.jpg)
កីឡាករសញ្ជាតិអាហ្សង់ទីន Lionel Messi (ឆ្វេង) របស់ក្រុម Barca ត្រូវទាញដោយខ្សែការពារ Bustinza របស់ក្រុម Leganes អំឡុងការប្រកួតកាលពីយប់ថ្ងៃអង្គារ។ AFP
ក្រុងម៉ាឌ្រីដ: ខ្សែបម្រើប្រយុទ្ធដ៏ឆ្នើម Lionel Messi នៅតែជាកីឡាករសំខាន់ ដែលរួមចំណែកជួយឲ្យក្រុមអ្នកមានបុណ្យ Barcelona ទទួលជ័យជម្នះ ស្ទើររាល់ការប្រកួត។ ជាក់ស្ដែង កាលពីយប់ថ្ងៃអង្គារ លទ្ធផលដែលឈ្នះ ២-០ លើក្រុម Leganes កីឡាករជម្រើសជាតិអាហ្សង់ទីន ក៏ធ្វើបានសម្រេច ១ គ្រាប់ដែរ។
នេះជាជ័យជម្នះ ២ លើក ជាប់ៗគ្នា ចាប់តាំងពីក្របខ័ណ្ឌ La Liga របស់ប្រទេសអេស្ប៉ាញ ចាប់ផ្ដើមដំណើរការឡើងវិញ ក្រោយផ្អាកដោយសារវិបត្តិនៃជំងឺកូវីដ ១៩។ នៅសប្ដាហ៍មុន ការធ្វើដំណើរទៅបំបាក់ក្រុមម្ចាស់ផ្ទះ Real Mallorca ៤-០ កីឡាករ Messi ក្រៅពីស៊ុតបញ្ចូលទីខ្លួនឯង ១ គ្រាប់ ក៏បានរួមចំណែកក្នុងការបញ្ជូនបាល់ឲ្យមិត្តរួមក្រុមទម្លុះសំណាញ់ទី ២ គ្រាប់ផងដែរ។
សម្រាប់ការប្រកួតដែលធ្វើឡើងនៅកីឡដ្ឋាន Camp Nou ដែលទទេស្អាត នាសប្ដាហ៍នេះ កីឡាករមាឌល្អិតរូបនេះ ក៏នៅតែលេចធ្លោដដែល បើទោះជាមិនមានចំណែកគ្រាប់ទី១ តែការបំប៉ោងសំណាញ់ទីដោយបាល់ពិន័យ១១ម៉ែត្រយ៉ាងល្អឥតខ្ចោះ នៅនាទីទី៦៩ វាបានបញ្ជាក់ថា បើក្រុមមាន Messi នោះតំបន់ប្រយុទ្ធកាន់តែមុតស្រួច ខណៈក្រោយបង្ហាញខ្លួន បាន៣៣ដង ឥឡូវនេះ កីឡាករវ័យ ៣២ឆ្នាំរូបនេះ រកបាន ២៦ គ្រាប់ ក្នុងនោះ ៨ ការប្រកួតចុងក្រោយ ស៊ុតបាន ៧ គ្រាប់ និងបញ្ជូនឲ្យមិត្តរួមក្រុម (assist) ៨ លើក។
យ៉ាងណា ការប្រកួត ដែលធ្វើឲ្យ Barca ដណ្ដើមបាន ៣ ពិន្ទុនេះ គ្រប់គ្នាបានចាប់អារម្មណ៍យ៉ាងខ្លាំងដែរនូវគ្រាប់ដំបូង នៅនាទីទី ៤២ របស់កីឡាករ Ansu Fati ដែលការស៊ុតបញ្ចូលទីធ្វើឲ្យខ្សែប្រយុទ្ធវ័យក្មេងវ័យទើបតែ ១៧ ឆ្នាំ រកបាន ៥ គ្រាប់ ជាមួយនឹងការបង្ហាញខ្លួនក្នុងលីក ៨ លើក។
ក្រោយការប្រកួតបញ្ចប់ទៅ គ្រូបង្វឹករបស់ក្រុមអ្នកមានបុណ្យ លោក Quique Setien ក៏បាននិយាយសរសើរថ្វីជើងរបស់ Fati ដែរថា៖ «យើងចង់មានការប្រកួត ដែលមាន Ansu Fati ដោយសារគេកំពុងចាប់ផ្ដើមប្រសើរឡើងៗ តាំងពីការហ្វឹកហាត់។ ខ្ញុំរីករាយដែលមានរូបគេក្នុងក្រុម។ គេប្រឹងប្រែងណាស់ ដូច្នេះ គេស៊ុតបញ្ចូលទីបាន ហើយគេ នឹងក្លាយជាកីឡាករមួយរូប ដែលធ្វើឲ្យខ្សែការពារឈឺក្បាលមិនខាន។ ពិតមែន នៅមានការងារជាច្រើនទៀតសម្រាប់រូបគេ ជាពិសេសការធ្វើឲ្យរាងកាយរឹងម៉ាំ ដើម្បីចៀសវាងពីហានិភ័យនាំឲ្យរបួស»។
ជ័យជម្នះនេះ ធ្វើឲ្យក្រុមម្ចាស់ជើងឯកចាស់ មាន ៦៤ពិន្ទុ ពោលគឺនាំមុខដាច់បណ្ដោះអាសន្នចំនួន ៥ ពិន្ទុ លើក្រុមគូប្រជែងស្លាប់រស់ Real Madrid ដែលឈរនៅលេខ ២ និងប្រកួតតិចជាងខ្លួន ១ លើក៕ AFP/VN
