.jpg)
ភ្នំពេញ៖ អ្នកប្រដាល់ ណាត សៀកនិន (ពេជ្រ ម្ទេសខ្មាំង ) ដែលធ្លាប់ឈ្នះមេដាយសំរឹទ្ធពីការប្រកួតស៊ីហ្គេមនោះ គឺគ្មានឈ្មោះនៅក្រុមជម្រើសជាតិប្រដាល់សកលឆ្នាំ ២០២០ ទៀតនោះទេ ហើយបញ្ហានេះ ត្រូវមន្ត្រីសហព័ន្ធកីឡាប្រដាល់សកលកម្ពុជាអះអាងថា ម្ទេសខ្មាំង ខ្សោយផ្នែកវិន័យ នាំឲ្យកម្រិតបច្ចេកទេសធ្លាក់ចុះ ប្រកួតចាញ់ជើងថ្មីថ្មោងងើបមុខមិនរួច។
ទោះជាយ៉ាងនេះក្តី នៅថ្ងៃអាទិត្យនេះ ពេជ្រ ម្ទេសខ្មាំង ត្រូវបានគណៈកម្មការប្រកួតនៅសង្វៀនថោន ផ្គូផ្គងឲ្យប្រកួតម៉ារ៉ាតុងដណ្តើមប្រាក់លានទម្ងន់ ៦០ គីឡូក្រាម ជាមួយជើងថ្មីថ្មោងចំនួន ៣ នាក់ទៀត ដើម្បីស្តារមុខមាត់ឡើងវិញ។ យ៉ាងនេះក្តី បេក្ខភាពទាំង ៣ ដែលខ្ចីវស្សា និងមានបទពិសោធតិចនោះ គឺមានកម្លាំងល្អ និងការវាយសម្រុកខ្លាំង ព្រមទាំងមានសមត្ថភាពយកឈ្នះជើងចាស់មួយចំនួនច្រើនមកហើយ ហើយអ្នកទាំង ៣ នោះ មាន អេលីត ឡុងឡី មកពីក្លិបប៉ែនកាត់គុនខ្មែរ, សំ អាន ក្លិបបញ្ជាការដ្ឋានទ័ពពិសេស និង សេក ចៅជូត ក្លិបអង្គរជ័យខេត្តសៀមរាប។
ប្រភពពីគណៈកម្មការផ្គូផ្គងឲ្យដឹងថា ក្នុងចំណោមបេក្ខភាពថ្មីទាំង ៣ នាក់នេះ ប្រសិនបើ ពេជ្រ ម្ទេសខ្មាំង មិនអាចយកឈ្នះបាននោះ គឺអាជីពរបស់ ម្ទេសខ្មាំង ទំនងជាអស់ប្រិយភាពហើយ ព្រោះការរៀបចំនេះ គឺផ្តល់ឱកាសឲ្យ ម្ទេសខ្មាំង មានលទ្ធភាព និងមានប្រៀបច្រើនផងដែរ ដើម្បីស្តារមុខមាត់ក្នុងគុនខ្មែរវិញម្តង ខណៈប្រហែល ១ ឆ្នាំចុងក្រោយ ម្ទេសខ្មាំង ប្រកួតចាញ់ញឹកញាប់ សូម្បីតែអ្នកប្រដាល់ជំនាន់ក្រោយ ទើបតែឡើងមកថ្មីៗ ក៏ចាញ់ដែរ គឺបង្ហាញនូវកម្លាំងធ្លាក់ចុះឆ្ងាយជាងមុនណាស់។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា ប្រាប់ភ្នំពេញប៉ុស្តិ៍ថា៖ «ណាត សៀកនិន ឬ ពេជ្រ ម្ទេសខ្មាំងនេះ ត្រូវបានកាត់ចោលពីក្រុមជម្រើសជាតិហើយ នៅឆ្នាំ ២០២០ នេះ ដោយសារបញ្ហាមិនគោរពវិន័យក្នុងការប្រមូលផ្តុំ និងហ្វឹកហាត់។ កីឡាបើខ្សោយវិន័យ និងហាត់មិនបានល្អ គឺឡើងប្រកួតចាញ់ ហើយបន្ទាប់មកក្នុងរយៈពេលជិត ១ ឆ្នាំនេះ ម្ទេសខ្មាំង ប្រកួតចាញ់ច្រើនពេក»។
ចំណែក លោក អាត់ សំរិទ្ធ គ្រូបង្វឹក ម្ទេសខ្មាំង បាននិយាយថា៖ «ម្ទេសខ្មាំង ទើបតែមកហ្វឹកហាត់វិញ ក្នុងរយៈពេលខ្លី ហើយមួយរយៈនេះ ហាត់មិនបានល្អ ប្រកួតចាញ់ច្រើន ចង់បាក់ទឹកចិត្ត ប៉ុន្តែសម្រាប់សប្តាហ៍នេះ ខ្ញុំនឹងលើកទឹកចិត្តឲ្យគេប្រកួតបានល្អ យកជ័យជម្នះឲ្យបាន»។
លោកបន្ថែមថា៖ «តាមខ្ញុំពិនិត្យមើល ក្នុងចំណោមអ្នកប្រដាល់ ៣ នាក់ទៀត ដែលត្រូវចាប់ឆ្នោតប៉ះគ្នានេះ គឺមានកីឡាករ សេក ចៅជូត ល្អគួរសម ដែលលំបាកយកឈ្នះ ប៉ុន្តែ អេលីត ឡុងឡី និង សំ អាន មិនជាឧបសគ្គធំនោះទេ។ខ្ញុំនឹងប្រឹងជួយអប់រំណែនាំ និងបង្វឹកឲ្យ ម្ទេសខ្មាំង វិលមកខ្លាំងវិញឲ្យបានក្នុងពេលឆាប់ៗនេះ»។
ចំណែក ម្ទេសខ្មាំង និយាយថា៖ «នេះជាពេលវេលាខ្ញុំត្រូវខំប្រឹងឡើងវិញ។ មួយរយៈចុងក្រោយនេះ ខ្ញុំមិនសូវបានហាត់ ដោយជីតាខ្ញុំឈឺ បន្ទាប់មកគាត់ស្លាប់ ហើយប្រកួតចាញ់ទៅចង់បាក់ទឹកចិត្តតែម្តង។ ទោះជាយ៉ាងណា សម្រាប់ការប្រកួតថ្ងៃអាទិត្យនេះ គឺធានាវ៉ៃអស់ពីសមត្ថភាព ក្នុងនោះសង្ឃឹមឈ្នះ ដើម្បីស្តារមុខមាត់ឡើងវិញ ព្រោះខ្ញុំចង់សាងភាពល្បី នៅគុនខ្មែរម្តងទៀត»។
យ៉ាងណាក៏ដោយ លោក សន អេលី គ្រូបង្វឹក អេលីត ឡុងឡី បាននិយាយថា៖ «កីឡាករជើងថ្មី ឥឡូវល្អច្រើន គឺកម្លាំងល្អ ហើយបទពិសោធក៏ល្អបណ្តើរៗ ហេតុនេះជើងចាស់មួយចំនួនក៏លំបាកឈ្នះដែរ។ ទោះយ៉ាងណា សម្រាប់ការប្រកួតនេះ ខ្ញុំមិនទាន់ហ៊ានទស្សន៍ទាយយ៉ាងណាទេ គឺស៊ីសងលើការប្រកួតជាក់ស្តែង»៕
