Los Angeles: ប៉ូលិសបានបញ្ជាក់ពីថ្ងៃចន្ទថា កីឡាករប្រដាល់សកល Pernell Whitaker អតីតម្ចាស់មេដាយមាសអូឡាំពិក និងជាម្ចាស់ជើងឯកពិភពលោកកម្រិតទម្ងន់ ៤ ប្រភេទបានស្លាប់ក្រោយពីរូបគេបានជួបគ្រោះថ្នាក់ចរាចរណ៍នៅរដ្ឋ Virginia សហរដ្ឋអាមេរិក។
របាយការណ៍ប៉ូលិសបាននិយាយថា កីឡាករវ័យ ៥៥ ឆ្នាំរូបនេះបានស្លាប់ក្រោយពីរថយន្តមួយគ្រឿងបានបើកបុកនៅចំណុចផ្លូវរង្វង់មូលនៅក្នុងទីក្រុង Virginia Beach កាលពីថ្ងៃអាទិត្យ។
របាយការណ៍នេះបានបន្ថែមថា៖ «នៅពេលមន្ត្រីប៉ូលិសបានទៅដល់កន្លែងកើតហេតុ ពួកគេបានឃើញបុរសម្នាក់ដែលបានរងគ្រោះដោយសាររថយន្តបុក ហើយជនរងគ្រោះនេះបានស្លាប់នៅកន្លែងកើតហេតុដោយសារស្ថានភាពរបួសរបស់គាត់»។
ប៉ូលិសបាននិយាយថា អ្នកបើករថយន្តដែលពាក់ព័ន្ធនឹងគ្រោះថ្នាក់នេះមិនបានរត់គេចខ្លួននោះទេ ប៉ុន្តែថែមទាំងបានជួយផ្ដល់ចម្លើយប្រាប់ប៉ូលិសទៀតផង។
កីឡាករ Whitaker ត្រូវបានចាត់ទុកជាកីឡាករដែលទទួលបានពានរង្វាន់ច្រើនបំផុតនៅក្នុងជំនាន់របស់គេ និងជាអ្នកពោរពេញដោយជំនាញ និងបច្ចេកទេសនៅក្នុងអាជីពដ៏ជោគជ័យរបស់រូបគាត់ក្រោយពីបានមេដាយមាសក្នុងកម្រិតទម្ងន់ស្រាលនៅការប្រកួតអូឡាំពិកឆ្នាំ ១៩៨៤ នៅទីក្រុង Los Angeles សហរដ្ឋអាមេរិក។
កីឡាកររូបនេះមានប្រវត្តិប្រកួត ៤៦ លើកគឺឈ្នះ ៤០ លើកក្នុងនោះផ្ដួលឲ្យដៃគូសន្លប់ ១៧ លើក ចាញ់ ៤ លើក និងស្មើ ១ លើក ហើយរូបគេមិនបានប្រកួតជាមួយកីឡាករណាម្នាក់ទេនៅមុនពេលរូបគេបានប្រកាសចូលនិវត្តន៍នៅឆ្នាំ ២០០១។
កីឡាករ Whitaker បានឈ្នះខ្សែក្រវាត់ក្នុងកម្រិតទម្ងន់ ៤ ប្រភេទគឺកម្រិតទម្ងន់ lightweight, ទម្ងន់ light welterweight, ទម្ងន់ welterweight និងទម្ងន់ light middleweight។
កីឡាករ Whitaker រហស្សនាមថា «Sweet Pea» នោះត្រូវបានទស្សនាវដ្ដី Ring ចាត់ទុកជាកីឡាករឆ្នើមប្រចាំឆ្នាំ ១៩៨៩ និងត្រូវបានចាត់ទុកជាកីឡាករអាចប្រកួតនៅគ្រប់កម្រិតទម្ងន់ល្អបំផុតនៅក្នុងពិភពលោកក្នុងអំឡុងពេលពាក់កណ្ដាលទសវត្សរ៍ឆ្នាំ ១៩៩០។
កីឡាករ Whitaker ធ្លាប់បានប្រកួតជាមួយវីរបុរសប្រដាល់សញ្ជាតិម៉ិកស៊ិក Julio Cesar Chavez ដែលទទួលបានលទ្ធផលចម្រូងចម្រាសជាខ្លាំងនៅពេលនោះ។
កីឡាករទាំង ២ បានប្រកួតគ្នាបែកមុខរៀងៗខ្លួន ប៉ុន្តែពួកគេបានបន្តការប្រកួតរហូតដល់ចុងបញ្ចប់នៅសង្វៀន San Antonio កាលពីខែកញ្ញា ឆ្នាំ ១៩៩៣។
អ្នកទស្សនាភាគច្រើនជឿថា កីឡាករ Whitaker បានឈ្នះនៅក្នុងការប្រកួតនោះ ប៉ុន្តែលទ្ធផលគឺចៅក្រមបានសម្រេចផ្ដល់ពិន្ទុឲ្យស្មើគ្នាទៅវិញ។
កីឡាកររងគ្រោះរូបនេះបានបន្តចាញ់ការប្រកួតនៅពេលប៉ះជាមួយកីឡាករ Oscar de la Hoya នៅឆ្នាំ ១៩៩៧ ជាពេលដែលរូបគេបានដាក់ខ្សែក្រវាត់ WBC កម្រិតទម្ងន់ក្រោមមធ្យមរបស់ខ្លួន។
បន្ទាប់ពីចាញ់កីឡាករ Felix Trinidad នៅឆ្នាំ ១៩៩៩ ហើយ Whitaker បានប្រកួតបន្តទៀតមុនពេលទីបំផុតបានប្រកាសចូលនិវត្តន៍ក្រោយពីប្រកួតចាញ់កីឡាករ Carlos Bojorquez នៅខែមេសា ឆ្នាំ ២០០១៕ SN