ក្រុងរ៉ូម: ខ្សែបម្រើ Marek Hamsik ប្រធានក្រុមនៃក្រុម Napoli បានបំពេញការផ្ទេររបស់គេទៅកាន់ក្លិប Dalian Yifang របស់ក្របខ័ណ្ឌចិន Super League។ នេះបើយោងទៅការបញ្ជាក់ប្រាប់ពីមេធាវីនៃក្លិបស្ថិតក្នុងក្របខ័ណ្ឌ Serie A មួយនេះទៅកាន់វិទ្យុអ៊ីតាលីកាលពីថ្ងៃពុធ។ លោក Mattia Grassani មេធាវីប្រចាំក្លិប Napoli បានប្រាប់វិទ្យុ Kiss Kiss ថា៖ «Hamsik គឺជាកីឡាករម្នាក់របស់ Dalian ចាប់ពីល្ងាចនេះតទៅ»។
ខ្សែបម្រើអន្តរជាតិស្លូវ៉ាគីរូបនេះដែលបច្ចុប្បន្នកំពុងតែស្ថិតនៅទីក្រុង Banska Bystrica ទីកន្លែងកំណើតរបស់គេនឹងដំណើរទៅដល់ប្រទេសចិននៅថ្ងៃសុក្រនេះ។ ដំបូងឡើយ Napoli បានព្យួរការផ្ទេរនេះដោយសារតែបញ្ហាទាក់ទងនឹង «វិធីសាស្ត្រនៃការទូទាត់ប្រាក់» ជាមួយនឹងក្លិបរបស់ចិនដែលស្ថិតក្រោមការដឹកនាំរបស់លោកគ្រូបង្វឹកសញ្ជាតិអាល្លឺម៉ង់ Bernd Schuster។
កាសែត Gazzetta Dello Sport បានចេញផ្សាយកាលពីថ្ងៃពុធថាក្រោមការចរចាម្តងទៀតតម្លៃខ្លួននៃការផ្ទេរក្នុងទឹកប្រាក់ ២០ លានអឺរ៉ូ (ស្មើនឹង ២២,៦ លានដុល្លារអាមេរិក) នឹងត្រូវទូទាត់ ២ ដំណាក់កាលដោយទឹកប្រាក់ ៥ លានអឺរ៉ូត្រូវបង់ឲ្យភ្លាមៗហើយ ១៥ លានអឺរ៉ូទៀតនឹងត្រូវធានាថានឹងទូទាត់ក្នុងរយៈពេល ១ ឆ្នាំ។
លោក Aurelio De Laurentiis ម្ចាស់ក្លិប Napoli ក៏បានទាមទារឲ្យបន្ថែមការធានាពីធនាគារផងដែរពីសំណាក់ក្លិបចិន។ Hamsik វ័យ ៣១ ឆ្នាំដែលបានបង្ហាញខ្លួនជាអន្តរជាតិ ១១១ លើកសម្រាប់ក្រុមជម្រើសជាតិស្លូវ៉ាគីបានចូលលេងឲ្យក្លិប Napoli ចាប់តាំងពីឆ្នាំ ២០០៧។
រូបគេបានស៊ុតបាល់បញ្ចូលទី ១២១ គ្រាប់ក្នុងការបង្ហាញខ្លួន ៥២០ លើក និងបានឡើងឈរពីលើវីរបុរសប្រចាំក្លិប Diego Maradona (១១៥ គ្រាប់) កាលពីរដូវកាលមុនក្នុងនាមជាអ្នករកបានគ្រាប់បាល់ច្រើនជាងគេ។ ការផ្ទេរក្នុងកុងត្រារយៈពេល ៣ ឆ្នាំនេះនឹងធ្វើឲ្យរូបគេទទួលបានប្រាក់ចំណូលប្រចាំឆ្នាំ ៩ លានអឺរ៉ូ (ស្មើ ១០,២ លានដុល្លារ) ពោលគឺ ៣ ដងបើធៀបទៅនឹងប្រាក់ខែដែលរូបគេទទួលបាននៅអ៊ីតាលី៕ IS