ភ្នំពេញ៖ អ្នកប្រដាល់សញ្ជាតិកម្ពុជាមានដើមកំណើតមកពីប្រទេស គុយបា វ៉ែន រដ្ឋា ដែលធ្លាប់ឈ្នះមេដាយប្រាក់ ផ្នែកកីឡាប្រដាល់សកល នៅក្នុងការប្រកួតកីឡាស៊ីហ្គេម លើកទី ២៨ ឆ្នាំ ២០១៥ នៅសិង្ហបុរីនោះ បានត្រៀមខ្លួនរួចហើយ ដើម្បីវិលត្រឡប់មកចូលរួមជាមួយក្រុមជម្រើសជាតិកម្ពុជាវិញ បន្ទាប់ពីជាប់ពិន័យរយៈពេល ៤ ឆ្នាំ ពីស្ថាប័នប្រឆាំងសារធាតុញៀនរបស់កីឡា ឈ្មោះ C Rado ពាក់ព័ន្ធទៅនឹងការពិនិត្យរកឃើញនូវសារជាតិញៀន ក្នុងឈាមកាលពី ៤ ឆ្នាំមុន ហើយបន្ទាប់មករូបគេបានខកខានក្នុងអាជីពប្រដាល់ឲ្យជម្រើសជាតិប្រដាល់សកលកម្ពុជា។
ទោះបីជាការប្រមូលផ្តុំក្រុមជម្រើសជាតិប្រចាំឆ្នាំ ២០២០ ក្រសួងអប់រំ យុវជន និងកីឡានៅមិនទាន់ចេញលិខិតឧទ្ទេសនាមទទួលស្គាល់នៅឡើយ ប៉ុន្តែនៅក្នុងបេក្ខភាពព្រាងបណ្តោះអាសន្ននៃក្រុមជម្រើសជាតិប្រដាល់សកលត្រូវបានសហព័ន្ធកីឡាប្រដាល់សកលកម្ពុជា បានបញ្ជូនឈ្មោះរួចទៅហើយ តាមរយៈមជ្ឈមណ្ឌលជាតិហ្វឹកហ្វឺនកីឡា ហើយនៅក្នុងបេក្ខភាពទាំងនោះ ក៏មាន វ៉ែន រដ្ឋា ផងដែរ។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានប្រាប់ភ្នំពេញប៉ុស្តិ៍ថា៖ «ធនធានសមត្ថភាពរបស់កីឡាករ វ៉ែន រដ្ឋា នេះ គឺល្អណាស់នៅក្នុងទម្ងន់ ៦៤ គីឡូក្រាម។ វ៉ែន រដ្ឋា មានកម្ពស់ ១,៨០ ម៉ែត្រ ហើយអ្នកប្រដាល់រូបនេះ មានកណ្តាប់ដៃលឿនរហ័ស និងធ្លាប់បានឈ្នះមេដាយប្រាក់ ពីព្រឹត្តិការណ៍កីឡាស៊ីហ្គេម ឆ្នាំ ២០១៥ នៅសិង្ហបុរី។ នៅក្នុងតំបន់អាស៊ាន គឺមានតែកីឡាករនៅប្រទេស ថៃ ប៉ុណ្ណោះ ដែលមានសមត្ថភាពប្រហាក់ប្រហែល វ៉ែន រដ្ឋា»។
នៅក្នុងកំណត់ត្រារបស់ក្រសួងអប់រំ យុវជន និងកីឡា កីឡាករ វ៉ែន រដ្ឋា កើតថ្ងៃទី ២៥ ខែ កញ្ញា ឆ្នាំ ១៩៨៩ នៅប្រទេស គុយបា ហើយគេបានមករស់នៅចូលសញ្ជាតិខ្មែរដល់បច្ចុប្បន្ន ដោយមានលំនៅភូមិត្នោតជ្រំ ខណ្ឌមានជ័យ រាជធានីភ្នំពេញ។ កីឡាករ វ៉ែន រដ្ឋា បានប្រកួតឈ្នះមេដាយប្រាក់ ពីកីឡាស៊ីហ្គេម លើកទី ២៨ ឆ្នាំ ២០១៥ នៅប្រទេស សិង្ហបុរី បន្ទាប់ពីបានចាញ់កីឡាករថៃទាំងប្រផិតប្រផើយ នៅវគ្គផ្តាច់ព្រ័ត្រ ខណៈដែលអ្នកគាំទ្រភាគច្រើន មើលឃើញថាការកាត់ក្តីកាលនោះ មានភាពលម្អៀងទៅលើភាគីថៃ។
លោក ជឹម ផល្លា គ្រូពេទ្យប្រចាំក្រុមជម្រើសជាតិកម្ពុជាបាននិយាយថា៖ «ការរកឃើញនូវសារធាតុញៀនក្នុងឈាមរបស់កីឡាករ វ៉ែន រដ្ឋា មិនមែនខាងយើងនោះទេ គឺស្ថាប័នដូពីងអន្តរជាតិ ព្រោះគ្រប់អត្តពលិកជម្រើសជាតិរបស់យើង ដែលបានបញ្ជូនឈាមទៅ គឺគេតែងពិនិត្យគ្រប់គ្នា»។
លោកបានបន្តថា៖ «តាមការស្រាវជ្រាវ និងតាមដាន គឺកីឡាករ វ៉ែន រដ្ឋា គ្មានពាក់ព័ន្ធគ្រឿងញៀននោះទេ ប៉ុន្តែក្រៅពីហ្វឹកហាត់ គាត់ទៅធ្វើការបន្ថែម ក្នុងហាងមួយ ដែលគេជក់ស៊ីហ្គា និងស៊ីសា អ៊ីចឹងនាំឲ្យគាត់ទទួលរងនូវសារធាតុផ្សែងញឹកញាប់ នាំឲ្យពិនិត្យឃើញមានជាតិកញ្ឆាក្នុងឈាមប៉ុណ្ណោះ»។
ជាមួយការមានសារធាតុហាមឃាត់ ដោយមិនដឹងខ្លួននេះ លោក ជឹម ផល្លា បានផ្តល់ជាដំបូន្មានថា អត្តពលិកគួរយល់ដឹងពីបញ្ហាមួយចំនួន នៅក្នុងការទទួលទានភេសជ្ជៈប៉ូវកម្លាំងកំប៉ុងមួយចំនួន នៅមុនពេលពិនិត្យឈាម ព្រោះវាអាចមានផលប៉ះពាល់ ឬរកឃើញសារធាតុហាមឃាត់ ហើយពេលនោះ គេនឹងទទួលរងពិន័យមិនខាន ដោយតាមពិតគ្មានពាក់ព័ន្ធគ្រឿងញៀនអ្វីទាល់តែសោះ។ ទោះជាយ៉ាងណា ការជាប់ពិន័យមិនឲ្យឡើងប្រកួតចំនួន ៤ ឆ្នាំ របស់ វ៉ែន រដ្ឋា គឺពេលនេះគេទទួលបានសិទ្ធិពេញលេញឡើងវិញហើយ។
ចំណែកលោក វ៉ែន សុផល គ្រូបង្វឹក ក្រុមជម្រើសជាតិប្រដាល់សកលកម្ពុជាបាននិយាយថា៖ «បើកីឡាករ វ៉ែន រដ្ឋា មកហ្វឹកហាត់ជម្រើសជាតិវិញ គឺយើងមានធនធានកីឡាករមានសមត្ថភាពល្អ និងមានលទ្ធភាពក្នុងការដណ្តើមយកមេដាយជូនជាតិពីព្រឹត្តិការណ៍ប្រកួតនានានៅអន្តរជាតិ»។
លោកបានបន្ថែមថា៖ «កាលពីប្រកួតកីឡាស៊ីហ្គេមលើកទី ២៨ ឆ្នាំ ២០១៥ នៅប្រទេស សិង្ហបុរី វ៉ែន រដ្ឋា បានឈ្នះជើងខ្លាំងរបស់ហ្វីលីពីន នៅវគ្គពាក់កណ្តាលផ្តាច់ព្រ័ត្រ ហើយឈានបន្តចូលវគ្គផ្តាច់ព្រ័ត្រ ប៉ុន្តែបានចាញ់កីឡាករថៃ ទាំងមិនអស់ចិត្ត ព្រោះគណៈកម្មការ គឺគ្មានខ្មែរនោះឡើយ៕