ភ្នំពេញ៖ ប្រធានខេមរសហព័ន្ធកីឡាយូដូ លោក ហេង លី បានអះអាងថា ការប្រកួតកីឡាយូដូជើងឯកថ្នាក់ជាតិ ឆ្នាំ ២០២០ ដែលទើបបានបញ្ចប់កាលពីថ្ងៃអាទិត្យ គឺមានស្ថានភាពល្អប្រសើរនិងស្តារមុខមាត់បានល្អផងដែរ បន្ទាប់ពីការកំណែទម្រង់ថ្នាក់ដឹកនាំសហព័ន្ធ អស់រយៈពេលជិត ២ ឆ្នាំមកនេះ។ ជាមួយគ្នានេះ ប្រតិភូកីឡាមកពីខេត្តសៀមរាប មានការរំភើបសប្បាយចិត្តខ្លាំងបំផុត ទោះបានត្រឹមចំណាត់ថ្នាក់លេខ ៤។
លោក ហេង លី បានថ្លែងប្រាប់ ភ្នំពេញ ប៉ុស្តិ៍ ថា៖ «កីឡាយូដូ ធ្លាប់មានបញ្ហាចម្រូងចម្រាស តែពេលនេះបានស្តារមុខមាត់ល្អឡើងវិញ ដោយយើងកំណែទម្រង់ថ្នាក់ដឹកនាំ ហើយពេលនេះ យើងមានការឯកភាពសាមគ្គីភាពគ្នាបានល្អ។ ចំពោះការប្រកួតជើងឯកជាតិលើកនេះ ខ្ញុំហ៊ានវាយតម្លៃជារួមថា បានល្អប្រសើរគ្រប់ផ្នែក ពោលគឺកីឡាយូដូ ទទួលបានផលល្អ ៨០ ភាគរយ»។
តាមរយៈការប្រកួត ៤ ថ្ងៃ នៅក្នុងសាលដំបូលទូកនៃពហុកីឡដ្ឋានជាតិ នោះ លោក ហេង លី ប្រាប់ថា ការប្រកួតកីឡាយូដូជ្រើសរើសជើងឯកថ្នាក់ជាតិលើកនេះ បានចំណាយថវិកាអស់ត្រឹម ២៧ លានរៀល នៃកញ្ចប់ថវិកាសរុបចំនួន ៦០ លានរៀល ដែលក្រសួងអប់រំ យុវជន និងកីឡា បានផ្តល់ជូនខេមរសហព័ន្ធកីឡាយូដូ សម្រាប់ប្រតិបត្តិការទៅលើផ្នែករដ្ឋបាល វគ្គបណ្តុះបណ្តាល និងប្រកួតជើងឯកជាតិ ក្នុងឆ្នាំ ២០២០។
ទាក់ទងទៅនឹងលទ្ធផលបច្ចេកទេស លោកប្រធានសហព័ន្ធ បានប្រាប់ថា យើងមានក្លិបចូលរួមចំនួន ៥ ប្រតិភូ មានគ្រូបង្វឹក ៩ នាក់ ក្រុមអត្តពលិក ៥៧ នាក់ (ស្រី ២៥ នាក់) ហើយជាលទ្ធផលក្រុមក្រសួងមហាផ្ទៃ ឈ្នះបានមេដាយមាសច្រើនជាងគេ ឈរនៅចំណាត់ថ្នាក់លេខ ១ រីឯក្លិបបក្សីចាំក្រុង បានលេខ ២ ក្លិប JJMC បានលេខ ៣ ហើយក្រុមខេត្តសៀមរាប បានចំណាត់ថ្នាក់លេខ ៤។
ប្រតិភូកីឡាមកពីខេត្តសៀមរាប លោក ឆាន សុភី មានការរំភើបខ្លាំងនូវលទ្ធផលនេះ។ លោកនិយាយថា៖ «ខ្ញុំធ្លាប់នាំកីឡាករមកប្រកួតថ្នាក់ជាតិកន្លងមក មិនដែលទទួលបានលទ្ធផលល្អបែបនេះទេ គឺភាគច្រើនទៅវិញមិនបានមេដាយ ប៉ុន្តែលើកនេះខេត្តសៀមរាប ដែលបញ្ជូនអត្តពលិកមក ១១ នាក់ (ស្រី ៦ នាក់) គឺយើងឈ្នះបានមេដាយមាស ១ ប្រាក់ ៣ និងសំរឹទ្ធ ៤»។
លោក សុភី បានបន្ថែមថា៖ «ទោះជាយើងបានចំណាត់ថ្នាក់លេខ ៤ ប៉ុន្តែបើប្រៀបធៀបជាមួយឆ្នាំមុនៗ យើងទទួលបានភាពជោគជ័យខ្លាំងណាស់»។ ចំណែកកីឡាការិនីវ័យ ២២ ឆ្នាំ អឹុង នួ មកពីខេត្តសៀមរាប និយាយថា៖ «ខ្ញុំធ្លាប់ចូលរួមប្រកួតច្រើនលើកហើយ តែមិនធា្លប់បានមេដាយមាសទេ ប៉ុន្តែលើកនេះ ខ្ញុំវ៉ៃទម្ងន់សេរី ឈ្នះបានមេដាយមាស គឺសប្បាយចិត្តណាស់»។
ចំណែកអ្នកស្រី នុត ស្រីរ័ត្ន គ្រូបង្វឹកយូដូរបស់សមាគមក្រសួងមហាផ្ទៃប្រាប់ថា៖ «កីឡាយូដូឆ្នាំនេះក្រសួងមហាផ្ទៃ បានលេខ ១ ដាច់តែម្តង គឺសប្បាយចិត្តខ្លាំង ដោយមហាផ្ទៃបញ្ជូនអត្តពលិកមកប្រកួត ១៧ នាក់ (ស្រី ៦ នាក់) ហើយជាលទ្ធផល ឈ្នះបានមេដាយមាស ១០ ប្រាក់ ៣ និងសំរឹទ្ធចំនួន ៤»៕