ក្រុងឡុងដ៍៖ កីឡាករ Kevin De Bruyne មានឱកាសស៊ុតបាល់ពិន័យ ១១ ម៉ែត្រ តែមិនសម្រេច ដូចធ្វើឱ្យក្រុម Manchester City ខ្ជះខ្ជាយឱកាសរំកិលទៅកៀកក្រុម Liverpool ខណៈខ្សែប្រយុទ្ធ Harry Kane របស់ក្រុម Tottenham Hotspur (Spurs) អបអរនឹងគ្រាប់ទី ១៥០ នៅ Premier League កាលពីថ្ងៃអាទិត្យ។
ជ័យជម្នះនៅកីឡដ្ឋាន Etihad នឹងនាំឱ្យហង្សក្រហមឡើងទៅទីកំពូលតារាង តែសង្គ្រាមរវាងក្រុមមហាអំណាចបាល់ទាត់ទាំង ២ នៅប៉ុន្មានរដូវចុងក្រោយនេះ បានបញ្ចប់ទៅត្រឹមលទ្ធផល ១-១។
អ៊ីចឹងមានន័យថា Leicester City នៅតែលេខ ១ ក្រោយឈ្នះ Wolverhampton Wanderers ១-០ នៅផ្ទះខ្លួនឯង ហើយក្រុមកំពុងមានសម្ទុះ Spurs ឈរទី២ បន្ទាប់ពីធ្វើដំណើរទៅយក ៣ ពិន្ទុ ពីម្ចាស់ផ្ទះ West Brom ជាមួយនឹងគ្រាប់បាល់ទី ១៥០ របស់់ Kane។
ក្រុមរបស់លោក Jurgen Klopp ធ្វើការវាយសម្រុកយ៉ាងសន្ធាប់ ពេលប្រកួតចាប់ផ្ដើម ដោយខ្សែប្រយុទ្ធទាំង ៤ Sadio Mane, Mohamed Salah, Roberto Firmino និង Diogo Jota បង្កការភ័យខ្លាចដល់ក្រុមម្ចាស់ផ្ទះម្ដងហើយម្ដងទៀត។
ក្រុមភ្ញៀវ បើកការនាំមុខ នៅនាទីទី១៣ ពេល Salah ទម្លុះសំណាញ់ទី ដោយបាល់ ១១ ម៉ែត្រ ក្រោយ Kyle Walker បង្កកំហុសចំពោះ Mane ក្នុងតំបន់គ្រោះថ្នាក់ តែ Man City តាមស្មើនៅនាទីទី៣១ ពីការស៊ុតរបស់ Gabriel Jesus។
ក្រុមរបស់ លោក Pep Guardiola (Pep) ទទួលបានបាល់ប៉េណាល់ទី មុនឈប់សម្រាក ១៥ នាទី ក្រោយពិនិត្យមើលវីដេអូជំនួយការអាជ្ញាកណ្ដាល (VAR) តែប្រធានក្រុម De Bruyne ស៊ុតខុសគោលដៅ។
លទ្ធផលស្មើនេះ ធ្វើឱ្យ Liverpool នៅលេខ ៣ ជាមួយនឹង ១៧ ពិន្ទុ ក្រោយប្រកួតបាន ៨ លើក ដោយតាមពីក្រោយក្រុមកំពូលតារាង Leicester ១ ពិន្ទុ និងនាំមុខដាច់ ៥ ពិន្ទុលើ Man City។
លោក Klopp និង Pep រួមគ្នាជំរុញឱ្យមានការដូរកីឡាករបាន ៥ នាក់ ដែលត្រូវបានអនុញ្ញាតកាលពីចុងរដូវកាលមុន មុននឹងមកដូចដើមវិញ ពោលគឺប្ដូរបានត្រឹម ៣ នាក់។
«យើងពិភាក្សាគ្នាថា តើត្រូវតស៊ូ ម្ដងហើយម្ដងទៀតយ៉ាងដូចម្ដេចពាក់ព័ន្ធនឹងករណីការផ្លាស់ប្ដូរបាន ៥ រូប»។ នេះជាសម្ដីរបស់លោក Pep ពេលត្រូវបានសួរពីប្រធានបទ ដែលគាត់សន្ទនាជាមួយលោក Klopp។
បុរសអេស្ប៉ាញវ័យ ៤៩ ឆ្នាំ បន្ថែមថា៖ «ទូទាំងពិភពលោក គេអនុវត្តការផ្លាស់ប្ដូរ ៥ នាក់។ យើងជឿថា យើងគឺលីគពិសេស តែដូរបាន ៣ នាក់ អ៊ីចឹងបានន័យថា យើងអត់យកចិត្តទុកដាក់ចំពោះកីឡាករ»។
ចំណែក លោក Klopp ចោទនាយកប្រតិបត្តិរបស់ Premier League ថា ខ្វះភាពជាអ្នកដឹកនាំចំពោះបញ្ហានេះ ដោយប្រាប់ថា៖ «មិនមែនជាការទាញយកផលទេ តែជាការចាំបាច់»។
រីឯ Kane រកបាន ១៥០ គ្រាប់ហើយ នៅលីគកំពូល ក្រោយតែតគ្រាប់ជ័យជម្នះឲ្យ Spurs ហើយមានតែអតីតកីឡាករ Alan Shearer និង Sergio Aguero របស់ Man City ប៉ុណ្ណោះ ដែលឈានដល់ចំណុចនេះ គ្រាន់តែលេងច្រើនជាង ២-៣ ដង៕ AFP/VN