.jpg)
ម៉ន សាម៉េត ត្រូវប្រកួតសងសឹកជាមួយកីឡាករថៃ Bou Vy នៅយប់ថ្ងៃអាទិត្យ។ សហការី
ភ្នំពេញ៖ អ្នកប្រដាល់ជើងខ្លាំងក្នុងទម្ងន់ ៥៧ គីឡូក្រាម ម៉ន សាម៉េត ត្រូវវិលមកប្រកួតសងសឹកជាមួយថៃ Bou Vy នៅសង្វៀន SEATV នាយប់ថ្ងៃអាទិត្យនេះ បន្ទាប់ពីខកខានប្រកួតជិត ២ ខែ ចំណែកកីឡាករឆ្នើមកម្ពុជា ឡុង ជិន ត្រូវប៉ះថៃ Senmorokorth ក្នុងទម្ងន់ ៦០ គីឡូក្រាម ថ្ងៃអាទិត្យនោះដែរ។
ការជួបគ្នារវាង ម៉ន សាម៉េត និង Bou Vy បានក្លាយជាការប្រកួតសងសឹកមួយ ព្រោះកាលពីជិត ៣ ឆ្នាំកន្លងមក ម៉ន សាម៉េត ធ្លាប់ចាញ់កីឡាករថៃម្នាក់នេះម្តងរួចទៅហើយ ប៉ុន្តែនៅមុនការប្រកួតនេះ សាម៉េត បានត្អូញត្អែរថា ការខកខានឡើងប្រកួតរយៈពេល ២ ខែនេះ ចង់ដាច់បាយ ព្រោះការដាក់ពាក្យចាប់គូមិនបាន បន្ទាប់រូបគេបានចាញ់ថៃ Khom Pichit ក្នុងការប្រកួតជម្រុះដណ្តើមខ្សែក្រវាត់នៅសង្វៀន PNN កាលពីថ្ងៃទី ៥ ខែ មករា ឆ្នាំ ២០២០។
ម៉ន សាម៉េត បាននិយាយថា៖ «ខ្ញុំធ្លាប់ឈ្នះជើងឯកប្រចាំឆ្នាំសឹងរាល់ឆ្នាំ និងឈ្នះខ្សែក្រវាត់ចំនួន ៣ ស្ថាប័ន ប៉ុន្តែទីផ្សារប្រកួត បើសិនប្រកួតចាញ់ ឬធ្លាក់ចុះបន្តិចនោះ វាពិបាកចាប់គូប្រកួតឡើងវិញណាស់។ ជាក់ស្តែង ក្រោយខ្ញុំចាញ់នៅសង្វៀន PNN គឺខ្ញុំលំបាកចាប់គូស្វែងរកការប្រកួតជាលក្ខណៈអន្តរជាតិ ហើយបញ្ហានេះបានធ្វើឲ្យជីវភាពរបស់ខ្ញុំលំបាកដុនដាបមែនទែនព្រោះខ្ញុំរំពឹងតែលើប្រដាល់នេះឯង»។
យ៉ាងណាមិញ សម្រាប់ការឡើងប្រកួតជាថ្មីនៅសង្វៀន SEATV ថ្ងៃអាទិត្យនេះ ម៉ន សាម៉េត បាននិយាយថា៖ «ការជួបថៃ Bou Vy លើកនេះ ជាការប្រកួតមួយដែលតឹងតែង ព្រោះកីឡាករថៃម្នាក់នេះ ធ្លាប់ឈ្នះខ្ញុំម្តងកាលពីឆ្នាំ ២០១៨ នៅសង្វៀនបាយ័ន»។
ចំណែកលោក ថៃ អ៊ូ ប្រតិភូនាំកីឡាករថៃមកប្រកួតស្រុកខ្មែរបានប្រាប់ថា៖ «ម៉ន សាម៉េតលំបាកឈ្នះថៃនេះណាស់ ហើយធ្លាប់ចាញ់ទៀត ប៉ុន្តែបើ សាម៉េត ហ្វឹកហាត់ល្អ វាយសម្រុកខ្លាំងផ្នែកកណ្តាប់ដៃ និងកែង គឺមានភាគរយខ្ពស់អាចនឹងឈ្នះបាន ព្រោះ Bou Vy មួយរយៈនេះ ប្រកួតធ្លាក់ចុះមួយកម្រិតដែរ។ ទោះយ៉ាងណា គូនេះ ពិតជាល្អមើលហើយ គឺការចាញ់ ឬឈ្នះ មិនអាចទស្សន៍ទាយបានមុននោះទេ ព្រោះសុទ្ធតែជាកីឡាករវាយប្តូរដូចគ្នា»។
ចំណែកកីឡាករថៃ Sen morokorth ដែលជាគូប្រកួតរបស់ ឡុង ជិន ត្រូវបានគណៈកម្មការផ្គូផ្គងប្រាប់ថា ធ្លាប់ប្រកួតបាន ៦៥ ដង ឈ្នះ ៥៥ និងចាញ់ ១០ ដង គឺតិចជាង ឡុង ជិន ដែលប្រកួតបាន ៨៤ ដង ឈ្នះ ៦៤ ចាញ់ ១៨ និងស្មើ ២ ដង។
ទោះយ៉ាងណាប្រធានគ្រប់គ្រងកម្មវិធី លោក ញាន សុធី បាននិយាយថា៖ «អ្នកប្រដាល់ទាំង ២ នេះ មានសមត្ថភាពប្រហាក់ប្រហែលគ្នា ប៉ុន្តែសម្រាប់ ឡុង ជិន បើហ្វឹកហាត់បានល្អ គឺមានប្រៀបជាង ដោយសារក្បាច់ប្រកួតរបស់ ឡុង ជិន មានផ្លែសម្លាប់ច្រើន ដូចជាជង្គង់ និងកែង តែផ្នែកកម្លាំង គឺចាញ់ប្រៀបកីឡាករថៃនៅចុងទឹក។ ហេតុនេះបើ ឡុង ជិន ហ្វឹកហាត់ផ្នែកកម្លាំងបានល្អវិញ គឺមានភាគរយឈ្នះខ្ពស់ ដោយសារគេចូលវ៉ៃដៃគូមុនជានិច្ច»៕
