ភ្នំពេញ: កីឡាករ ម៉ន សាម៉េត របស់ក្លិបកងចក្ររាជសីហ៍ ត្រូវបានដកចេញពីការប្រកួតដណ្តើមខ្សែក្រវាត់ខារ៉ាបាវទម្ងន់ ៥៧ គីឡូក្រាមនៅសង្វៀន SEATV ក្រោមការពង្រឹងច្បាប់របស់សហព័ន្ធកីឡាប្រដាល់គុនខ្មែរ ដើម្បីឲ្យមានប្រសិទ្ធភាពឡើងវិញ បន្ទាប់ពីការចាប់គូប្រកួតតាមសង្វៀននីមួយៗទំនងធ្វើតាមការយោគយល់ ឬតាមការចង់បានរបស់អ្នកគ្រប់គ្រងកម្មវិធី ហើយបានបន្សល់នូវគំរូមិនល្អ ឬអយុត្តិធម៌ដល់កីឡាករ និងក្លិបមួយចំនួន។
តាមភ័ស្តុតាងជាក់ស្តែងមានកីឡាករខ្លះ ១ សប្តាហ៍ប្រកួត ២ លើក និងមានខ្លះទៀត ១ ថ្ងៃប្រកួត ២ លើកនៅសង្វៀនខុសគ្នាក៏មានដែរ ហើយហេតុផលវាអាស្រ័យទៅលើការបកស្រាយរបស់មន្ត្រីសហព័ន្ធដែលជាអ្នកគ្រប់គ្រងការងារនេះ។
ម៉ន សាម៉េត បានប្រាប់ថា៖ «ខ្ញុំត្រូវបានគេដកចេញពីការប្រកួតនៅសង្វៀន SEATV ហើយដោយគេប្រាប់ថា ខ្ញុំជាប់ប្រកួតវគ្គជម្រុះនៅសង្វៀនប៉ុស្តិ៍លេខ៥ ក្នុងកម្មវិធីពានរង្វាន់ TV5Boxing Knock-Out Serir by K-Cement គឺមិនអាចនៅបន្តប្រកួតក្នុងកម្មវិធីខ្សែក្រវាត់ខារ៉ាបាវនៅ SEATV បន្តទៀតបានទេ»។ សាម៉េត បន្ថែមថា៖ «បើអ៊ីចឹង ខ្ញុំសូមឲ្យអនុវត្តធ្វើឲ្យដូចគ្នាទាំងអស់គ្រប់ក្លិប គ្រប់កីឡាករទៅព្រោះច្បាប់ត្រូវគោរពដូចគ្នា»។
ចំណែកលោក ជួន សំណាង គ្រូបង្វឹក ម៉ន សាម៉េត បាននិយាយថា៖ «សហព័ន្ធតម្រូវឲ្យដក ម៉ន សាម៉េត ចេញពីគូខ្សែក្រវាត់ខារ៉ាបាវនៅសង្វៀន SEATV ទោះបីជា សាម៉េត បានប្រកួតឈ្នះថៃ ១ លើកក៏ដោយ ព្រោះនេះជាបញ្ជារបស់មន្ត្រីសហព័ន្ធ»។
លោកបន្តថាបើច្បាប់របស់សហព័ន្ធចែងអ៊ីចឹងគឺល្អ និងដាក់ឲ្យអនុវត្តគ្រប់កីឡាករ គ្រប់ក្លិបទៅ កុំឲ្យក្លិបមានខ្សែផ្សេង ក្លិបគ្មានបក្ខពួកផ្សេង ព្រោះកន្លងមកថ្មីៗមានកីឡាករ សៀវ ង៉ុយ មកពីសមាគមកីឡាប្រដាល់ក្រសួងការពារជាតិបានឡើងប្រកួតដណ្តើមខ្សែក្រវាត់គុនខ្មែរអន្តរជាតិនៅថ្ងៃទី ២៨ ខែធ្នូ ឆ្នាំ ២០១៨ ហើយបន្ទាប់មកថ្ងៃទី ៣១ ខែធ្នូ ឆ្នាំ ២០១៨ ប្រកួតវគ្គជម្រុះពានរង្វាន់ TV5 Boxing Knock-Out Serir by K-Cement ដូច ម៉ន សាម៉េត ដែរ ហេតុអ្វីមិនខុសច្បាប់?
បន្ថែមលើនេះលោក ជួន សំណាង បានរំឭកថាកន្លងមករវាងកីឡាករ មាស សុជាតិ និងកីឡាករ ពុយ វណ្ណៈ ប្រកួតគ្នានៅប៉ុស្តិ៍លេខ ៥ ក្នុងវគ្គពាក់កណ្តាលផ្តាច់ព្រ័ត្រដោយចុះចាញ់ត្រឹមទឹកទី ២ នៅម៉ោងប្រហែលជិត ៧ យប់ ហើយម៉ោងជិត ៩ យប់ក្នុងថ្ងៃតែមួយបានទៅប្រកួតនៅសង្វៀនអាស៊ីអាគ្នេយ៍ហេតុអីមិនខុសច្បាប់? ហេតុនេះលោក សំណាង បានស្នើឲ្យមន្ត្រីមេៗសហព័ន្ធកីឡាប្រដាល់គុនខ្មែរ មេត្តាចែងច្បាប់អនុវត្តឲ្យបានទាំងអស់គ្នាគ្រប់ក្លិប និងគ្រប់កីឡាករផង។
ចំណែកលោក ញាន សុធី នាយកគ្រប់គ្រងកម្មវិធីប្រដាល់ប្រចាំសង្វៀន SEATV ប្រាប់ថា ម៉ន សាម៉េត ត្រូវបានសហព័ន្ធឲ្យដកចេញមែនដោយសារមានការតវ៉ាពីអ្នកគ្រប់គ្រងនៅសង្វៀនប្រដាល់ប៉ុស្តិ៍លេខ ៥ ដែលយើងមិនអាចចរចាគ្នាត្រូវរ៉ូវបាន ហើយការងារផ្គូផ្គងមិនមែនងាយស្រួលប៉ុន្មានទេ ព្រោះទីផ្សារប្រកួតមានការប្រជែងគ្នា ហើយកីឡាករឆ្នើមមានសមត្ថភាពល្អៗ ពិតជាត្រូវការប្រជែងគ្នាមែន។
លោកបន្ថែមថា៖ «ការងារទាំងនេះគឺត្រូវសហការជាមួយសហព័ន្ធដើម្បីដោះស្រាយ ព្រោះសហព័ន្ធទំនងជាកំពុងពង្រឹងច្បាប់ប្រកួតឲ្យមានប្រសិទ្ធភាព ហើយបេក្ខភាពកីឡាករមកជំនួស ម៉ន សាម៉េត ខ្ញុំសម្លឹងឃើញហើយគឺ សេន កុសល មកពីបាត់ដំបងដូចជាមានសមត្ថភាពស័ក្តិសមល្អ»។
ចំណែកលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានទទួលស្គាល់ថាកន្លងមកយើងតែងតែផ្តល់ការអនុគ្រោះដល់កីឡាករខ្លះដែលឡើងប្រកួតខុសពីបច្ចេកទេសក្នុងនោះដែរមានកីឡាករ និងគ្រូបង្វឹកខ្លះចង់ឲ្យកីឡាករឡើងប្រកួតដើម្បីប្រាក់តម្លៃខ្លួនតាមទីផ្សារប្រកួតដោយភ្លេចគិតពីសុខភាពក៏មានដែលធ្វើឲ្យប៉ះពាល់ ឬឃ្លាតពីច្បាប់ក៏មាន ប៉ុន្តែសហព័ន្ធតែងតែអនុគ្រោះ និងយោគយល់ខ្លះ។
លោកបន្តថា៖ «សម្រាប់ឆ្នាំ ២០១៩ នេះការប្រកួតមានភាពរីកចម្រើនគឺទីផ្សារប្រកួតច្រើនហើយសហព័ន្ធសុំសិទ្ធិពង្រឹងច្បាប់ប្រកួតឲ្យបានល្អ ហើយកីឡាករក្តី គ្រូបង្វឹកក្តី ម្ចាស់ក្លិបក្តីត្រូវនាំគ្នាគោរពគោលការណ៍ប្រកួត គោរពច្បាប់ឲ្យបានល្អ និងឈប់មានការយោគយល់បន្តទៀត ដើម្បីឲ្យប្រដាល់គុនខ្មែរឆ្ពោះទៅរកគុណភាពល្អគឺអនុវត្តច្បាប់ទាំងអស់គ្នាអ៊ីចឹងកីឡាករត្រូវតែមានការហ្វឹកហាត់ល្អ សុខភាពល្អ និងចាប់គូប្រកួតធ្វើតាមលក្ខណៈបច្ចេកទេស និងច្បាប់កីឡាទាំងអស់»៕