាល និងគ្រូបង្វឹកនៅលើប្រភេទកីឡាចំនួន ៥ មុនពេលឈានទៅដល់ការបញ្ចូនគ្រូបង្វឹកជំនាញទាំងនោះចេញទៅបង្វឹកដល់ក្រុមប៉ូលិស នៅតាមស្នងការនគរបាល ទូទាំងប្រទេសកម្ពុជា។
លោក ប៊ុនហេង បញ្ជាក់ថា៖ «យើង នឹងបង្កើតឲ្យមានជាសហព័ន្ធកីឡាយុទ្ធសិល្ប៍នគរបាលអន្តរជាតិ ដើម្បីប្រមូលកម្លាំងសរុបទាំងអស់ឲ្យក្លាយទៅជាគ្រូបង្វឹក និងថ្នាក់ដឹកនាំ ហើយយើងនឹងបញ្ជូនពួកគេឲ្យបង្វឹកដល់គ្រប់ប៉ូលិស នៅតាមស្នងការរាជធានីខេត្តទាំង ២៥ ដើម្បីឲ្យកងកម្លាំងនគរបាលរបស់យើងទូទាំងប្រទេស សុទ្ធតែមានជំនាញខាងកីឡាប្រយុទ្ធ និងស្នៀតការពារខ្លួន»។
លោកបន្តថា៖ «កាលណាពួកគាត់ មានចំណេះជំនាញខាងកីឡាប្រយុទ្ធ គឺគាត់អាចបំពេញបេសកកម្ម ចាប់ចងជនខិលខូច ដោយមិនចាំបាច់ប្រើកាំភ្លើងទេ ហើយខ្ញុំជឿថា យ៉ាងយូររយៈពេល ៣ ឆ្នាំទៀត ប៉ូលិសរបស់យើងនឹងមានជំនាញខាងកីឡាប្រយុទ្ធ។ ហេតុនេះជាគោលដៅ យើងត្រូវបង្កើត សហព័ន្ធកីឡាយុទ្ធសិល្ប៍នគរបាលអន្តរជាតិ មួយក្នុងអង្គភាពប៉ូលិស ព្រោះសហព័ន្ធនោះ ជាអ្នកប្រមូលផ្តុំ និងបណ្តុះថ្នាក់ថ្នាល គ្រូជំនាញ គ្រូបង្គោល ឲ្យបានចំនួនសមស្របទៅនឹងរាជធានីខេត្ត ហើយជាជំហានទី ២ យើងអាចបញ្ជូនគ្រូទាំងអស់នោះ ឲ្យចុះបង្ហាត់ដល់អធិការ នគរបាលគ្រប់ស្រុក នៅទូទាំងប្រទេស»។
លោកបន្ថែមថា៖ «ការនិយាយបែបនេះ មិនមែនមានន័យថា កន្លងមក ក្រុមប៉ូលិសយើង អត់ធ្លាប់ហាត់នោះទេ ប៉ុន្តែការហាត់ ជារបៀបបណ្តុះបណ្តាលរយៈពេលខ្លី អ៊ីចឹងចំណេះដែលគាត់ទទួលបាន អត់អាចយកទៅប្រើការអីកើតទេ។ ដោយឡែកលើកនេះ កីឡាប្រយុទ្ធ ដែលបញ្ចុះដល់គ្រប់ប៉ូលិសមូលដ្ឋាននេះ គឺត្រូវតែហាត់ឲ្យដល់ខ្សែក្រវាត់ខ្មៅយ៉ាងតិច ហើយកាលណាគាត់មានជំនាញកីឡាប្រយុទ្ធដូចជាការ៉ាតេដូ យូដូ តេក្វាន់ដូ អៃគីដូ ហាប់គីដូ ជាដើម គឺពួកគាត់នឹងក្លាយជាកម្លាំងមួយ ដែលមានប្រសិទ្ធភាព ទៅជាកម្លាំងប្រកបដោយសក្តានុពល ហើយគាត់អាចធានាការពារសន្តិសុខ សុវត្ថិភាពជូនប្រជាពលរដ្ឋ គ្រប់មជ្ឈដ្ឋាន»។
ជាមួយនឹងផែនការនេះ អង្គភាពកីឡាក្រសួងមហាផ្ទៃ ចាប់គិតពីឥឡូវនេះទៅ ហើយនឹងចាប់អនុវត្តជាក់ស្តែងពីដើមឆ្នាំ ២០១៩ ទៅ។ លោក ជា ប៊ុនហេង បានប្រាប់ទៀតថា៖ «ពេលនេះយើងមានគ្រូបង្វឹកប្រមាណ ២០ ទៅ ៣០ នាក់ ហើយយើងនឹងសុំគោលការណ៍ទៅសម្តេច ដើម្បីបញ្ចុះពួកគាត់ទៅគ្រប់ស្នងការដ្ឋានប៉ូលិសនៅទូទាំងប្រទេស ទាំង ២៥ រាជធានីខេត្ត ហើយយើងនឹងបណ្តុះបណ្តាលគ្រូបន្ថែមទៀត»។
យ៉ាងណាក៏ដោយ អង្គភាពកីឡាក្រសួងមហាផ្ទៃ គ្រោងយកតែ ៥ ប្រភេទកីឡាសិន សម្រាប់ឲ្យប៉ូលិស ហាត់។ លោក ប៊ុនហេង បញ្ជាក់ថា៖ «បច្ចុប្បន្ន យើងមានប្រភេទកីឡាប្រយុទ្ធចំណុះឲ្យក្រសួងមហាផ្ទៃ ចំនួន ១៣ ប៉ុន្តែ ជំហានដំបូង យើងយកក្បាច់គុនរបស់កូរ៉េ និងជប៉ុនសិន ក្នុងនោះកូរ៉េ យើងយកហាប់គីដូ និងតេក្វាន់ដូ ហើយជប៉ុន យើងយកការ៉ាតេដូ យូដូ និងអៃគីដូ។ ខ្ញុំគិតថា ៥ ប្រភេទកីឡាហ្នឹងសិនបានហើយ ប៉ុន្តែយើងក៏មិនចោលកីឡាប្រពៃណីខ្មែរ ដូចជាចំបាប់បុរាណ និងប្រដាល់គុនខ្មែរនោះដែរ គ្រាន់តែយើងគិតនៅជំហានបន្ទាប់»៕