ក្រុងឡុងដ៍: ក្រុមមេឃខៀវ Manchester City បានប្រកាសឲ្យដឹងពីការផ្ទេរយកខ្សែបម្រើស្លាប Ferran Torres ពីក្រុមនៅអេស្ប៉ាញ Valencia ដើម្បីយកមកពង្រឹងក្រុមរដូវកាលក្រោយ ជាពិសេសតំបន់ប្រយុទ្ធ ខណៈលោក Pep Guardiola (Pep) កំពុងសម្លឹងមើលអ្នកមកជំនួសកន្លែងរបស់កីឡាកសញ្ជាតិអាល្លឺម៉ង់ Leroy Sane ដែលចាកចេញទៅចូលរួមជាមួយក្លិបនៅប្រទេសកំណើត Bayern Munich។
កីឡាករសញ្ជាតិអេស្ប៉ាញវ័យ ២០ ឆ្នាំ ដែលក្លាយជាសមាជិកថ្មីដំបូងគេរបស់ក្រុម Man City អំឡុងពេលទីផ្សារដោះដូរកីឡាករនារដូវក្ដៅនេះ បានព្រមព្រៀងចុះហត្ថលេខាលើកិច្ចសន្យាដែលមានរយៈពេល ៥ ឆ្នាំ ជាមួយនឹងតម្លៃជាបឋម ដែលត្រូវបានបញ្ចេញឲ្យដឹង ២០ លានផោន (២៧ លានដុល្លារ)។
ក្រោយមានការផ្ទេរនេះកើតឡើង កីឡាករ Torres បានឲ្យដឹងតាមរយៈវេបសាយរបស់ក្លិបនៅក្របខ័ណ្ឌ Premier League មួយនេះថា៖ «ខ្ញុំរីករាយណាស់ ដែលចូលរួមជាមួយក្រុម Man City។ កីឡាករគ្រប់រូប តែងតែចង់ចូលរួមជាមួយក្រុម ដែលមានតំបន់ប្រយុទ្ធមុតស្រួច ហើយក្រុម Man City គឺជាក្រុម ១ ក្នុងចំណោមក្រុម ដែលមានទម្រង់លេងបែបហ្នឹងរបស់ពិភពលោក»។
កីឡាករ Torres បានបន្តទៀតថា៖ «លោក Pep ធ្វើឲ្យមានវិធីសាស្ត្រលេងមួយ ដែលទូលំទូលាយ និងវាយសម្រុយយ៉ាងពិតប្រាកដ ហើយគាត់ គឺជាអ្នកចាត់ការម្នាក់ ដែលមានកំណត់ត្រាល្អបំផុត ក្នុងការអភិវឌ្ឍកីឡាករ។ មានគាត់មកពិនិត្យមើលការអភិវឌ្ឍន៍របស់ខ្ញុំ ហាក់ដូចកំពុងយល់សប្តិអ៊ីចឹង»។
កីឡាករ Torres អាចលេងទាំងស្លាបឆ្វេង និងស្ដាំ ព្រមទាំងតំបន់កណ្ដាល ជាមួយនឹងល្បឿន និងកម្លាំងរបស់គេ អាចធ្វើកីឡាករគូប្រជែងពិបាក ក្នុងការរារាំងរូបគេណាស់។ កាលពីរដូវកាល ដែលទើបបញ្ចប់ទៅថ្មីៗនេះ គេបង្ហាញខ្លួនជាមួយក្រុម Valencia បាន ៤៤ លើក ក្នុងនោះស៊ុតបញ្ចូលទីបាន ៦ គ្រាប់៕ AFP/VN