ភ្នំពេញ៖ អ្នកប្រដាល់ខ្លួនតូចចិត្តធំ ដែលធ្លាប់បានឈ្នះខ្សែទាំងក្រវាត់ចំនួន ២ និងឈ្នះមេដាយមាសថ្នាក់ជាតិ ជាច្រើនលើក ម៉ន វិរៈ បានក្លាយជាកីឡាករប្រដាល់គុនខ្មែរដំបូងគេ ដែលបានឆ្លងកូវីដ១៩ ហើយនៅពេលនេះ វិរៈ ត្រូវបានឡានពេទ្យរបស់ក្រសួងសុខាភិបាលដឹកទៅព្យាបាលនៅមជ្ឈមណ្ឌលកោះពេជ្រហើយ ចំណែកប្រពន្ធ និងក្រុមគ្រួសាររបស់ ម៉ន វិរៈ កំពុងរង់ចាំការធ្វើសំណាកពីគ្រូពេទ្យ។
តាមកីឡាករ ម៉ន សាម៉េត ដែលជាបងប្រុសបង្កើតរបស់កីឡាករ ម៉ន វិរៈ បានប្រាប់ភ្នំពេញប៉ុស្តិ៍ កាលពីព្រឹកថ្ងៃអាទិត្យថា ម៉ន វិរៈ បានឆ្លងជំងឺកូវីដ១៩ ពីបុគ្គលិករបស់ទូរទស្សន៍ CTN លោក ជិន បញ្ញា ដែលបានរកឃើញថា បានឆ្លងជំងឺកូវីដកាលពីថ្ងៃទី ១៥ ខែមេសា ឆ្នាំ ២០២១។
ម៉ន សាម៉េត បានបញ្ជាក់ថា៖ «បន្ទាប់ពីទទួលបានដំណឹងថា បង ជិន បញ្ញា បានឆ្លងជំងឺកូវីដ១៩ ខ្ញុំបានជំរុញឱ្យ ម៉ន វិរៈ ទៅធ្វើចត្តាឡីស័កនៅបឹងត្របែក ព្រោះ វិរៈ មានទំនាក់ទំនងផ្ទាល់ជាមួយបង បញ្ញា នៅពេលគាត់មកទិញត្រី នៅផ្ទះរបស់ខ្ញុំ ស្ថិតនៅភូមិចុងព្រែក សង្កាត់ព្រែកឯង ខណ្ឌច្បារអំពៅ ហើយ វិរៈ ធ្វើចត្តាឡីស័កបានត្រឹម ២៤ ម៉ោង ពោលគឺនៅរសៀលម៉ោង ៤ ត្រូវនឹងថ្ងៃសៅរ៍ ទី ១៧ ខែមេសា ក៏ត្រូវបានគ្រូពេទ្យធ្វើសំណាក ប្រាប់ថា រូបគេបានឆ្លងជំងឺកូវីដ១៩»។
កីឡាករជើងខ្លាំង ម៉ន សាម៉េត បានបង្ហាញការសោកស្តាយពីហេតុការណ៍ដ៏រន្ធត់ ដែលបានកើតមានឡើង ចំពោះ ម៉ន វិរៈ នេះ។ «ខ្ញុំពិតជាមានការសោកស្តាយ ខ្លាំងណាស់ ចំពោះការឆ្លងជំងឺកូវីដ១៩នេះ ព្រោះ វិរៈ បានថែរក្សាសុខភាព និងរក្សាគម្លាតយ៉ាងល្អ នៅក្នុងអំឡុងពេលផ្ទុះជំងឺកូវីដ១៩នេះ គឺវាមិនដែលដើរចេញក្រៅពីភូមិទេ តែបែរជាមកជួបរឿងបែបនេះ ទាល់តែបាន ប៉ុន្តែយើងក៏មិនអាចបន្ទោសបង បញ្ញា នោះដែរ ព្រោះពេលគាត់មកជួប វិរៈ នោះ ក៏គាត់មិនទាន់ដឹងថា ខ្លួនគាត់បានឆ្លងជំងឺកូវីដនេះដូចគ្នា»។
យ៉ាងណាក៏ដោយ ម៉ន សាម៉េត បានអះអាងថា រយៈពេលជាច្រើនឆ្នាំកន្លងមកនេះ ម៉ន វិរៈ មិនមានទំនាក់ទំនង និងឡើងប្រកួតនៅលើសង្វៀនប្រដាល់ណានោះទេ។ សាម៉េត បានបញ្ជាក់ថា៖ «តាំងពី ម៉ន វិរៈ បានខូចជើង ក្រោយការប្រកួតជាមួយ ថន វាសនា នៅលើសង្វៀនបាយ័នកាលពីឆ្នាំ ២០១៤ គឺគេបានឈប់ឡើងប្រដាល់រហូតមកដល់ពេលនេះ។ វិរៈ បានទៅរកត្រីតែជាមួយខ្ញុំ ដោយមិនបានទាក់ទងទៅនឹងការប្រដាល់ទៀតនោះទេ គឺវាមានទំនាក់ទំនងតែជាមួយសមាជិក នៅក្នុងក្រុមគ្រួសាររបស់ខ្ញុំ ហេតុនេះទាំងខ្ញុំ និងក្រុមគ្រូសាររបស់ខ្ញុំចំនួន ៨ នាក់ទៀតកំពុងធ្វើចត្តាឡីស័ក ដើម្បីរង់ចាំការធ្វើសំណាករបស់ក្រុមគ្រូពេទ្យ ដែលអាចនឹងធ្វើលើកទី ១ នៅរសៀល ឬល្ងាចថ្ងៃអាទិត្យនេះ»៕