ភ្នំពេញ: ក្រុមកីឡាករ កីឡាការិនីសូហ្វតិន្នីសរបស់សមាគមកីឡាក្រសួងមហាផ្ទៃបានប្រមូលយកមេដាយមាសទាំងអស់ពីការប្រកួតកីឡាសូហ្វតិន្នីសដណ្តើមពានរង្វាន់សម្តេចក្រឡាហោម ស ខេង លើកទី ៦ ឆ្នាំ ២០១៩ ដែលទើបបានបញ្ចប់កាលពីថ្ងៃអាទិត្យ ខណៈកីឡាករ កាន់ សោភ័ណ្ឌ បានធ្វើឲ្យមានការភ្ញាក់ផ្អើលខ្លាំងនៅពេលរូបគេបានឈ្នះមេដាយមាសទាំង ២ លើក្របខ័ណ្ឌក ១ នោះ។
តាមរយៈការប្រកួតចំនួន ៣ ថ្ងៃដែលបានចាប់ផ្តើមកាលពីថ្ងៃសុក្រនៅលើទីលានសូហ្វតិន្នីសក្នុងពហុកីឡដ្ឋានជាតិនោះគឺមានអត្តពលិកចំនួន ៩០ នាក់ (ស្រី ២៥ នាក់) មកពីក្លិបសមាគមចំនួន ៦ បានចូលរួម ហើយជាលទ្ធផល ក្រុមអត្តពលិករបស់ក្រសួងមហាផ្ទៃបានឈ្នះមេដាយមាសទាំង ៧ វិញ្ញាសាទាំងលើការប្រកួតក្របខ័ណ្ឌក ២ និងក ១ រួមជាមួយមេដាយប្រាក់ ៤ និងសំរឹទ្ធចំនួន ៥ ទៀត។
ចំណែកក្លិបអគ្គស្នងការដ្ឋាននគរបាលជាតិបានឈ្នះមេដាយប្រាក់ ២ និងសំរឹទ្ធ ៤ ក្លិបក្រសួងការពារជាតិបានឈ្នះមេដាយប្រាក់ ១ សំរឹទ្ធ ២ ក្លិបខេត្តកំពង់ស្ពឺឈ្នះបានមេដាយសំរឹទ្ធ ២ និងក្លិបជប៉ុនបានឈ្នះមេដាយសំរឹទ្ធ ១ ប៉ុន្តែក្លិបខេត្តកំពង់ឆ្នាំង និងក្លិបអង្គការមិត្តសម្លាញ់មិនដណ្តើមបានមេដាយពីការប្រកួតនេះទេ។
នៅក្នុងចំណោមមេដាយមាសទាំង ៧ នោះកីឡាករឆ្នើម កាន់ សោភ័ណ្ឌ បានឈ្នះមេដាយមាស ២ តែម្នាក់ឯងនៅក្នុងការប្រកួតក្របខ័ណ្ឌក ១ ខណៈរូបគេបានយកឈ្នះលើមិត្តរួមក្រុម អន សម្បត្តិ ក្នុងវគ្គផ្តាច់ព្រ័ត្រ ដើម្បីឈ្នះបានមេដាយមាសទី ២ បន្ថែមទៅលើការឈ្នះមេដាយមាសលើវិញ្ញាសាវាយគូជាមួយ ឯក ចំរើន នោះ។
«នៅថ្ងៃនេះ កាន់ សោភ័ណ្ឌ ដូចខ្មោចចូលអ៊ីចឹង គឺវាយបានល្អមែនទែន។ វាបានដាក់សម្ពាធមកលើខ្ញុំរហូត ហើយបាល់យ៉ាងម៉េចក៏វាយកបានដែរ។ ខ្ញុំមានអារម្មណ៍ថានៅថ្ងៃនេះខ្ញុំដូចបានប្រកួតជាមួយកីឡាករលេខ ១ របស់ជប៉ុនអ៊ីចឹង ហើយខ្ញុំពិតជាសប្បាយចិត្តដែលឃើញមិត្តរួមក្រុមរបស់ខ្ញុំលេងបានល្អបែបនេះ»។ នេះជាការលើកឡើងរបស់ អន សម្បត្តិ ដែលបានកោតសរសើរទៅដល់សមត្ថភាពប្រកួតរបស់ កាន់ សោភ័ណ្ឌ បន្ទាប់ពីរូបគេបាន ចាញ់ក្នុងវគ្គផ្តាច់ព្រ័ត្រ។
នៅក្នុងការប្រកួតនោះ កាន់ សោភ័ណ្ឌ បានសម្រាកតែជាង ១០ នាទីប៉ុណ្ណោះ ក្នុងការចូលទៅកាន់ទីលានប្រកួតវគ្គផ្តាច់ព្រ័ត្រជាមួយ អន សម្បត្តិ គឺបន្ទាប់ពីរូបគេបានរួមគ្នាជាមួយ ឯក ចំរើន យកឈ្នះលើកីឡាករ ចន ម៉ាដា និង ឌឹម សំសម្បត្តិ ក្នុងវគ្គផ្តាច់ព្រ័ត្រលើវិញ្ញាសាវាយគូ។
កីឡាករ កាន់ សោភ័ណ្ឌ បាននិយាយថា៖ «ខ្ញុំមានអារម្មណ៍ថា ហត់ដែរ ក្រោយការប្រកួតវាយគូរួច ប៉ុន្តែពេលបន្តទៅជួប អន សម្បត្តិ ខ្ញុំបានប្តេជ្ញាចិត្តប្តូរដោយការវាយគាបសង្កត់ទៅលើគេ ព្រោះបើខ្ញុំមិនធ្វើបែបនេះ ខ្ញុំនឹងចាញ់ ហើយម្យ៉ាងទៀតក៏អាចមកពី អន សម្បត្តិ មានអារម្មណ៍មិនសូវល្អផងដែរ ដោយសារប្អូនប្រុសរបស់គេបានស្លាប់ និងទើបតែបូជាថ្មីៗនេះ»។
ចំណែកលោកឧត្តមសេនីយ៍ឯក ជា ប៊ុនហេង អនុប្រធានទី ១ សហព័ន្ធកីឡាសូហ្វតិន្នីសកម្ពុជាបានថ្លែងថា៖ «ការប្រកួតនេះវាបានផ្តល់នូវបទពិសោធថ្មីៗបន្ថែមទៀតទៅដល់អត្តពលិករបស់យើងក្នុងការពង្រឹងសមត្ថភាពឲ្យកាន់តែល្អ ហើយគិតមកដល់ពេលនេះសម្តេចក្រឡាហោម ស ខេង ជាប្រធានសហព័ន្ធបានឧបត្ថម្ភយ៉ាងច្រើនក្នុងការជួយជំរុញឲ្យកីឡាសូហ្វតិន្នីសកម្ពុជាឲ្យមានការរីកចម្រើនយ៉ាងខ្លាំង និងដណ្តើមបានមេដាយជាបន្តបន្ទាប់នៅលើឆាកអន្តរជាតិ»៕