ភ្នំពេញ៖ កីឡាករជើងថ្មី ពោរពេញដោយបទពិសោធ ខេម ចាន់ និង ហ៊ឹម គឹមរៀង ដែលសុទ្ធតែធ្លាប់ឈ្នះមេដាយសំរឹទ្ធ នៅស៊ីហ្គេម ឆ្នាំ ២០១៩ នោះ អាចនឹងត្រូវប៉ះគ្នា ព្រោះអ្នកទាំង ២ គឺជាបេក្ខភាព ដែលត្រូវប្រកួតម៉ារ៉ាតុងដណ្តើមប្រាក់លានទម្ងន់ ៥៤ គីឡូក្រាម ជាមួយ ឃួន ឡាំងកូស៊ីន និង ពេជ្រ ប៊ុនសិដ្ឋ ក្នុងកម្មវិធី Mas Fight Cambodia នៅលើសង្វៀនថោនថ្ងៃអាទិត្យនេះ។
យ៉ាងណាក៏ដោយ ខេម ចាន់ ត្រូវបានគេមើលឃើញថា មានកម្រិតវិជ្ជាគុន និងសមត្ថភាព ព្រមទាំងបទពិសោធល្អ ដាច់ជាង ហ៊ឹម គឹមរៀង និងបេក្ខភាព ២ នាក់ទៀត ប៉ុន្តែលទ្ធផលចាញ់ ឬឈ្នះគ្នា អាចនឹងមានលក្ខណៈតឹងតែងបំផុត គឺភាគរយនៃការឈ្នះគ្នាដោយផ្តួលឲ្យសន្លប់មានតិចណាស់។
កីឡាករជម្រើសជាតិ ខេម ចាន់ ធ្លាប់បានចូលប្រកួតដណ្តើមប្រាក់លាននេះម្តងហើយ ប៉ុន្តែបានចាញ់ពិន្ទុ វ៉ាន់ រឿន នៅក្នុងវគ្គជម្រុះ ប៉ុន្តែចំពោះបេក្ខភាពប្រកួតលើកនេះ ខេម ចាន់ ត្រូវបានមជ្ឈដ្ឋានជាច្រើនហ៊ានទស្សន៍ទាយមុនថា មានភាគរយច្រើនជាងគេ ក្នុងការឈានទៅដល់វគ្គផ្តាច់ព្រ័ត្រ ឬដណ្តើមបានប្រាក់លាន ខណៈព្រឹត្តិការណ៍នេះ តម្រូវឲ្យអ្នកទាំង ៤ ចាប់ឆ្នោតមុនការប្រកួតវគ្គជម្រុះមាន ៣ ទឹក ហើយអ្នកឈ្នះត្រូវឡើងទៅប្រកួតផ្តាច់ព្រ័ត្រ ដែលមានត្រឹម ១ ទឹក ស្មើ ៩ នាទី។
អតីតអ្នកប្រដាល់ជើងខ្លាំង ពេជ្រ សុផាន់ ដែលជាគ្រូបង្វឹករបស់ ពេជ្រ ប៊ុនសិដ្ឋ បានប្រាប់ថា៖ «ប៊ុនសិដ្ឋ ហ្វឹកហាត់បានល្អ តែទោះជាចាប់ឆ្នោតប៉ះអ្នកណា ក៏លំបាកឈ្នះដូចគ្នា ព្រោះសុទ្ធតែអ្នកមានបទពិសោធប្រកួតយូរមកហើយ ក្នុងនោះ ហ៊ឹម គឹមរៀង និង ខេម ចាន់ គឺកីឡាករវ័យក្មេងដែរ តែចាស់វស្សា និងធ្លាប់ឈ្នះមេដាយសំរឹទ្ធពីស៊ីហ្គេមដូចគ្នា ចំណែក ឃួន ឡាំកូស៊ីន វិញថ្វីដ្បិតមិនសូវប្រកួតនៅភ្នំពេញ ប៉ុន្តែការហ្វឹកហាត់ជាមួយលោកគ្រូ សាន់ សៅយ៉ាន់ ភាគច្រើនចេញទៅប្រកួតនៅស្រុកថៃ គឺល្អណាស់»។
ពេជ្រ សុផាន់ បានបន្ថែមថា៖ «ការប្រកួត ៥ លើកចុងក្រោយនេះ ប៊ុនសិដ្ឋ ឈ្នះជានិច្ច ក្នុងនោះមាន ម៉ន ភីរម្យ, សាស្ត្រា វុធ និង ចាន់ សាន់ ផងដែរ ប៉ុន្តែការប្រកួតលើកនេះ ខ្ញុំមិនទាន់ហ៊ានសង្ឃឹមច្រើនទេ គឺវាអាស្រ័យលើសង្វៀនជាក់ស្តែង។ យ៉ាងណាក៏ដោយ ប៊ុនសិដ្ឋ ល្អកណ្តាប់ដៃ និងទាត់ជើងក្រោម ហើយបើមានឱកាសល្អ យើងផ្តួលបានភ្លាមៗ ប៉ុន្តែ បើប៉ះ ខេម ចាន់ ក្នុងវគ្គដំបូង គឺជាឧបសគ្គធំតែម្តង»។
ស្រដៀងគ្នានេះ លោក សាន់ សៅយ៉ាន់ ប្រាប់ថា៖ «ឃួន ឡាំកូស៊ីន ពិតជាលំបាកក្នុងការប៉ះអ្នកទាំង ៣ ប៉ុន្តែមិនមែនគ្មានសង្ឃឹមទេ គឺយុទ្ធសាស្ត្រ យើងនឹងផ្តល់ឲ្យភ្លាមៗពេលប្រកួតជាក់ស្តែង។ ឡាំកូស៊ីន ថ្មីនៅភ្នំពេញ តែប្រកួតបានច្រើននៅថៃ អ៊ីចឹងបើបានឡើងដល់វគ្គផ្តាច់ព្រ័ត្រ ការចាញ់ ឬឈ្នះ គឺអស់ចិត្ត ព្រោះគេមិនដាក់ពិន្ទុនាំឲ្យមានភាពអយុត្តិធម៌កើតឡើង ប៉ុន្តែខ្ញុំបារម្ភលទ្ធផលប្រកួតនៅវគ្គជម្រុះ ៣ ទឹកវិញទេ ដែលលទ្ធផលពេលខ្លះមិនអស់ចិត្ត»។
លោក ម៉ៅ វុត្ថា ពិធីករ និងជាអ្នកគ្រប់គ្រងទិន្នន័យកីឡាករនៅសង្វៀនថោននិយាយថា៖ «តាមប្រវត្តិ និងបទពិសោធប្រកួតរបស់អ្នកទាំង ៤ នេះ ខេម ចាន់ និង ហ៊ឹម គឹមរៀង ចាស់វស្សាជាងមែន ប៉ុន្តែក្បាច់ និងស្នៀតប្រកួត ព្រមទាំងកម្លាំងរបស់ជើងថ្មី ឃួន ឡាំកូស៊ីន និង ពេជ្រ ប៊ុនសិដ្ឋ វិញ សាងសមត្ថភាពបានល្អណាស់ គឺឈ្នះរៀមច្បងមួយចំនួនធំដូចគ្នា។ ហេតុនេះ មិនអាចទស្សន៍ទាយមុនបានទេ ទោះបីជាបទពិសោធប្រកួតឃ្លាតខុសពីគ្នាក៏ដោយ ហើយគណៈកម្មការផ្គូផ្គងបានពិនិត្យឲ្យមានសមត្ថភាពប្រហាក់ប្រហែលគ្នា គ្រាន់តែ ខេម ចាន់ចាស់វស្សាជាងមែន»៕