ក្រុងមេនឆេស្ទ័រ៖ ក្រុមមេឃខៀវ Manchester City ធ្វើឲ្យក្រុមហង្សក្រហម Liverpool រង់ចាំទៀតក្នុងការឈ្នះពានលីកលំដាប់កំពូលជាលើកដំបូង ក្នុងរយៈពេល ៣០ ឆ្នាំ ក្រោយក្រុមរបស់ Pep Guardiola មួយនេះ យកឈ្នះក្រុមកាំភ្លើងធំ Arsenal ដែលសល់គ្នាតែ ១០ នាក់ ៣-០ អំឡុងការប្រកួត នៅឯកីឡដ្ឋានទទេស្អាត Etihad ដោយនេះជាការដណ្ដើមបាន ៣ ពិន្ទុលើកទី១ សម្រាប់ការវិលមកមានសកម្មភាពឡើងវិញនៃក្របខ័ណ្ឌ Premier League កាលពីយប់ថ្ងៃពុធ។
មុនផ្ដើមការប្រកួត កីឡាករក្រុមទាំង ២ មកជុំគ្នាលុតជង្គង់ម្ខាងតវ៉ាចំពោះភាពអយុត្តិធម៌ក្នុងសង្គម ហើយទង្វើនេះ ក៏មានដែរក្នុងជំនួបរវាងក្រុម Aston Villa និង Sheffield United គូដំបូងគេនៃកម្មវិធី «Project Restart» របស់ Premier League ក្រោយផ្អាករយៈពេល ១០០ ថ្ងៃ ដោយសារតែវិបត្តិនៃវីរុសកូរ៉ូណា។
ការប្រកួតនេះ បានបង្ហាញឲ្យឃើញពីគុណភាពខុសគ្នានៃក្រុមទាំង ២ ពេលក្រុម Man City ធ្វើឲ្យខ្សែការពាររបស់ក្រុម Arsenal គឺ David Luiz ជួបនូវសុបិនអាក្រក់ ដោយត្រូវបានរិះគន់ថា ជាដើមហេតុដ៏ធំនាំឲ្យក្រុមចាញ់ ដោយសារបង្កកំហុសម្ដងហើយម្ដងទៀត។
កំហុសដំបូងរបស់កីឡាករ David Luiz កើតឡើងនៅចុងម៉ោងវគ្គទី១ ពោលគឺនាទីទី ៤៥+២ ពេលខ្សែបម្រើបែលហ្ស៊ិក Kevin De Bruyne ចោះបាល់ចូលទៅតំបន់គ្រោះថ្នាក់ ហើយកីឡាករប្រេស៊ីលស្កាត់បាល់ភ្លាត់ស្នៀត ធ្វើឲ្យខ្សែបម្រើសញ្ជាតិអង់គ្លេស Raheem Sterling មានឱកាសបំប៉ោងសំណាញ់ទីបានសម្រេចជួយឲ្យក្រុមមេឃខៀវ នាំមុខបណ្ដោះអាសន្ន ១-០។
វគ្គទី២ កីឡាករ David Luiz មិនត្រឹមតែបានផ្ដល់កាដូឲ្យក្រុមម្ចាស់ផ្ទះនូវបាល់ពិន័យ ១១ ម៉ែត្រ ដោយការទាញកីឡាករ Riyad Mahrez ឲ្យដួលប៉ុណ្ណោះទេ ថែមទាំងខ្លួនឯងត្រូវអាជ្ញាកណ្ដាលផ្ដល់កាតក្រហមទៀតផង ខណៈអ្នកចាំទី Bernd Leno មិនអាចរារាំងគ្រាប់បាល់របស់កីឡាករ De Bruyne បានឡើយសម្រាប់បាល់ប៉េណាល់ទីនេះ។ ក្រោយនាំមុខ ២-០ ក្រុម Man City ធ្វើការវាយសម្រុកជារឿយៗ តែទម្រាំបានគ្រាប់បាល់ទី៣ ត្រូវរង់ចាំដល់ចុងម៉ោងនាទីទី ៩០+២ ទើបខ្សែប្រយុទ្ធ Phil Foden អាចស៊ុតទម្លុះសំណាញ់ទីបាន។
កីឡាករវ័យ ៣៣ ឆ្នាំ David Luiz ដែលជិតអស់កិច្ចសន្យាជាមួយក្លិបហើយនោះ ទទួលយកការស្ដីបន្ទោសនេះ ដោយនិយាយប្រាប់ទូរទស្សន៍ Sky Sports ថា៖ «វាមិនមែនជាកំហុសរបស់ក្រុមទេ ជាកំហុសរបស់ខ្ញុំ។ ខ្ញុំគិតថា ក្រុមធ្វើបានល្អ បើទោះជាសល់ ១០ នាក់ក្ដី។ លោកគ្រូបង្វឹកគាត់រៀបចំបានល្អ។ គ្រប់គ្នាធ្វើបានល្អទាំងអស់ លើកលែងខ្ញុំ»។
ជ័យជម្នះរបស់ក្រុម Man City បានបន្ថយគម្លាតនាំមុខរបស់ក្រុម Liverpool មកត្រឹម ២២ ពិន្ទុ ត្រឹមសប្ដាហ៍ទី ២៩ នេះ ដែលនេះមានន័យថា ក្រុមរបស់លោក Jurgen Klopp មិនទាន់អាចលើកពានលីកទី១ នេះនៅឡើយទេ ត្រូវរង់ចាំបន្តិចទៀត។ អ្វីដែលគួរឲ្យកត់សម្គាល់ដែរក្នុងប្រកួតនេះ គឺអក្សរ «Black Lives Matter» នៅពីខាងក្រោយខ្នងអាវរបស់កីឡាករទាំង ២ ក្រុម ដែលជាធម្មតា ត្រូវបានដាក់តែឈ្មោះកីឡាករ និងលេខប៉ុណ្ណោះ៕ AFP/VN