ភ្នំពេញ៖ អ្នកប្រដាល់មាឌល្អិតចិត្តធំ ម៉ន សាម៉េត បានចាត់ទុកការវិលទៅជួបកីឡាករថៃ Lafan នៅលើសង្វៀន One TV រោងសៀក នារសៀលថ្ងៃអាទិត្យ ខាងមុខនេះ ថា ជាឧបសគ្គសម្រាប់រូបគេ ក្នុងការដណ្តើម៣ពិន្ទុបន្ថែម ប៉ុន្តែ អេលីត ចំរើន ហាក់មិនមានការបារម្ភ សម្រាប់ការវិលទៅជួបថៃ Kev Thab នោះទេ។
ម៉ន សាម៉េត បានប្រាប់ភ្នំពេញប៉ុស្តិ៍ថា៖ «ខ្ញុំមិនធ្លាប់ជួប Lafan ពីមុនមកនោះទេ ប៉ុន្តែតាមរយៈមើលឃ្លីបវីដេអូ គឺកីឡាករថៃរូបនេះ មានកម្លាំងល្អ ប្រកួតបានពេញ ៥ ទឹក និងស្នៀតជង្គង់ក៏ល្អដែរ ហេតុនេះខ្ញុំមានទំនុកចិត្តឈ្នះត្រឹម ៦០ ភាគរយទេ ដោយខ្ញុំព្រួយបារម្ភផ្នែកកម្លាំង ឯបច្ចេកទេស គឺសង្ឃឹមមានប្រៀបជាង»។
សិស្សគណក្លិបកងចក្ររាជសីហ៍ ម៉ន សាម៉េត បានបញ្ជាក់ថា៖ «ខ្ញុំមានសង្ឃឹមខ្ពស់ក្នុងការប្រើបច្ចេកទេស គឺត្រូវវាយចេញនូវកែងខ្លីឲ្យបានច្រើន ទើបសង្ឃឹមឈ្នះ ហើយបើនិយាយពីក្បាច់ជង្គង់ គឺលំបាកមានប្រៀបជាមួយគេណាស់ ព្រោះគេខ្ពស់ជាង»។
កីឡាករ ម៉ន សាម៉េត ធ្លាប់ប្រកួតបាន ៩០ ដង ឈ្នះ ៧៥ ចាញ់ ១២ ស្មើ ៣ និងធ្លាប់ផ្តួលដៃគូឲ្យសន្លប់ចំនួន ៣២ ដង ហើយក្នុងនោះ គេបានប្រកួតជាលក្ខណៈអន្តរជាតិចំនួន ៥៤ដង គឺប្រហាក់ប្រហែលជាមួយថៃ Lafan ដែលធ្លាប់ប្រកួត ៩១ ដង ឈ្នះ ៧៨ ចាញ់ ១៣ ក្នុងនោះផ្តួលដៃគូឲ្យសន្លប់បាន ៣៤ ដង។ យ៉ាងណាក៏កម្ពស់របស់ Lafan ខ្ពស់ជាង ម៉ន សាម៉េត។
លោក ម៉ាង ម៉ន ជាគ្រូបង្វឹក បាននិយាយថា៖ «ខ្ញុំបង្វឹកផ្ទាល់ដៃចង់ឲ្យ ម៉ន សាម៉េត វ៉ៃយកឈ្នះឲ្យបាន ដើម្បីបានឈានទៅវគ្គផ្តាច់ព្រ័ត្រ ដែលអាចនឹងបានប្រាក់រង្វាន់ច្រើន សម្រាប់ធ្វើខ្ទមមួយនៅ»។
លោក ម៉ាង ម៉ន ដែលជាឪពុកបង្កើតផងនោះ បន្ថែមថា៖ «អាម៉េត វាមានក្បាច់ល្អជាងប៉ុន្តែបារម្ភផ្នែកកម្លាំង គឺបើការប្រកួតអូសបន្លាយដល់៥ទឹក គឺយើងសង្ឃឹមតិច អ៊ីចឹងខ្ញុំចង់ឲ្យវាវាយសម្រុកខ្លាំង៣ទឹក ដើម្បីផ្តួលឲ្យថៃសន្លប់តែម្តង ហើយអ្នកប្រដាល់ត្រកូល «ម៉ន» របស់យើង ធានាវ៉ៃអស់ពីសមត្ថភាព ងាប់ចោល មិនដែលលក់កិត្តិយសការប្រកួតម្តងណាឡើយ ទោះបីជីវភាពក្រីក្រយ៉ាងណាក៏ដោយ»។
ចំណែកលោក ថាញ់ វ៉ាឡេក គ្រូបង្វឹកកីឡាករថៃ បានប្រាប់ថា៖ « Lafan ហ្វឹកហាត់ត្រៀមបានល្អ ដោយសង្ឃឹមឈ្នះ ដើម្បីទទួលបាន ៣ ពិន្ទុ ព្រោះជំនួបដំបូងចាញ់ អេលីត ចំរើន ម្តងរួចហើយ។ ជំនួបលើកនេះ គឺចាញ់ ឬឈ្នះ មានលក្ខណៈតឹងតែងណាស់ ព្រោះ Lafan ត្រូវការឈ្នះតែខ្ញុំមានទំនុកចិត្តថា Lafan នឹងឈ្នះក្នុងភាគរយខ្ពស់ គឺសង្ឃឹមឈ្នះ ៨០ ភាគរយ»។
ដោយឡែកកីឡាករ អេលីត ចំរើន ដែលត្រូវប៉ះថៃ KevThab បានអះអាងថា រូបគេមានជំនឿមុតមាំ និងសង្ឃឹមឈ្នះ ដោយគ្មានក្តីបារម្ភនោះឡើយ។ បើប្រៀបធៀបបទពិសោធឡើងសង្វៀនរបស់អ្នកប្រដាល់ទាំង ២ នេះ មានភាពប្រហាក់ប្រហែលគ្នា ប៉ុន្តែ អេលីត ចំរើន របស់កម្ពុជាមានប្រៀបផ្នែកកម្ពស់។
អេលីត ចំរើន ដែលបានយកឈ្នះពិន្ទុ Lafan កាលប្រកួតបើកឆាកនោះ បាននិយាយថា៖ «ការប្រកួតលើកទី ២ នេះ ខ្ញុំមានសង្ឃឹមឈ្នះ ១០០ ភាគរយ ព្រោះកីឡាករថៃ Kev Thab នេះអាចនឹងលំបាកទប់ទល់ជាមួយស្នៀតកែងរបស់ខ្ញុំ»។
អេលីត ចំរើន ហាក់ដូចជាមានអំនួតខ្លាំងក្នុងការយកឈ្នះកីឡាករថៃរូបនេះ ស្របពេលដែលគ្រូបង្វឹករបស់គេ ស៊ន អេលីត បានប្រាប់ថា៖ «ចំរើន ហ្វឹកហាត់ត្រៀមបានល្អ អ៊ីចឹងការប្រកួតនេះ គ្មានឧបសគ្គធំនោះឡើយ»។ អេលីត ចំរើន មានចំណុចគួរឲ្យកត់សម្គាល់ គឺវាយជង្គង់ និងកែងល្អ ហើយការប្រកួតចំនួន ៩ ប្រកួតចុងក្រោយជាប់ៗគ្នា ជាមួយកីឡាករថៃ ទាំងក្រៅខ្សែក្រវាត់នេះ គឺ ចំរើន មិនដែលចាញ់ទាល់តែសោះ៕