.jpg)
ក្រសួងមហាផ្ទៃ រំពឹងឈ្នះមេដាយមាសទាំងអស់ ពីការប្រកួតសូហ្វតិន្នីស ក្នុងកីឡាជាតិ លើកទី ២។ ស្រេង ម៉េងស្រ៊ុន
ភ្នំពេញៈ ស្ថាប័នកីឡារបស់ក្រសួងមហាផ្ទៃ បានបង្ហាញនូវមហិច្ឆតាដ៏ធំរបស់ខ្លួន គឺការឈ្នះមេដាយមាសឲ្យបានច្រើនបំផុត ដើម្បីទទួលបានចំណាត់ថ្នាក់លេខ ១ ក្នុងនាមជាអ្នកឈ្នះបានមេដាយមាសច្រើនជាងគេ ក្នុងការប្រកួតកីឡាជាតិ លើកទី ២ ឆ្នាំ ២០១៨ ដែលនឹងត្រូវរៀបចំពិធីបើកការប្រកួត នៅថ្ងៃសុក្រ ស្អែកនេះ។
បើទោះបីជាការប្រកួតកីឡាជាតិ លើកទី ១ កាលពីឆ្នាំ ២០១៦ ក្រុមអត្តពលិករបស់ក្រសួងមហាផ្ទៃ ដណ្តើមបានមេដាយតិចជាងរាជធានីភ្នំពេញ និងឈរនៅលេខរៀងទី ២ ប៉ុន្តែការបង្កើនទាំងចំនួនប្រភេទកីឡា អត្តពលិក និងការខិតខំហ្វឹកហាត់យ៉ាងសស្រាកសស្រាំកន្លងមកនេះ បានធ្វើឲ្យថ្នាក់ដឹកនាំកីឡារបស់ក្រសួងមហាផ្ទៃ មានការជឿជាក់យ៉ាងខ្លាំងថា ពួកគេ នឹងដណ្តើមបានចំណាត់ថ្នាក់លេខ ១ នៅឆ្នាំនេះជាមិនខាន។
លោក ជា ប៊ុនហេង ប្រធានអង្គភាពកីឡាក្រសួងមហាផ្ទៃ បានថ្លែងប្រាប់ភ្នំពេញ ប៉ុស្តិ៍ថា៖ «សម្រាប់ការប្រកួតកីឡាជាតិ លើកទី ១ យើងដណ្តើមបានមេដាយមាស ៣២ និងបានត្រឹមលេខ ២ ក្រោមរាជធានីភ្នំពេញ ប៉ុន្តែលើកនេះ យើងមានការប្តេជ្ញា និងសង្ឃឹមជឿជាក់ថា នឹងដណ្តើមបានចំណាត់ថ្នាក់លេខ ១ ហើយយើងអាចនឹងដណ្តើមបានមេដាយមាសចន្លោះពី ៨០ ទៅ ១០០ មេដាយ ព្រោះយើងត្រៀមលក្ខណសម្បត្តិបានល្អ»។
ជាមួយមហិច្ឆតានេះ លោក ប៊ុនហេង បានបញ្ជាក់ថា៖ «កាលកីឡាជាតិ លើកទី ១ យើងបានបញ្ជូនតែ ៩ ប្រភេទកីឡា ក្នុងចំណោម ១៥ ប្រភេទកីឡា ទៅប្រកួត ដោយមានអត្តពលិកតែជាង ១០០ នាក់ ប៉ុន្តែលើកនេះ យើងបានដាក់ ២២ ប្រភេទកីឡា ទៅប្រកួត និងមានអត្តពលិកចំនួន ២៣៨ នាក់ គឺមានការកើនឡើងជាងពាក់កណ្តាល ហើយអ្នកទាំងនេះ ភាគច្រើនជាអ្នកហ្វឹកហាត់ក្នុងក្រុមជម្រើសជាតិ ដែលមានការប្រមូលផ្តុំហ្វឹកហាត់បានល្អ មានសក្តានុពល និងគុណភាពបច្ចេកទេសខ្ពស់ ធានាថា អាចដណ្តើមបានចំណាត់ថ្នាក់លេខ ១ នៅទូទាំងប្រទេស»។
ចំពោះប្រភេទកីឡាទាំង ២២ ដែលក្រសួងមហាផ្ទៃ ដាក់ឲ្យប្រកួតប្រជែង ក្នុងកីឡាជាតិ លើកទី ២ នេះ មានបាល់បោះ (បុរស) បាល់ទះ (បុរស) សីដក់ វ៉ូវីណាម តេក្វាន់ដូ (WTF) សូហ្វតិន្នីស វាយសី វាយកូនឃ្លីលើតុ ចំបាប់ យូដូ សូរិនហ្ស៊ិកាំប៉ូ ប្រដាល់សកល ប្រដាល់គុនខ្មែរ ល្បុក្កតោ បាញ់កាំភ្លើង ការ៉ាតេដូ កាយសម្ព័ន្ធ ប៉េតង់ ទ្រីយ៉ាត្លុង ហែលទឹក អត្តពលកម្ម និងកីឡាបេស្បល គឺអត់មានតែកីឡាបាល់ទាត់បុរស បាល់ទាត់នារី តេក្វាន់ដូ (ITF) បាល់បោះនារី និងបាល់ទះនារី ប៉ុណ្ណោះ។
នៅក្នុងប្រភេទកីឡាទាំង ២២ នេះ លោក ជា ប៊ុនហេង ជាអនុប្រធានសហព័ន្ធកីឡាសូហ្វតិន្នីសកម្ពុជា ផងនោះមានការជឿជាក់ខ្លាំងលើប្រភេទកីឡាហែលទឹក សូហ្វតិន្នីស និងអត្តពលកម្មខ្លាំងជាងគេ។
លោកបានលើកឡើងថា៖ «កីឡាហែលទឹក មាន មេដាយ មាស ១៨ អ៊ីចឹងយ៉ាងហោចណាស់ក៏យើងបាន ១៦ ដែរ ហើយអត្តពលកម្មដែលមាន ៣០ មេដាយមាសនោះ យើង អាចនឹងដណ្តើមបានជាងពាក់កណ្តាល ឯសូហ្វតិន្នីស ដែលមាន ៧ មេដាយមាស គឺយើងនឹងដណ្តើមយកទាំងអស់តែម្តង ព្រោះនេះជាប្រភេទកីឡារបស់យើង»។
ចំណែកប្រភេទកីឡាចំបាប់ ការ៉ាតេដូ យូដូ ល្បុក្កតោ វ៉ូវីណាម បាញ់កាំភ្លើង ប៉េតង់ កាយសម្ព័ន្ធ និងប្រដាល់ ជាដើម ក៏ស្ថិតនៅក្នុងក្តីសង្ឃឹម ក្នុងការឈ្នះបានមេដាយមាសច្រើន របស់ក្រសួង មហាផ្ទៃ ផងដែរ។ យ៉ាងណាក៏ដោយ សម្រាប់ការត្រៀមការប្រកួតកីឡាជាតិនេះ ក្រសួងមហាផ្ទៃ បានចំណាយថវិកាចូលជាង ៣ ម៉ឺនដុល្លារ សម្រាប់ការទិញសម្ភារកីឡា និងផ្តល់ប្រាក់លើកទឹកចិត្តមុនការប្រកួតដល់ក្រុមប្រភេទកីឡាទាំង ២២ ហើយថវិកាទាំងនេះ ត្រូវបានលោកឧត្តមសេនីយ៍ឯក ជា ប៊ុនហេង បញ្ជាក់ថា៖ «ថវិកាទាំងអស់នេះទទួលបានការឧបត្ថម្ភពីសម្តេចក្រឡាហោម ស ខេង គឺសម្តេចបានជួយដល់កីឡារបស់យើងច្រើនណាស់ ព្រោះបើអត់សម្តេច ខ្ញុំមិនដឹងជាគិតចេញទៅច្រកណាទេ!»៕
