.jpg)
កីឡាករម៉ន សាម៉េត (ឆ្វេង) និងកីឡាករថៃ Kamlay Youk។ យឺន ពន្លក
ភ្នំពេញ: ការប្រកួតប្រដាល់លក្ខណៈមិត្តភាពអន្តរជាតិចំនួន ២ ប្រកួតចុងក្រោយរបស់កីឡាករម៉ន សាម៉េត នៃក្លិបកងចក្ររាជសីហ៍នៃក្រសួងមហាផ្ទៃ បានបង្ហាញឲ្យឃើញនូវការចាប់អារម្មណ៍ខ្លាំងបំផុតពីមហាជនដែលអ្នកតាមដានទស្សនា ដោយសារតែការប្រកួតរបស់គេបានវិលទៅរកភាពល្អឡើងវិញ។
ទោះបីការប្រកួតកាលពីថ្ងៃ ៣១ ខែមីនា ឆ្នាំ ២០១៨ របស់ម៉ន សាម៉េត ជាមួយកីឡាករថៃនៅឯក្រុងប៉ាតាយាប្រទេសថៃ បានចាញ់ពិន្ទុក៏ដោយ ប៉ុន្តែសកម្មភាពប្រកួតរបស់គេបានធ្វើឲ្យមានការជក់ចិត្ត និងគាំទ្រពីមហាជន។ កាលពីល្ងាចថ្ងៃអាទិត្យ ទី ២២ ខែមេសា ឆ្នាំ ២០១៨ ការប្រកួតចុងក្រោយរបស់ម៉ន សាម៉េត ជាមួយជើងខ្លាំងថៃ Kamlay Youk នៅសង្វៀនអាស៊ីអាគ្នេយ៍បានបង្ហាញឲ្យទស្សនិកជនពេញចិត្តកាន់តែខ្លាំង ពិសេសលទ្ធផលនៃការប្រកួតចំនួន ៥ ទឹកពេញ ដោយសាម៉េត ទទួលបានលទ្ធផលឈ្នះពិន្ទុលើលើកីឡាករថៃគួរជាទីមោទនៈ។
ក្នុងអាជីពជាអ្នកប្រដាល់ជិត ១០ ឆ្នាំ កីឡាករដែលមានកម្ពស់ទាបមានមាឌល្អិតម៉ន សាម៉េត ធ្លាប់ឈ្នះជើងឯកជាតិប្រចាំឆ្នាំ ២០១៦ និងធ្លាប់ឈ្នះខ្សែក្រវាត់ខារ៉ាបាវទម្ងន់ ៥៧ គីឡូក្រាម ឆ្នាំ ២០១៧ នៅសង្វៀនអាស៊ីអាគ្នេយ៍ផងដែរ។ សាម៉េត បានផ្តល់សម្ភាសន៍ឲ្យភ្នំពេញប៉ុស្តិ៍ក្រោយពេលប្រកួតឈ្នះកាលពីល្ងាចថ្ងៃអាទិត្យ ថា៖ «ខ្ញុំវិលទៅហ្វឹកហាត់ឲ្យបានជាប់ជាប្រចាំ ពង្រឹងសមត្ថភាពដើម្បីឡើងប្រកួតលក្ខណៈអន្តរជាតិនានាជាមួយនឹងកិច្ចសន្យាប្រកួតទាំងក្នុង និងក្រៅប្រទេស»។
ម៉ន សាម៉េត បានបន្តថា៖ «ខ្ញុំគិតថា ការប្រកួត មិនប្រកាន់ថាវ៉ៃជាមួយខ្មែរ ឬបរទេសនោះទេ ឲ្យតែជាប់កិច្ចសន្យា និងគ្រូឲ្យឡើងប្រកួតគឺឡើងប្រកួតជានិច្ច ប៉ុន្តែអ្វីដែលសំខាន់ និងមានបំណងចង់ខ្លាំងនោះគឺការប្រកួតជាលក្ខណៈអន្តរជាតិ ព្រោះតម្លៃខ្លួនប្រកួតបានច្រើនជាងជិត ៣ ដងឯណោះ»។
ម៉ន សាម៉េត បានបញ្ជាក់ថា៖ «មួយរយៈកន្លងមកនេះ កម្រិតវិជ្ជាគុនរបស់ខ្ញុំ ហាក់បីដូចធ្លាក់ចុះបន្តិច ដោយបញ្ហាកម្លាំងធ្លាក់ចុះ ពីព្រោះហ្វឹកហាត់មិនបានល្អ ដោយជាប់រវល់ការងាររកស៊ីផ្សេងៗដូចជានេសាទត្រី និងធ្វើការឲ្យគេ»។
សាម៉េត បានបន្ថែមថា៖ «ចាប់ពីពេលនេះទៅ ខ្ញុំត្រូវពង្រឹងការហ្វឹក-ហាត់ឲ្យច្រើនវិញ ដើម្បីត្រៀមប្រកួតឲ្យបានល្អជាមួយអន្តរជាតិនានាដែលបានចុះកិច្ចសន្យាជាបន្តបន្ទាប់»។
នៅក្នុងទម្ងន់៥៧គីឡូក្រាម ម៉ន សាម៉េត ហាក់បីដូចជាលំបាករកដៃគូ ប៉ុន្តែសម្រាប់អ្នកប្រដាល់ឆ្នើមថ្មីៗចំនួន ៣ នាក់ទៀតមាន សុខ ធី, ឡុង ជិន និងប៊ឺត សង្ឃឹម ជាដើម ម៉ន សាម៉េត បានអះអាងថា ហ៊ានវ៉ៃទាំងអស់លើកលែងតែពេជ្រ ម្ទេសខ្មាំង ម្នាក់គត់ ដែលជាពួកម៉ាកគឺសន្យាមិនប្រកួត ឬវ៉ៃគ្នាទេ។ សាម៉េត បានប្តេជ្ញាថា៖ «ខ្ញុំនឹងខំហ្វឹកហាត់ឲ្យបានល្អដើម្បីត្រៀមឡើងប្រកួតជាមួយកីឡាករបរទេស»៕
