ភ្នំពេញ: ក្រោយកីឡាករម៉ន រដ្ឋា រងគ្រោះធ្ងន់ធ្ងរដោយគ្រោះថ្នាក់ចរាចរណ៍ និងចូលសម្រាកក្នុងមន្ទីរពេទ្យកាល់ម៉ែតសង្គ្រោះបន្ទាន់ ដោយឆ្លងកាត់ការវះកាត់កម្រិតធ្ងន់ជាច្រើនផ្នែក មហាជនជាសប្បុរសជនយ៉ាងច្រើនស្ម័គ្រចិត្តផ្តល់ឈាម និងឧបត្ថម្ភថវិកាបានយ៉ាងផុលផុស និងសស្រោកសស្រាំជាបន្តបន្ទាប់គួរឲ្យកោតសរសើរ ខណៈដែលស្ថាប័នគ្រប់គ្រងកីឡាមានការចូលរួមឧបត្ថម្ភក្នុងទំហំតិចតួច និងស្ងាត់ស្ងៀមជាងមហាជន។
គិតមកដល់ពេលនេះ កីឡាករម៉ន រដ្ឋា បានដឹងខ្លួន និងត្រូវបានសង្គ្រោះរួចផុតជីវិតហើយ ប៉ុន្តែមិនទាន់អាចដឹងថា ក្រោយពេលព្យាបាលជាសះស្បើយនៅអនាគតអាចធ្លាក់ខ្លួនពិការក្នុងកម្រិតណានោះឡើយទេ។
លោកគ្រូពេទ្យសុំមិនបញ្ចេញឈ្មោះម្នាក់បានបញ្ជាក់ថា ម៉ន រដ្ឋា អាចនឹងពិការជើង ពីព្រោះមានដាច់សរសៃពួរជើងច្រើនកន្លែង ប៉ុន្តែក្នុងនាមគ្រូពេទ្យ «យើងមិនអាចនិយាយប្រាប់មុនដល់សាមីខ្លួនឬគ្រួសារទេ»។
កីឡាករម៉ន សាម៉េត ជាបងប្អូន និងភាគច្រើននៅប្រចាំការមើលថែនោះ បានប្រាប់ភ្នំពេញប៉ុស្តិ៍ កាលពីម្សិលមិញថា៖ ម៉ន រដ្ឋា បានដឹងខ្លួនហើយ ប៉ុន្តែអាការមានសភាពលំបាកខ្លាំងពេលប្តូរឈាមម្តងៗ ហើយចំនួនទឹកប្រាក់ដែលខ្ញុំទទួលបានផ្ទាល់ពីសប្បុរសជនមានចំនួន ១២ ៩២០ ០០០ រៀល»។
សាម៉េត បានបន្តថា៖ «កាកបាទក្រហមជួយបានចំនួន ៤៣៥ ដុល្លារ ហើយខាងសហព័ន្ធកីឡាប្រដាល់គុនខ្មែរចំនួន ៣០០ ដុល្លារ និងខាងស្ថានីយទូរទស្សន៍បានចំនួន ៤ លានរៀល ក្រៅពីនេះមានគេជួយតាមរយៈលោកគ្រូអេ ភូថង មួយចំនួនទៀតខ្ញុំមិនទាន់ដឹង។ នេះជាការចូលរួមរបស់ជនរួមជាតិដែលតែងតែមានការអាណិតអាសូរចំពោះកីឡាករខ្មែរដែលរងគ្រោះថ្នាក់គួរឲ្យសង្វេគ»។
អ្នកស្រីសុម៉ាលី ភរិយារបស់លោកអេ ភូថង បានប្រាប់កាលពីម្សិលមិញថា៖ «ខាងខ្ញុំដែលជាគ្រូបង្វឹកទទួលបានការឧបត្ថម្ភពីលោកឧកញ៉ាស្រី ចន្ទថន ចំនួន ៤ លានរៀល និងជួយពីខាងស្ថានីយទូរទស្សន៍ឯកជនបានចំនួន ២ លានរៀលទៀត»។
ទោះជាយ៉ាងណា កាយវិការសប្បុរសជនដែលបានជួយដល់កីឡាករកំពុងមានទុក្ខគឺជាការជួយបញ្ហាក្នុងសង្គមមហាធំធេង ខណៈសកម្មភាពរបស់ស្ថាប័ននៃអង្គភាពគ្រប់គ្រងកីឡារបស់រាជរដ្ឋាភិបាល មានលក្ខណៈយឺតយ៉ាវជារឿងធម្មតា។
លោកនាយករដ្ឋមន្ត្រីហ៊ុន សែន ធ្លាប់បានប្រកាសពីរបបសន្តិសុខសង្គម ឬប័ណ្ណបសស រយៈពេលជាង ១ ឆ្នាំហើយដើម្បីជួយដល់កីឡាករ-កីឡាការិនី ប៉ុន្តែគិតមកដល់ពេលនេះ ទាំងកីឡាករកម្រិតខ្ពស់របស់ជម្រើសជាតិ និងកីឡាករកម្រិតទាបនៅមិនទាន់បានប័ណ្ណបសសនេះនៅឡើយទេ ខណៈសមាគមអ្នកធាក់ស៊ីក្លូ កម្មករ-កម្មការិនី នៅតាមរោងចក្រទទួលបានសេវានេះរួចហើយ។
លោកគ្រូពេទ្យជឹម ផល្លា ដែលនៅប្រចាំការសង្វៀនប្រកួត និងជាគ្រូពេទ្យប្រចាំក្រុមកីឡាករជម្រើសជាតិ បាននិយាយថា៖ «កីឡាករជម្រើសជាតិដែលហៅថា កីឡាករកម្រិតខ្ពស់ នៅមិនទាន់បានទទួលរបបសន្តិសុខសង្គមនេះនៅឡើយទេ។ ក្រុមកីឡាប្រដាល់ដែលជាប្រភេទកីឡាប្រយុទ្ធកំពុងតែប្រកួតនៅតាមស្ថានីយទូរទស្សន៍ឯកជនមួយចំនួនរៀងរាល់សប្តាហ៍ កំពុងត្រូវការសេវាពេទ្យនេះចាំបាច់បំផុត ហើយសព្វថ្ងៃពួកគាត់មានបញ្ហាគ្រោះថ្នាក់ម្តងៗបានប្រើប្រាស់ថវិកាពីសប្បុរសជន និងអ្នកគ្រប់គ្រងកម្មវិធីជាលក្ខណៈឯកជនប៉ុណ្ណោះ»៕