ក្រុងម៉ានីល: កីឡាករយុទ្ធគុនចម្រុះ (MMA) របស់កម្ពុជា មាស ម៉ើ បានចាញ់ដោយសន្លប់ក្នុងទឹកទី ១ ក្នុងពេលប្រកួតជាមួយនឹងកីឡាករហ្វីលីពីន Edward “The Ferocious” Kelly ក្នុងទម្ងន់ ៧០,៣ គីឡូក្រាម នាព្រឹត្តិការណ៍ ONE: Global Superheroes ក្នុងទីក្រុងម៉ានីល ប្រទេសហ្វីលីពីន កាលពីថ្ងៃសុក្រ។
ក្នុងពេលចាប់ផ្តើមប្រកួតក្នុងទឹកទី ១ Kelly បានព្យាយាមវាយសម្រុកទៅលើមាស ម៉ើ ភ្លាមៗ និងបានប្រើកណ្តាប់ដៃវាយទៅលើកីឡាករកម្ពុជារូបនេះ ៣ ដៃភ្លាមៗ មុននឹងបន្ថែមមួយដៃទៀតដើម្បីបញ្ចប់គូប្រកួតឲ្យដួលលើសង្វៀនក្នុងទឹកនោះតែម្តង។ ដោយឡែក ក្នុងការប្រកួតគូឯកក្នុងព្រឹត្តិការណ៍ដែលរៀបចំឡើងដោយអង្គភាព ONE Chamhpionship (ONE) កីឡាករ Geje “Gravity” Eustaquio របស់ហ្វីលីពីន បានក្លាយជាម្ចាស់ខ្សែក្រវាត់ពិភពលោករបស់ ONE ជាបណ្តោះអាសន្ន ក្នុងទម្ងន់ ៦១,២ គីឡូក្រាម ក្រោយពីបានផ្តួលកីឡាករ Kairat “The Kazakh” Akhmetov ដោយពិន្ទុជាឯកច្ឆន្ទក្នុងការប្រកួតរយៈពេល ៥ ទឹកពេញ។
បើទោះបីកីឡាករ Akhmetov របស់កាហ្សាក់ស្ថាន បានបង្ហាញពីស្នៀតចំបាប់របស់គេបានយ៉ាងល្អក៏ដោយ ប៉ុន្តែ ក្បាច់នោះមិនមានប្រសិទ្ធភាពក្នុងពេលប្រកួតជាមួយនឹង Eustaquio ឡើយ ខណៈដែលកីឡាករម្ចាស់ស្រុករូបនេះ បានវាយចេញល្អជាងសម្រាប់ការប្រកួតដណ្តើមខ្សែក្រវាត់បណ្តោះអាសន្ននេះ។ Eustaquio បានដាក់សម្ពាធទៅលើ Akhmetov តាមរយៈការវាយកណ្តាប់ដៃ និងស្នៀតក្លេផ្សេងៗក្នុងការប្រកួតទាំង ៥ ទឹក។ ទីបំផុត ចៅក្រមទាំងពីរ បានសម្រេចផ្តល់ជ័យជម្នះដោយពិន្ទុជាឯកច្ឆន្ទទៅឲ្យ Eustaquio តែម្តង។
បន្ទាប់ពីបញ្ចប់ការប្រកួត Eustaquio បាននិយាយថា៖ «ខ្ញុំមិនដឹងត្រូវនិយាយអ្វីឡើយ។ ខ្សែក្រវាត់នេះមិនមែនសម្រាប់ខ្ញុំក្នុងការទទួលយកឡើយ ប៉ុន្តែ វាជារបស់យើងទាំងអស់គ្នា។ ខ្ញុំសូមអរណរគុណដល់ក្រុមគ្រួសាររបស់ខ្ញុំ ដែលតែងតែគាំទ្រខ្ញុំតាំងពីចាប់ផ្តើម លោកគ្រូបង្វឹក Mark Sangiao និងក្រុម Team Lakay ទាំងមូល ដែលមិនធ្លាប់សង្ស័យលើខ្ញុំ និងតែងតែជឿជាក់ថា ថ្ងៃមួយ ខ្ញុំនឹងឈរដោយមានខ្សែក្រវាត់ក្នុងដៃ»។
កីឡាកររូបនេះបានបន្ថែមទៀតថា៖ «ខ្ញុំពិតជាមានមោទនភាពណាស់ក្នុងការបង្ហាញទង់ជាតិនេះដល់ពិភពលោកទាំងមូល។ នេះគឺជាម្ចាស់ជើងឯកពិភពលោករបស់លោកអ្នកពីប្រទេសហ្វីលីពីន។ Adriano Moraes ខ្ញុំដឹងថា អ្នកនៅទីនោះ។ ខ្ញុំដណ្តើមបានខ្សែក្រវាត់មួយហើយ។ សូមឲ្យខ្ញុំសាកល្បងម្តងទៀត ហើយខ្ញុំសង្ឃឹមថា នឹងផ្តល់ឲ្យអ្នកនូវការប្រជែងកាន់តែតានតឹងនៅពេលនេះ»។
ក្នុងការប្រកួតគូឯកមួយគូទៀតនាថ្ងៃដដែលនោះ កីឡាករវ័យ ២២ ឆ្នាំ Joshua “The Passion” Pacio បានបន្ថែមកំណត់ត្រាដ៏ល្អលើស្នៀតក្លេរបស់គេ តាមរយៈការផ្តួលកីឡាករចិន Lan Ming Qiang ក្នុងការប្រកួតទម្ងន់ ៥៦,៧ គីឡូក្រាម ដោយការប្រើប្រាស់ស្នៀតក្លេបំពង់ខ្យល់ឲ្យចុះចាញ់ក្នុងទឹកទី ១៕ IS
លទ្ធផលផ្លូវនៃគូផ្សេងទៀត
ទម្ងន់ ៧០,៣ គ.ក្រ: Rafael Nunes ផ្តួល Eric Kelly ដោយស្នៀតក្លេបំពង់កក្នុងទឹកទី ២
ការប្រកួតមួយថៃ: Sam-A Gaiyanghadao ផ្តួល Jose-ph “The Hurricane” Lasiri ឲ្យសន្លប់ទឹកទី ២
ទម្ងន់ ៦១,២ គ.ក្រ: Ma Hao Bin ផ្តួល Sotir Kichukov ដោយពិន្ទុជាឯកច្ឆន្ទ បន្ទាប់ពីប្រកួត ៣ ទឹក
ទម្ងន់ ៥៦,៧ គ.ក្រ: Hayato Suzuki ផ្តួល Yago Bryan ដោយស្នៀតក្លេបំពង់កនៅទឹកទី ១
ទម្ងន់ ៧០,៣ គ.ក្រ: Emilio Urrutia ផ្តួល Bruno Pucci ឲ្យសន្លប់នៅទឹកទី ១
ទម្ងន់ ៥៦,៧ គ.ក្រ នារី: Jom-ary Torres ផ្តួល April Osenio ឲ្យសន្លប់ទឹកទី ១
ទម្ងន់ ៧៧,១ គ.ក្រ: Rajinder Singh Meena ផ្តួល Zhang Ze Hao ដោយស្នៀតក្លេបំពង់កនៅទឹកទី ១
ទម្ងន់ ៥៦,៧ គ.ក្រ: Adrian Matheis ផ្តួល Eddey Kalai ដោយស្នៀតក្លេបំពង់កនៅទឹកទី ១