.jpg)
ភ្នំពេញ៖ អ្នកប្រដាល់របស់ក្លិបព្រែកឯង ម៉ន សាម៉េត ដែលជាបេក្ខភាពឆ្នើម ត្រៀមក្នុងកម្មវិធីប្រកួតដណ្តើមខ្សែក្រវាត់របស់សង្វៀនហង្សមាសនោះទទួលបានឱកាសឡើងសង្វៀនប្រដាល់ជាថ្មី នៅយប់ថ្ងៃសៅរ៍នេះ ដោយរូបគេត្រូវជួបកីឡាករជើងចាស់ដូចគ្នា វៀត ប៊ុនឌឿន របស់សមាគមប្រដាល់កងយោធពលខេមរភូមិន្ទនៅសង្វៀនបាយ័ន ហើយនេះជាក៏ជាជំនួបប្រកួតសងសឹកជាថ្មីផងដែរ ខណៈប្រវត្តិជួបគ្នាចំនួន ៤ ដងកន្លងមក សាម៉េត បានឈ្នះពិន្ទុទាំង ៤ លើក។
ទោះបីជាយ៉ាងណានៅក្នុងពេលបច្ចុប្បន្ននេះ ត្រូវបានគេកត់សម្គាល់ឃើញថា ម៉ន សាម៉េត ខកខានប្រកួតច្រើនខែ ហើយកម្លាំង និងបច្ចេកទេសលំបាកប៉ាន់ស្មាន ស្របពេលដែលសាមីខ្លួន ក៏មិនហ៊ានអួតផងដែរ ប៉ុន្តែសម្រាប់ វៀត ប៊ុនឌឿន កំពុងតែរីកចម្រើនខ្លាំងនូវវិជ្ជាគុន ដោយមួយរយៈនេះ ប្រកួតទាក់ទាញមានការចាប់អារម្មណ៍ខ្លាំង ដោយសារ ៣ ប្រកួតចុងក្រោយនេះ រូបគេបានឈ្នះ ជ័រ ពៅ ឈ្នះ ឯម សុធី ប៉ុន្តែចាញ់ ឃីម បូរ៉ា។
ម៉ន សាម៉េត បាននិយាយថា៖ «កន្លងមក ខ្ញុំធ្លាប់ប្រកួតឈ្នះ វៀត ប៊ុនឌឿន ចំនួន ៤ លើកក្នុងប្រភេទទម្ងន់ ៥៧ គីឡូក្រាម ប៉ុន្តែឥឡូវនេះ ឡើងមកប្រកួតក្នុងទម្ងន់ ៦០ គីឡូក្រាម ខ្ញុំមិនដឹង យ៉ាងណាទេ ព្រោះគាត់ឥឡូវល្អជាងមុន ហើយខ្ញុំខកខានឡើងប្រកួតយូរគួរសម គឺជាង ៣ ខែមកហើយ»។
កីឡាករ ម៉ន សាម៉េត ដែលទើបរួចផុតពីការធ្វើចត្តាឡីស័ក ដោយសារប្អូនរបស់គេ ម៉ន វិរៈ បានឆ្លងកូវីដ ១៩ នោះ បានប្រាប់បន្ថែមថា៖ «ខ្ញុំមិនហ៊ានអះអាងពីលទ្ធផលឈ្នះមុនបានទេ គឺសង្ឃឹម ៥០ ភាគរយប៉ុណ្ណោះ។ ចំពោះប្រវត្តិប្រកួត ៥ លើកចុងក្រោយ ខ្ញុំឈ្នះទាំងអស់ តែការហ្វឹកហាត់ត្រៀមរបស់ខ្ញុំលើកនេះ មិនសូវបានល្អទេ ដោយហាត់ខ្លួនឯង ព្រោះក្លិបបិទទាំងស្រុង ដោយសារបញ្ហាកូវីដ ១៩»។
ចំណែក វៀត ប៊ុនឌឿន ជាកីឡាករចាស់វស្សាមានបទពិសោធច្រើនដូចគ្នា ពិសេសគេមានស្នៀតជង្គង់ល្អ ប៉ុន្តែកន្លងមក វិជ្ជាគុនរបស់គេធ្លាប់ល្អខ្លាំង និងធ្លាប់ធ្លាក់ចុះមិនទៀងទាត់។យ៉ាងណាក៏មួយ មួយរយៈនេះ ការប្រកួតរបស់ ប៊ុនឌឿន ល្អដោយភាគច្រើនឈ្នះ ពិសេស ៣ ប្រកួតចុងក្រោយឈ្នះជើងខ្លាំង ជ័រ ពៅ និងឈ្នះជើងខ្លាំង ឯម សុធី និងចាញ់ ឃីម បូរ៉ា។
លោក ធន់ សុភា ជាគ្រូបង្វឹក និងជាជំនួយការផ្គូផ្គងប្រចាំសង្វៀនបាយ័នផងនោះ បាននិយាយថា៖ «ទោះបី ម៉ន សាម៉េត ធ្លាប់ឈ្នះកន្លងមក ប៉ុន្តែលើកនេះ វៀត ប៊ុនឌឿន ហាត់ត្រៀមបានល្អ និងមានទំនុកចិត្តឈ្នះខ្ពស់ ព្រោះក្នុងទម្ងន់ ៦០ គីឡូក្រាម ប៊ុនឌឿន សឹងតែរកគូប្រកួតមិនបានទេ គឺអាចថា មានតែ ឃីម បូរ៉ា ម្នាក់ទេ ដែលលំបាកឈ្នះ»។
អតីតអ្នកលេងកណ្តាប់ដៃធ្ងន់ ធន់ សុភា បានបន្តថា៖ «ខ្ញុំមើលឃើញថា បើប្រកួតក្នុងប្រភេទទម្ងន់ ៥៧ គីឡូក្រាម ប៊ុនឌឿន លំបាកឈ្នះ ព្រោះទម្ងន់ពិតរបស់វា គឺ ៦០ គីឡូក្រាមអ៊ីចឹងពេលបញ្ចុះទម្ងន់ គឺកម្លាំងវាធ្លាក់ចុះបន្តិច ប៉ុន្តែប្រកួតក្នុងទម្ងន់ ៦០ គីឡូក្រាមនេះ គឺត្រូវតែម្តង គឺសង្ឃឹមឈ្នះវិញ ដល់ទៅ ៨០ ភាគរយ»។
លោក ធន់ សុភា ក៏បានធ្វើការវាយតម្លៃទៅដល់ការប្រកួតដណ្តើមប្រាក់លាន ២ គូទៀត ដែលត្រូវធ្វើនៅថ្ងៃសៅរ៍នោះដែរ។ លោកនិយាយថា កីឡាករជើងថ្មី ស៊ឹម ប៊ុន មកពីក្លិបកងពលលេខ ៩០ នឹងឈ្នះជើងចាស់ នូវ ដារ៉ូ ក្នុងទំនុកចិត្ត ៧០ ភាគរយ ហើយជើងថ្មី ធន់ ផានិត នឹងឈ្នះលើជើងចាស់ គង់ ហូវ ក្នុងទំនុកចិត្ត ៦០ ភាគរយ ប៉ុន្តែការប្រកួតទាំងនេះ សុទ្ធតែមានលក្ខណៈតឹងតែងដូចគ្នា៕
