.jpg)
មុត ខ្លឹមខ្មៅ សង្ឃឹមមានឱកាសប្រកួតកាន់តែច្រើនក្រោយផ្ទេរក្លិប។ យឺន ពន្លក
ភ្នំពេញ: កីឡាករប្រដាល់ជើងខ្លាំងមួយរូប ដែលធ្លាប់សាងភាពល្បីល្បាញ និងធ្លាប់ឈ្នះខ្សែក្រវាត់ ២ ស្ថាប័ន ឯម ខ្លឹមខ្មៅ ឬមុត ខ្លឹមខ្មៅបានដាក់ពាក្យផ្ទេរពីក្លិបប្រដាល់អាណាចក្រគុនខ្មែរ ទៅកាន់ក្លិបកំចាយមារនៃក្រសួងមហាផ្ទៃ ដើម្បីស្វែងរកការប្រកួតឲ្យបានច្រើនសង្វៀន ខណៈពេលនៅក្នុងក្លិបចាស់ រូបគេត្រូវបានគេចងជើងឲ្យចាំតែឡើងប្រកួតសម្រាប់សង្វៀនប្រដាល់របស់ទូរទស្សន៍បាយ័នតែមួយប៉ុណ្ណោះ។
កីឡាករវ័យ ២៤ ឆ្នាំរូបនេះ មានស្រុកកំណើតនៅភូមិស្ពានកណ្តោល ឃុំបវេល ស្រុកបវេល ខេត្តបាត់ដំបង។ ក្លិបអាណាចក្រគុនខ្មែរដែលគ្រប់គ្រងដោយលោកធី ណារិទ្ធ ជំនួយការផ្គូផ្គងកីឡាប្រដាល់ប្រចាំសង្វៀនបាយ័ន និងអ្នកគ្រប់គ្រងក្លិបថ្មីកំចាយមារគឺលោក អ៊ីចំរើន ដោយមានលោក គង់ ចាន់ធីណា ជាគ្រូបង្វឹក បានឯកភាពផ្ទេរ និងទទួលរួចហើយកាលពីព្រឹកថ្ងៃទី ២១ ខែឧសភា ឆ្នាំ ២០១៨ ម្សិលមិញ តាមការស្នើសុំរបស់មុត ខ្លឹមខ្មៅ។
មុត ខ្លឹមខ្មៅ ជាកីឡាករល្បីល្បាញមួយរូប ភាគច្រើនប្រកួតនៅក្នុងសង្វៀនបាយ័ន និងមានអាជីពជាអ្នកប្រដាល់រយៈពេលជាង ១០ ឆ្នាំមកហើយ ដោយមានប្រវត្តិប្រកួតជាង ១០០ លើក ក្នុងនោះធ្លាប់ឈ្នះខ្សែក្រវាត់ស្រាបៀរកម្ពុជាទម្ងន់ ៦៣,៥ គីឡូក្រាមឆ្នាំ ២០១៣ ពីផល សោភ័ណ្ឌ និងបានរបូតខ្សែក្រវាត់នេះវិញដោយបានចាញ់កីឡាករ រឿង សោភ័ណ្ឌ នៅឆ្នាំ ២០១៤ នៅសង្វៀនបាយ័ន។
មុត ខ្លឹមខ្មៅ ធ្លាប់ឈ្នះខ្សែក្រវាត់ស្រាបៀរលីអូទម្ងន់ ៦៥ គីឡូក្រាមនៅសង្វៀនបាយ័នមួយទៀត ក្នុងវគ្គផ្តាច់ព្រ័ត្រជាមួយកីឡាករឆៃ សារ៉ា ក្នុងឆ្នាំ ២០១៧ កន្លងមក។
មុត ខ្លឹមខ្មៅ ធ្លាប់នៅក្នុងក្លិបនិរោធន៍មានជ័យរបស់លោកឯម ច័ន្ទសុផល ក្រោយមកផ្ទេរទៅកាន់ក្លិបអាណាចក្រគុនខ្មែររបស់លោកធី ណារិទ្ធ ហើយពេលនេះសុំផ្ទេរ ទៅកាន់ក្លិបចំណុះឲ្យក្រសួងមហាផ្ទៃ ក្រោមការគ្រប់គ្រងរបស់លោកគង់ ចាន់ធីណា។ ខ្លឹមខ្មៅ បានឲ្យដឹងថា៖ «ការសុំផ្លាស់ប្តូរក្លិបនេះ ខ្ញុំបានសុំអនុញ្ញាតពីគ្រូដើមត្រឹមត្រូវ ដោយមានការផ្តិតមេដៃចុះហត្ថលេខាប្រគល់ និងទទួលត្រឹមត្រូវពីអ្នកគ្រប់គ្រងក្លិបចាស់ និងអ្នកគ្រប់គ្រងក្លិបថ្មី»។
មុត ខ្លឹមខ្មៅ បានបន្តថា៖ «មូលហេតុដែលផ្លាស់ប្តូរក្លិបនេះគឺចង់បានបទពិសោធ និងសេរីភាពភាពឡើងប្រកួតឲ្យបានច្រើនសង្វៀន ដើម្បីទទួលបានប្រាក់កម្រៃតម្លៃខ្លួនច្រើន ជាមួយកីឡាករបរទេស ពីព្រោះនៅក្លិបចាស់របស់ខ្ញុំកន្លងមក គេចងជើងឲ្យចាំតែប្រកួតក្នុងសង្វៀនបាយ័នតែមួយប៉ុណ្ណោះ ដែលយើងរកប្រាក់ចំណូលបានតែមួយច្រក។ ក្នុងក្លិបថ្មីនេះ ខ្ញុំនឹងហ្វឹកហាត់ឲ្យបានល្អឡើងវិញ និងសុំឲ្យសហព័ន្ធប្រដាល់ចាប់គូឡើងប្រកួតគ្រប់សង្វៀនតាមកម្មវិធី ដោយគ្មានប្រកាន់ ឬរើសអើងអ្វីឡើយ»៕
