ភ្នំពេញ៖ អតីតអ្នកប្រដាល់សកលជម្រើសជាតិឆ្នើម និងជាម្ចាស់មេដាយប្រាក់ពីស៊ីហ្គេម ផល សុផាត ដែលបានបាត់មុខពីសង្វៀនជាច្រើនឆ្នាំនោះ បានបង្ហាញខ្លួនជាថ្មី នៅលើសង្វៀនប្រដាល់សកលក្នុងឋានៈជាចៅក្រមអាជ្ញាកណ្តាលក្នុងការរៀបចំការប្រកួតជើងឯកជម្រើសជាតិប្រចាំឆ្នាំ ២០២០ នៅក្នុងពហុកីឡដ្ឋាន ដែលទើបបានបញ្ចប់កាលពីថ្ងៃព្រហស្បតិ៍ កន្លងមកនេះ។
ការបង្ហាញវត្តមានជាថ្មីក្នុងនាមជាគណៈកម្មការប្រកួត ក្រោយបាត់មុខពីវិស័យប្រដាល់សកលជិត ១០ ឆ្នាំរបស់ ផល សុផាត បានធ្វើឱ្យមានការចាប់អារម្មណ៍ខ្លាំងពីអ្នកស្នេហាវិស័យប្រដាល់ ហើយការបាត់មុខពីសង្វៀនប្រដាល់នេះ ត្រូវបាន ផល សុផាត ទម្លាយថា ដោយសារតែការប្រកួតប្រដាល់សកលទទួលបានប្រាក់កម្រៃតិច មិនអាចទ្រទ្រង់ជីវភាពគ្រួសារបាន។
ក្នុងវ័យ ៣៦ ឆ្នាំ ផល សុផាត ដែលមានប្រពន្ធ និងកូន ២ នាក់នោះ បានប្រាប់ ភ្នំពេញ ប៉ុស្តិ៍ ថា៖ «ខ្ញុំឃ្លាតពីសង្វៀនប្រដាល់ ដោយបញ្ហាជីវភាពលំបាក ព្រោះរំពឹងលើប្រាក់ចំណូលពីប្រដាល់សកល គឺបានចំណូលតិចណាស់ មិនដូចប្រដាល់គុនខ្មែរទេ គេមានតម្លៃខ្លួនប្រកួតច្រើនជាង ហេតុនេះខ្ញុំចេញទៅរកការងារក្រៅ គឺមានលទ្ធភាពជួយផ្គត់ផ្គង់គ្រួសារបានប្រសើរជាង ហើយមុខរបរប្រចាំថ្ងៃរបស់ខ្ញុំបច្ចុប្បន្ននេះ ជាចុងភៅក្នុងភោជនីយដ្ឋានមួយឈ្មោះ The Kin នៅជិតរង្វង់មូលកួរស្រូវ ខេត្តកណ្តាល ដោយខ្ញុំទទួលបានកម្រៃអាចទ្រទ្រង់ជីវភាពបានសមរម្យ»។
យ៉ាងណាក៏ដោយ ផល សុផាត ដែលធ្លាប់ដណ្តើមបានមេដាយប្រាក់ពីការប្រកួតស៊ីហ្គេម លើកទី២៥ នៅប្រទេសឡាវ ឆ្នាំ ២០០៩ នោះ នៅតែមានចិត្តអាឡោះអាល័យ និងចង់វិលមកប្រឡូកក្នុងវិស័យប្រដាល់ក្នុងនាមជាគ្រូបង្វឹក ឬគណៈកម្មការប្រកួតវិញម្តង បើសិនជាប្រធានសហព័ន្ធកីឡាប្រដាល់គុនខ្មែរ លោក តែម ម៉ឺន អនុញ្ញាតឱ្យរូបគេបានបំពេញការងារជាចៅក្រមអាជ្ញាកណ្តាលនៅតាមសង្វៀនឯកជន ដូចអតីតកីឡាករប្រដាល់មួយចំនួនដែលកំពុងប្រកបរបរនេះ។
បងប្រុសរបស់ជើងខ្លាំង ផល សោភ័ណ្ឌ រូបនេះ បានបញ្ជាក់ថា៖ «ខ្ញុំធ្លាប់ជាអ្នកហាត់ប្រដាល់ ឡើងប្រដាល់ និងធ្លាប់ឈ្នះបានមេដាយប្រាក់ ១ ជូនជាតិ អ៊ីចឹងខ្ញុំនៅតែចិញ្ចឹមចិត្ត ចង់វិលមកបំពេញការងារកីឡាជាគ្រូបង្វឹក ឬគណៈកម្មការណាមួយក្នុងវិស័យកីឡានេះណាស់ ប៉ុន្តែពុំទាន់មានឱកាសនៅឡើយ។ ហេតុនេះ បើសិនលោកប្រធានសហព័ន្ធ គាត់អនុញ្ញាតឱ្យធ្វើចៅក្រមអាជ្ញាកណ្តាលនៅតាមសង្វៀនឯកជនទទួលបានប្រាក់កម្រៃនោះ ខ្ញុំនឹងមកបំពេញបាន»។
អ្នកលេងកណ្តាប់ដៃ ផល សុផាត បានបន្ថែមថា៖ «ទោះជាយ៉ាងណា បច្ចុប្បន្ន ខ្ញុំនៅមានប្អូនប្រុសបង្កើត ផល សោភ័ណ្ឌ និងក្មួយ ២ នាក់ទៀត កំពុងហ្វឹកហាត់ល្អគួរសម មាន ផល ស៊ីឡុង និង ផល ស៊ីលីន ចំណែកគោលបំណងទៅថ្ងៃអនាគត ខ្ញុំចង់ធ្វើគ្រូបង្វឹក ដោយមានក្លិបផ្ទាល់ខ្លួនមួយសម្រាប់បង្វឹកក្មេងៗ ប៉ុន្តែពេលនេះពុំទាន់មានលទ្ធភាពនៅឡើយ ហើយក៏កំពុងព្យាយាមដែរ»។
គួររំឭកថា ផល សុផាត ជាអ្នកប្រដាល់ឆ្នើមម្នាក់នៅក្នុងក្លិបតាឡីដំរីមានរិទ្ធ ដោយធ្លាប់ជាប់ជម្រើសជាតិប្រដាល់សកលពីឆ្នាំ ២០០៥ ដល់ឆ្នាំ ២០១១ ក្នុងនោះមានស្នាដៃជាច្រើនដូចជាជាប់ជើងឯកជាតិប្រចាំឆ្នាំ ពីទម្ងន់តាំងពី ៥៤ ដល់ ៦០ គីឡូក្រាម និងធ្លាប់ឈ្នះមេដាយប្រាក់ពីស៊ីហ្គេម លើកទី២៥ ឆ្នាំ ២០០៩ នៅឡាវ មុនពេលរូបគេបានចាកចេញពីប្រដាល់សកលនៅឆ្នាំ ២០១២៕