ភ្នំពេញ៖ កីឡាករ មាស សារ៉ាក់ បានដាក់គោលដៅថា នឹងផ្តួលថៃ Kev Tab ឲ្យសន្លប់ នៅក្នុងការប្រកួតជម្រុះសន្សំពិន្ទុខ្សែក្រវាត់ KIC នៅលើសង្វៀន One TV នាល្ងាចថ្ងៃអាទិត្យ ខណៈ អ្នកដែលមិនទាន់ស្គាល់ការឈ្នះ យុគ យក្សផ្លែ និង Lafan ត្រូវប្រជែងគ្នាយក ៣ ពិន្ទុ ជាលើកដំបូង។
យក្សផ្លែ និង Lafan សុទ្ធតែបានចាញ់តាំង ២ លើកដូចគ្នា ហើយការវិលមកជួបគ្នាលើកនេះ វាជាពេលវេលាដែលពួកគេចង់រកឲ្យឃើញការឈ្នះបានម្តង បើទោះបីជាអស់ឱកាសប្រជែងឡើងទៅវគ្គ ១/២ ផ្តាច់ព្រ័ត្រក៏ដោយ។
លោក ថាញ់ វ៉ាឡេក គ្រូបង្វឹកថៃបាននិយាយថា៖ «លើកនេះ Lafan ខំវ៉ៃយកឈ្នះ ដើម្បីស្តារមុខមាត់វិញឲ្យបាន។ បើគិតបូកទាំងការប្រកួតក្រៅខ្សែក្រវាត់នេះ Lafan បានជួបការបរាជ័យចំនួន ៤ លើក នៅស្រុកខ្មែរ ហើយលើកនេះសង្ឃឹមឈ្នះ ៦០ ភាគរយ»។
ចំណែកលោក ឡុង ស៊ីលីន គ្រូបង្វឹក យក្សផ្លែ ប្រាប់ថា៖ «យក្សផ្លែ ហ្វឹកហាត់បានល្អ ប៉ុន្តែគេធ្លាក់ទឹកចិត្តខ្លាំង ព្រោះ ២ ប្រកួតកន្លងមកនេះ បានចាញ់ទាំង ២ លើក ពិសេសការចាញ់លើកទី១ ជាមួយ Tha Vat គឺមិនអស់ចិត្ត។
លោកបន្តថា៖ «ទោះអស់ឱកាសបានឡើងទៅវគ្គបន្ត ប៉ុន្តែលើកនេះធានាវ៉ៃអស់ពីសមត្ថភាព។ អ្នកទាំងនេះ មិនធ្លាប់ជួបគ្នាទេ ហើយសមត្ថភាពប្រហាក់ប្រហែលគ្នា ប៉ុន្តែជំនាញល្អមួយផ្នែកម្នាក់ទេ ដោយ យក្សផ្លែ ល្អកណ្តាប់ដៃ ឯ Lafan ល្អជង្គង់»។
ផ្ទុយពីនេះ មាស សារ៉ាក់ ដែលបានឈ្នះទាំង ២ ប្រកួតនោះ គ្រោងនឹងផ្តួលថៃដែលចាញ់ទាំង ២ លើក Kev Tap ឲ្យសន្លប់ ដើម្បីប្រជែងជាមួយ ម៉ន សាម៉េត និង អេលីត ចំរើន។ សារ៉ាក់ បានប្រាប់ថា៖ «ខ្ញុំនឹងផ្តួល Kev Tab ឲ្យសន្លប់មុនទឹកទី៥ ទៅតាមឱកាស ដែលអាចធ្វើបានដើម្បីប្រជែងជាមួយ ម៉ន សាម៉េត និង អេលីត ចំរើន ដែលឈរក្នុងពូលកម្ពុជាមួយគ្នា ព្រោះអ្នកទាំង ២ នេះ បានឈ្នះទាំង ៣ លើកដូចគ្នា»។
លោក ចាន់ សុទ្ធ ប្រធានវិនិច្ឆ័យដឹកនាំការប្រកួតនេះ ប្រាប់ថា៖ «គណៈកម្មការបច្ចេកទេស និងសហព័ន្ធក៏ដូចអ្នកគ្រប់គ្រងកម្មវិធី កំពុងតាមដានសកម្មភាពប្រកួតរបស់កីឡាករថៃទាំង ៤ រូប ដែលកន្លងមកពួកគេប្រកួតចាញ់ ពេលខ្លះហាក់បីដូចមិនទំនង។ បើមានភាពមិនប្រក្រតីណាមួយកើតឡើង មន្ត្រីបច្ចេកទេស ត្រៀមចាត់ការតាមច្បាប់មិនខាន ដោយសហការជាមួយភាគីពាក់ព័ន្ធ»៕